Search form

Mal 5

Yesu watsinikisa muutu waba na mampeeve mamabi

(Mat 8.28-34; Luk 8.26-39)

1Bo batubuka ku simu dya mubu dyakaka, mu nkoonsi bari Ngeraseno. 2Yesu, bu kasunduka mu bwaatu, hanaho muutu mosi waba na mpeeve yayibi, wapala kunsa mampeembe, wamubwaana. 3Muutu wunde waba dzakalaana kunsa mampeembe. Kwaba kwahele muutu waba bangusinaa kumukaanga ti hayuku mu syeene. 4Mu ntaangu ngo ntaangu, baba mukaangaana mu biseengu na masyeene; ngo kasi nde haba lo wutabula masyeene, na wutaandula biseengu bibyo. Kwaba kwahele muutu waba wakuka mu kumudzuunisa. 5Mantaangu momanso, butsuku na mwiini, nde haba lo wuri kunsa mampeembe, na ku yulu milaandu, wukwefula misaakulu na wukwelemese nyutu mu matari.

6Bu katalila Yesu ku la, nde wadzumuna, watsukuma ha busu bwaandi, 7wabikisa mu mbeembu yayinene waleele ti: «Nki ha kakati dya me na ye, Yesu Mwaana Nzaambi Mwa-yulu? Me nyikuyingukila, mu nkuumbu Nzaambi, yaa kwaamisa me ko!» 8Bukuri wabaleele kuri nde ti: «Mpeeve yayibi, pala mu muutu wu!» 9Yesu wamufuula ti: «Nkuumbu ye na?» Nde wabvutula ti: «Nkuumbu me "Mukaangu", bukuri beetu turi balaka!» 10Nde waba yingukilaa Yesu kwalaka, mpisi kahele kubaheeke kuri la na nkoonsi yiyo! 11Ha teke haho, kwaba mpuumbu bangulu yayinene yaba mu kwedya bebele na mulaandu, 12Mampeeve mamabi mayingukila Yesu ti: «Tuheeke kweetu mu bangulu, mpisi beetu tukoto mu bo!» 13Yesu wabaha miswa. Mampeeve mamabi bu mapala makoto mu bangulu. Mpuumbu bangulu yapatuka ku nsuku beenge, na yabwa mu mubu, kampe mafuunda moolo madyaama mu mubu. 14Batari ba bangulu bayitika na bayende kweyaabisa ntoono yiyo, kunsa bvula na mu mabula. Baatu bayisa mu kumono mamo mayirimini. 15Bu bayisa kuri Yesu, bamono muutu waba na mampeeve mamabi wadzakala, walwaata binkuta, na wuri kunsa kidzuunu. Baatu bamono boomo. 16Bambaangi bayaabisa kuri baatu babo mimyo mayirimini mu muutu waba na mampeeve mamabi, na mu bangulu. 17Baatu babaandika kuyingukila Yesu, kuri ti keende kwa la na nkoonsi ya bo. 18Yesu kabaanaa weki nwaata mu bwaatu, muutu watsiinikini mu mampeeve mamabi, wamuyingukila mpisi keba kintwaari na nde. 19Yesu kasii muha miswa ko, ngo kasi wamuleele ti: «Yende ku nzo yaaku, kuri ba ye-meene, na yaabisa momanso makuyirikiri Mfumu, na bu kakusiiriri ngebe.» 20Nde wayende na wabaandika mu kwebikisa, mu mumvuka wa mabula kuumi, momanso mamuyirikiri Yesu; na bobanso bamono dyo dyankimukunu.

Mukyeetu mosi wabelemene kinkuta kya Yesu, na mwaana Yayiro wafuluka

(Mat 9.18-26; Luk 8.40-56)

21Yesu bu kabweese kubvutuka ku simu dya mubu dyakaka [mu bwaatu], mpuumbu baatu yayinene yakutukina ha kaba nde mu teke mubu. 22Mosi mu bakuutu ba nzo-nkutukunu, nkuumbu yaandi Yayiro, bu kamono Yesu, wabwa ha miilu mya nde. 23Wamuyingukila kwalaka na waleele ti: «Mwaa-mwaana me wa mukyeetu, weki mu kufwa. Tweendee wumutetekele myooko mpisi kabvuuka na kaba mwooyo.» 24Yesu wayende kintwaari na nde. Mpuumbu baatu yayinene yamunama na bamusiila mfina.

