Search form

Mal 16

Mfulukulu Yesu

(Mat 28.1-8; Luk 24.1-12; Yow 20.1-10)

1Mpuumunu bu yaluta, Mariya Madelene, Mariya ma nguri Yakobo, na Salome basuumba milolongo myamfuku yayibwete mu kweekila nyutu Yesu. 2Mu minkya-minkya mya bwiisi bwa kiluumbu kyatete mu lumiingu, bo baba beki ku mampeembe, ntaangu bu yaba kwepala. 3Bo baba kwelelesene ti: «Na wutuyisikila tari dyaduka bulu?» 4Bu basiimbila miisu mya bo, bamono ti tari dyeki dyayusulu; nkati tari meene dyaba dyadinene na dyaleme. 5Bu bakoto munsa mampeembe, bamono mwa munkuula mosi wadzakala ha lubakala, walwaata kinkuta kyahembeke; bo babwiilikila kinkuuka. 6Munkuula wunde wabaleele ti: «Yaa luba na boomo ko; beenu lukwesaka Yesu, wa ku Nadzareti, wu babee komono; fulukiryeenu, kasiiryee ha ko; monee ha babee basuusa nyutu yaandi. 7Ngo yendeenu lweluleele kuri bayiki baandi na kuri Petelo ti: "Nde wulutekisiri ku Ngalili; kukwo beenu lumumono, bunu bu kabee luleele!"» 8Bu bapala bayitika kwa la na mampeembe, mu mantekete, na mu mutima mambaawu. Bo basii leele kuri muutu ti mosi ko, bukuri baba na boomo.

Yesu wamonokono kuri Mariya Madelene

(Mat 28.9-10; Yow 20.11-18)

[9Yesu bu kafuluka mu minkya mya kiluumbu kya lumiingu, watekesele kumonoko kuri Mariya Madelene, mu nde kapalisiri mampeeve nsaamu mamabi. 10Nde keendaana, weeyaabisa kuri baba kweyendaana na Yesu, baba bakoto bufwiiri na baba dilaana. 11Bo bayuka ti «Yesu wuri mwooyo, na monikinyee kuri Mariya», babisiri kusiila kanyi.

Yesu wamonokono kuri bayiki boolo

(Luk 24.13-35)

12Ha mambisa haho, Yesu wamonokono mu kifwaani kikimi kuri boolo mu bayiki, baba kweende ku bula. 13Bo bayende kweeyaabisa kuri bambaasi basii saala, ngo babisiri kusiila kanyi.

Yesu wamonoko kuri bayiki kuumi na mosi

(Mat 28.16-20; Luk 24.36-49; Yow 20.19-23; Biy 1.6-8)

14Ku nsukulu, bo kuumi na mosi, bu baba mu kudya, Yesu wabamonokono na wabaseembe mu ntoono kuhele kwa kanyi na nkubulu mitima mya bo, bukuri basii siila kanyi mu myaleeriri babo bamumwiini kuri mwaafuluka. 15Nde wabaleele ti: «Yendee mu nsi yansiina, lweyaabisa Musamu Wamubwete kuri biyiriki byobinso. 16Wunde wusiila kanyi, na wutaambula mbotokulu sa kabvuuka, ngo wunde wuhele kusiila kanyi sa bamukesele mukanu. 17Kuri babo basiila kanyi, bidiimbu bimabi sa byamonoko: mu nkuumbu ya me, bo sa babingisa mampeeve mamabi, sa badzoonso mandiinga manzeense, 18sa bakwaata banyoko [mu myooko], ti hayuku banwiini bidzusaa, lo bibamonoso mpasi ko, sa bateeteke myooko ha yulu babeeru, na babeeru sa batsiinika.»

Yesu wabvutuka kuri Nzaambi

(Luk 24.50-53; Biy 1.9-11)

19Mfumu Yesu, kamanaa kudzoonso kuri bo, wanaangunu mu mayulu na wadzakala ha lubakala lwa Nzaambi. 20Bayiki bayende mu kweyaabisa Musamu Wamubwete mwomunso. Mfumu waba kwesala na bo, na kwetswiikisa maampu mu bidiimbu.]

Musamu Wamubwete

©2013 Bible Society of the Republic of Congo

More Info | Version Index