Search form

Mal 1

Nyikusulu dza Yowane Mubotiki

(Mat 3.1-12; Luk 3.1-18; Yow 1.19-28)

1Mbandukulu Musamu Wamubwete wa Yesu Kiristo, Mwaana Nzaambi. 2Bunu bu diri dyatinu mu mukaanda Esaya mubikiri ti:

«Mono, me nyiheeke munati-mukeensu waami ku mankula ma ye,

nde wukuyirikila nzila.

3Mbeembu ya wunde wukwebikisa mu nsi yankatu ti:

Yirikeenu munsaku Mfumu,

suungukeenu manzila maandi!»

4Yowane Mubotiki wayisa mu nsi yankatu, mu kwebikisa musamu wa mbotokulu ya nyiingulu madyeele, mu mpemusunu ya masumu. 5Nkoonsi yoyinso ya Yudaya, na bobanso baba ku Yerusalemi, baba kweendaana kuri nde, na baba taambulaa mbotokulu kuri nde, mu nyari ya Yorodani, mu ntambukulu masumu maaku.

6Yowane waba walwaata kinkuta kya myoosi mya makamelo, na musweele wa mukaanda kibulu mu luketu. Nde waba kwedyaanana bambambala na maasi ma nyosi ya ku bitiiti. 7Nde waba kwebikisaa ti: «Wunde wukwiisa ha mambisa ma me, bvuriri makwa na me; me nyahele kukuka mu kuyilima, na mu kunyanguna misiinga mya masapaatu mya nde. 8Me nyalubotokiri mu maampa; ngo nde sa kalubotoko mu Mpeeve Yangisi.»

Mbotokulu na nsindukulu dza Yesu

(Mat 3.13–4.11; Luk 3.21-22; 4.1-13)

9Mu biluumbu bibyo, Yesu wafumuna ku Nadzareti, mu nkoonsi ya Ngalili, na Yowane wamubotoko mu Yorodani. 10Mu kilookolo kinikyo, bu kaba mu kutoomboko ku nkoto, nde wamono mayulu matyaabuka, na Mpeeve yakulumuka, ha yulu nde, bunu beembe. 11Mbeembu yayukukuna mu mayulu ti: «Ye ngo Mwaana waami wa mutima, me nyimonaa kiminu mu ye.»

12Mu kilookolo kinikyo se, Mpeeve yamunata ku nsi yankatu. 13Yesu walutisa biluumbu makuumi mana ku nsi yankatu, na Satana wamukotoso mu nsindukulu. Nde waba ha kimosi na bibulu bya ku bitiiti, na bambasi baba musalilaana.

Yesu wateele bayiki bana mbila

(Mat 4.12-22; Luk 4.14-15; 5.1-11)

14Ha mambisa ma nkotosulu Yowane mu boroko, Yesu wayisa ku Ngalili mu kwebikisa Musamu Wamubwete wa Nzaambi, 15waba kweleelaa ti: «Ntaangu yikukiri na Kimfumu kya Nzaambi kikokisiri! Yiingee madyeele, na seenee kanyi mu Musamu Wamubwete!»

16Yesu waba kweyende mu simu dya mubu wa Ngalili, nde wamono Simoni bo na Andere, mpaangi yaandi, bari mu kutuba siinga mu mubu, bukuri bo baba balebi ba bansu. 17Yesu wabaleele ti: «Nameenu me, tumi me nyilusa balebi ba baatu.» 18Mu kilookolo kinikyo, bo babwoongolo masiinga maaku, na bamunama. 19Nde wabweese kweende mwaa-kitini, na wamono Yakobo bo na mpaangi yaandi Yowane, baala ba Dzebedayi, bo baba mu bwaatu, bari mu kuloondaa masiinga. 20Mu kilookolo kinikyo, nde wabateele mbila. Bo basiisa taayi dyaaku, Dzebedayi munsa bwaatu na bangaamba, na banama Yesu.