25Kwaba mukyeetu mosi wuri makila maba kwemupalaana, mu kiteesu kya mibvu kuumi na myoolo. 26Nde wamono mpasi dzalaka mu myooko mya babuki balaka. Wamana mboongo dzodzinso dzi kaba na dzo, ngo kasi ha kibeendu kya kuleenge, bubeeru kusa kuleme. 27Bu kayuka ma baba leelaana mu Yesu, nde wakoto kunsa mpuumbu, na wamubelemene ku mambisa mu kinkuta. 28Nde waleele kunsa mutima ti: «Mbuti me mbelemini kwaandi ti kinkuta kya nde, lo me mvuukiri.» 29Mu kilookolo kinikyo, makila mahoto kupala, na nde wamono kunsa nyutu yaandi ti tsiinikini. 30Hanaho, Yesu wayaaba mu nde-meene ti mpinu dzipariri mu nde. Bu kasyeeteke, wafuula ti: «Na belemini binkuta bya me?» 31Bayiki baandi bamuleele ti: «Ye wumono kuri ti mpuumbu yiri mu kwefinikina kuri ye, ngo wubweese kufuula ti: "Na belemini me?"» 32Nde wadyeengese kisooso mu kutala kari na siiri bubwo. 33Wa mukyeetu, bu kaba kayaaba mamo ma kabwanikini na mo, wayende, wabwa ha busu bwa Yesu, mu boomo na mantekete, na wamuleele ngwanwa yoyinso. 34Yesu waleele kuri nde ti: «Mwaana me wa mukyeetu, kanyi dyaaku dikubvuukisiri, yende mu kiyeengi, na tsiinika mu bubeeru bwaaku.»

35Yesu bu kaba wakiri mu kudzoonso, baatu banaangukini ku nzo mukuutu nzo-nkutukunu baleele kuri mukuutu ti: «Mwaana ye wa mukyeetu mwaafwa; buri wubweese kuwungisa kwaandi Muyikisi.» 36Ngo Yesu bu kayukiri ma baba dzoonso, waleele kuri mukuutu nzo-nkutukunu ti: «Yaa ba na boomo; sa dini kanyi kitsu!» 37Yesu kasii bweese kutala ko ti baatu beende kintwaari na nde, ha yulu wuni Petelo, Yakobo, na Yowane mpaangi Yakobo. 38Bu batubuka ku nzo mukuutu nzo-nkutukunu, Yesu wamono kisaangila, na baatu bari mu kudila na kunyoongo kwalaka. 39Yesu kakotaa mu nzo, waleele kuri bo ti: «Buri luri mu kusa kisaangila, na buri luri mu kudila? Mwaana wahele kufwa, ngo tolo kari kabwa.» 40Kasi baatu bamusiila munsiku. Ngo nde kamanaa kupalisa bobanso ku mbasi, horiri taayi na nguri ba mwaana, na bayiki baba kintwaari na nde, na kotiri mu nzo mwaba mwaana. 41Nde wakwaata kooko kwa mwaana na waleele ti: «Talita kuum,» mbangukulu lo ti: «Mwaa-ntuumba, me nyikuleele ti siimbika!» 42Hanaho, mwaa-ntuumba wasiimbuka na wabeke kweyende. Mwaa-nde waba na bvula kuumi na dzoolo. [Mu kilookolo kinikyo], baatu bamono dyo dyankimukunu yalaka. 43Yesu wabadika mu makwa ti, muutu ti mosi yaa kayaaba ko, na waleele ti: «Muheenee byandya.»

Musamu Wamubwete

©2013 Bible Society of the Republic of Congo

More Info | Version Index