Search form

Mal 2

Yesu watsinikisa kikata

(Mat 9.1-8; Luk 5.17-26)

1Mwaa-biluumbu bu byaluta, Yesu wabweese kubvutuka ku Kafarnawumi. Baatu bayuka ti nde wuri ku nzo. 2Baatu balaka bakutukina kuri bibeendu byawa natee ha mweelu nzo; nde wabeke mu kubayikisa Maampu. 3Baatu bayisa kuri nde na kikata, kiri baatu bana bamunaanguna. 4Bu baba bwa kutubukila pe hari Yesu, mu ntoono mpuumbu baatu, bo bayaala muluri nzo, ha kibeendu ki kaba nde. Basaalisa waanga, na basundula kikata mu nkwaala yi kaba waneŋene. 5Yesu, bu kamono kanyi dya baatu babo, waleele kuri kikata ti: «Mwaana waami, masumu maaku meki mahemusunu.» 6Babamosi mu batini ba mangisi baba badzakala haho, batsima kunsa mitima myaaku ti: 7«Bukuri nki muutu wumawu kari mu kwedzoonsolo bubwo? Nde Nzaambi kari mu kusaana. Na wakuka mu kuhemesene masumu, mbuti ka Nzaambi kitsu ko?» 8Mu kilookolo kinikyo, Yesu mu mpeeve yaandi, wabakula ma baba tsimaa bo kunsa mitima myaaku, na wabaleele ti: «Buri luri mu kwetsima mya bubwo kunsa mitima myeenu? 9Nki bibvuriri kuleenge, kuleele kuri kikata ti: "Masumu maaku meki mahemusunu", hoti, kuleele ti: "Teleme kwaaku, holo nkwaala yaaku na yende"? 10Ngo mu kuri ti, beenu luyaaba ti Mwaana muutu wuri na lutumu lwa kwehemesene masumu ha butoto.» Nde waleele kuri kikata ti: 11«Me nyikuleeriri ti: Teleme, holo nkwaala yaaku na yende ku nzo yaaku.»

12Mu kilookolo kinikyo, muutu wunde wateleme, wanaanguna nkwaala yaandi, na wapala ha busu bwa bobanso. Baatu bobanso bamono dyo dya nkimukunu, bakeembise Nzaambi na baleele ti: «Twamwiini kweetu mya bumabu ko!»

Yesu wateele Levi mbila

(Mat 9.9-13; Luk 5.27-32)

13Yesu wabweese kweende mu teke mu mubu. Mpuumbu yo yoyinso ya baatu yayende kuri nde, na nde wabeke mu kubayikisa. 14Bu kaba mu kuluta, nde wamono Levi, mwaana Alafayi, wadzakala ha kibeendu ki baloombaa mpaku. Yesu waleele kuri nde ti: «Nama me.» Nde katelemaa, wumunemi. 15Yesu bu kaba mu kudya mu nzo Levi, batori ba mpaku balaka na bangaa-masumu se badya kintwaari na nde, na bayiki baandi, bukuri baatu balaka baba kwemunamaana. 16Batini ba mangisi na Bafarisi, bu bamono ti Yesu wuri mu kudya, kintwaari na bangaa-masumu na batori ba mpaku, baleele kuri bayiki baandi ti: «Nde buri kari mu kudya kintwaari na batori ba mpaku na bangaa-masumu?» 17Yesu, bu kayuka bubwo, wabaleele ti: «Kari ba babatsiina babaanaa na nzala ngaanga ko, ngo babeeru. Me nyahele kwiisa mu kuteele basuunguma mbila, ngo bangaa-masumu.»

Kifuuri mu ntoono ya loomi

(Mat 9.14-17; Luk 5.33-38)

18Bayiki ba Yowane na Bafarisi baba bakoto loomi. Baatu bayisa kufuula Yesu ti: «Bukuri nki ntoono, bayiki ba Yowane na bayiki ba Bafarisi bakoto loomi, ngo kasi bayiki ba ye, loomi kukoto pe?» 19Yesu wabvutula kuri bo ti: «Buri banduku ba mukweeri, lo bakotiri loomi, mu mantaangu momanso mari mukweeri wuri kintwaari na bo? Bo ka bari nkotulu loomi ko 20Ngo biluumbu biri mu kwiisa, biri mukweeri sa kaba wayisulu ha kakati dya bo; mu kiluumbu kikyo, bo sa bakoto loomi.»

21«Kuri muutu ko wuloondaana kinkuta kyakikulu, mu kiteendi kya nsaanda yamoono. Bukuri kiteendi kya nsaanda yamoono, lo kikaakiri kinkuta kyakikulu, na kinkuta kihamisini kutyaabuka. 22Kuri se muutu wuri lo sekiri malu mamoono, mu bimpokoro byabikulu ko; bukuri lo malu maluukisiri bimpokoro. Malu lo matsaamukini, na bimpokoro se bibvukini. Ngo malu mamoono, kusekele mu bimpokoro byamoono.»

Mwaana muutu ngo mfumu kiluumbu kya mpuumunu

(Mat 12.1-8; Luk 6.1-5)

23Bu baba mu kutaba manseke mu kiluumbu kya mpuumunu, bayiki baandi mu nzila, babandika kwebokolo masaangu. 24Bafarisi baleele kuri Yesu ti: «Moneeti, bukuri nki bayiki ba ye bari mu kweyirika madiku mu kiluumbu kya mpuumunu?» 25Yesu wabvutula kuri bo ti: «Buri beenu lwakiri kutaanga pe, mamo ma yirikiri Davidi, bu kaba weki watikila na weki na nzala, nde na ba kaba na bo? 26Nde kakotaa mu nzo Nzaambi, mu ntaangu yiri Abyatara waba mukuutu bangaanga ba Nzaambi, wadya mampa maha mu kikabu kuri Nzaambi, mari baatu bahele na miswa mu kudya, ha yulu bani bangaanga ba Nzaambi kitsu; kasi nde waha se na kuri baatu ba kaba na bo.» 27Yesu wabweese kuleele kuri bo ti: «Mpuumunu bayirikiri yo mu ntoono muutu, ngo bahele kuyirika muutu, mu ntoono mpuumunu. 28Mu didyo, Mwaana muutu wuri se Mfumu kiluumbu kya mpuumunu.»

Musamu Wamubwete

©2013 Bible Society of the Republic of Congo

More Info | Version Index