Muutu waba wakwaamusu mu mpeeve yayibi

(Luk 4.31-37)

21Yesu na bayiki baandi bakoto mu bvula dya Kafarnawumi. Mu kiluumbu kya mpuumunu, nde wakoto mu nzo-nkutukunu, na mu kilookolo kinikyo, nde wabeke mu kuyikisa. 22Baatu bakimuka mu nyikusulu dzaandi, bukuri nde waba bayikisaa bunu muutu wuri na lutumu, nkani ka bunu batini ba mangisi ko. 23Mu kilookolo kinikyo, kwaba muutu mosi waba na mpeeve yayibi mu nzo ya nkutukunu. Nde wabikisa 24waleele ti: «Nkya ntoono ha kakati dya ye na beetu, Yesu wa ku Nadzareti? Buri ye wiisiri mu kutufuukisa? Me nyaari ye na wuri, wangisi wa Nzaambi.» 25Yesu waŋaŋana mpeeve yayibi yiyo na waleele ti: «Kaanga munwa waaku na pala mu muutu wu!» 26Mpeeve yayibi yamunyingisa mu makwa, na bu kafula musaakulu wamunene, yapala mu nde. 27Baatu bobanso babwiilila kinkuuka kuri bafulusina bo na bo: «Nki bi? Nyikusulu yamoono mu lutumu! Nde wuha ntumunu kuri mampeeve mamabi, na mo mari mu kwemutumumina!» 28Mvuumfu Yesu yatsamukina, hanaho, mu nkoonsi yoyinso ya Ngalili.

Yesu watsinikisa babeeru balaka

(Mat 8.14-17; Luk 4.38-41)

29Hanaho, bapalaa mu nzo-nkutukunu, bayende ku nzo ya Simoni bo na Andere, kintwaari na Yakobo na Yowane. 30Nguri mukasi Simoni waba waneŋene mu baawu. Hanaho se banzoonsolo mu nde kuri Yesu. 31Yesu bu kakokosolo kuri nde, wamukwaata mu kooko mu kumutelemese. Baawu dyawa, na nde wabeke mu kubasalila.

32Mu nsinsika, bwiisi bumana kuyila, baatu batwaala kuri Yesu bobanso baba na mabeeru na baba na mampeeve mamabi. 33Bvula dyodinso dyaba dyakutukuna ha mweelu nzo. 34Yesu watsinikisa baatu balaka baba na mpasi dza mabeeru ma bitsuumbu ngo bitsuumbu. Wabingisa se mampeeve malaka mamabi. Nde kasii ha miswa kuri mampeeve mamabi ko mu kudzoonso, bukuri mo maba mamuyaari.

Yesu wanamitina kweyikisa Musamu Wamubwete ku Ngalili

(Luk 4.42-44)

35Mu minkya mya bwiisi, mampimbisi bu maba makiri, Yesu wasiimbuka, wapala na wayende ha kibeendu kya nde-kaka mu kweesaambila, na wabeke kusaambila. 36Simoni na bambaasi baba kintwaari na nde babeke kwemusaka. 37Bamudzuukila na bamuleele ti: «Baatu bobanso bari mu kwekusaka.» 38Yesu wabvutula kuri bo ti: «Tweendee kukimi, mu mabula mari bele, mpisi me nyeyikisa se kukwo, bukuri mu bubwo me mparidyee.» 39Nde wayende mu nkoonsi yoyinso ya Ngalili, mu kweyikisa mu manzo ma nkutukunu, na kwebingisa mampeeve mamabi.

Yesu watsinikisa mubeeru bwaasi

(Mat 8.1-4; Luk 5.12-16)

40Mubeeru bwaasi mosi wayisa kuri Yesu mu kumuyingukila, [watsukuma] na wamuleele ti: «Buti ye tiiri, lo wakuka mu kunsinikisa.» 41Nde wamubakila ngebe, na bu kalaambula kooko kwaandi, wamubelemene na waleele kuri nde ti: «Me ntiiri, tsiinika!» 42Mu kilookolo kinikyo, bubeeru bwa bwaasi bwawa, na nyutu yaandi yatsyeemeke. 43Nde wamuŋaŋana, na mu kilookolo kinikyo, wamupalisa, 44na wamuleele ti: «Wuyuka, yaa leele kuri muutu ti mosi ko; ngo yende soongo nyutu kuri ngaanga-nzaambi, na nata bibyo biloombo mangisi ma Moose, mu ntoono nsyemukunu yaaku, mpisi kiba kimbaangi kuri bo.» 45Ngo kasi muutu wunde, bu kapala, wabaandika mu kwebikisa kwalaka na kwetsamikisa musamu wunde, mu kiteesu kiri Yesu waba weki ti bwa kukotolo pe, mu bunsaalisi kunsa bvula; ngo nde waba weki kwebaanaa ku mbasi, mu bibeendu bya nde mukaka. Baatu baba fumunaa mu mampele ngo mampele mu kweende kuri nde.

Musamu Wamubwete

©2013 Bible Society of the Republic of Congo

More Info | Version Index