Search form

Mal 8

Yesu wadiisila mafuunda mana ma baatu

(Mat 15.32-39)

1Mu biluumbu binibyo, mpuumbu baatu yayinene yabweese kukutukina na baba bya kudya pe. Yesu kateelaa bayiki baandi, wabaleele ti: 2«Me nyiri na ngebe mu mpuumbu yi, bukuri biluumbu byeki bitatu, baatu bari ha teke me, ngo bahele na bya kudya. 3Mbuti heki me nyibabvutiri mu manzo, kuri bahele kudya, lo makwa ma bawiiri mu nzila, na babamosi mu bo, bafuminye ku la.» 4Bayiki baandi babvutula kuri nde ti: «Dyaburi muutu kabangusinaa kuyukutisa baatu bamaba mu mampa ku nsi yankatu yimayi?» 5Yesu wabafuula ti: «Mampa makwe luri na mo?» Bo babvutula ti: «Nsaamu.» 6Yesu watuma mpuumbu baatu mu kudzakala ha nsi; na bu kaholo mampa nsaamu, wabvutula matoondo, wabukuna mo na wamaha kuri bayiki baandi mpisi bakabula; bo bakabula mo kuri mpuumbu. 7Bo baba se na mwaa-ndaambu bansu. Yesu wasakumuna bansu babo, na waleele kuri bayiki mu kukabula se. 8Baatu badya, bayukuta. Na batolo bitsuri bya mampa byasaariri: mampiri nsaamu. 9Baatu baba kampe kiteesu kya mafuunda mana. Yesu wababvutula. 10Hanaho, nde wanwaata mu bwaatu na bayiki baandi, na wayende ku mankoonsi ma ku Dalamanuta.

Bafarisi baloombo kimaangu

(Mat 16.1-4)

11Bafarisi bayisa na babaandika kusa nkalikisi na Yesu. Bo bamusakila kidiimbu kya ku yulu, mu ku kumutsiitsa. 12Yesu wanana muwuumunu mu kiluunsi, kyaandi na waleele: «Buri kinseendu kimaki kiri mu kusaka kidiimbu? Ngwanwa me nyiluleele, ka kuba kidiimbu ti kimosi ko, ki baha kuri kiseendu ki!» 13Kamana kubasisa, nde wabweese kunwaata mu bwaatu, na wasabuka ku simu dya mubu.

Lufunusu lwa Bafarisi na lwa Erode

(Mat 16.5-12)

14Bayiki badzimikini mu kuholo mampa. Mpa mosi kitsu baba na yo mu bwaatu. 15Yesu wabaha lutumu, wabaleele ti: «Luyuka! Seenee madyeele mu lufunusu lwa Bafarisi na mu lwa Erode.» 16Bayiki bakoto mu kwetsima bo na bo, bukuri baba bahele na mampa. 17Yesu, bu kabakula bitsimi bya bo, wabaleele ti: «Buri luri mu kwetsima ti lwahele na mampa? Beenu lwakiri kubakula pe, na lwakiri kumono pe? Beenu mitima myakuba? 18Beenu miisu luri na myo, kasi lwahele kumono? Beenu makutu luri na mo, kasi lwahele kuyuka? Beenu lubaambu lwo pe? 19Ha nyabee bukuna me mampa mataanu, mu kudiisila mafuunda mataanu ma babakala, mampiri makwe maluula mu bitsuri bya mampa lwatoriri?» Bo babvutula kuri nde ti: «Kuumi na moolo.» 20«Heki ha nyabee diisila me mafuunda mana ma babakala mu mampa nsaamu, mampiri ma bitsuri bya mampa, masaariri makwe lwatoriri?» Bo babvutula [kuri nde] ti: «Nsaamu.» 21Yesu wabaleele ti: «Beenu lwakiri kubakula pe?»

Yesu watsinikisa muutu wafwa miisu

22Bo bayende ku Betesayida. Baatu batwaala muutu wafwa miisu kuri Yesu, na bamuyingukila mpisi kamubelemene. 23Yesu waholo wafwa miisu mu kooko, na wamunata bu mbisa bula. Yesu wamufulula mante mu miisu, wamutetekele myooko na wamufuula ti: «Nki wuri mu kumono?» 24Mubeeru wadzibula miisu, waleele ti: «Me nyiri mu kumono baatu, ngo kubamono bunu miti miri mu kweyende.» 25Yesu wabweese kumubelemene mu miisu, na nde wamono na kensekelee, watsiinika na wamono kuri wukwesobokoso byobinso. 26Yesu wamusindika ku nzo yaandi, wamuleele ti: «Yaa koto kunsa bula ko.»

Petelo waleele ti Yesu ngo Kiristo

(Mat 16.13-20; Luk 9.18-21)

27Yesu wayende na bayiki baandi ku mabula ma nkoonsi ya Kayisareya dya Filipo. Bu baba mu nzila, Yesu wafuula bayiki baandi ti: «Baatu nki bari mu kweleele, ti me na nyiri?» 28Bo babvutula baleele kuri nde [ti]: «Yowane Mubotiki, bakaka ti Eliya, bakaka ti mosi mu babikiri.» 29Yesu wabafuula ti: «Heki beenu buri luleeriri, ti me na nyiri?» Petelo wabvutula kuri nde ti: «Ye ngo Kiristo.» 30Yesu wabaŋaŋina mpisi bahele kuyaabisa kuri muutu ti mosi mya mu nde.

Yesu wuyaabisa lufwa na mfulukulu yaandi

(Mat 16.21-28; Luk 9.22-27)

31Yesu wabaandika mu kubayikisa ti: «Mwaana muutu yelemini kumono mpasi dzalaka; bakulu ba babakala, bakuutu ba bangaanga-nzaambi na batini ba mangisi sa bamuyekele, na kumudzusa; na ha mambisa ma biluumbu bitatu, tumi kafuluka.» 32Nde wadzoonso mimyo mu nsiitu. Petelo kamunataa ha lumperi, baandikiri kumuŋaŋina. 33Yesu kasyeetekaana, mwiini bayiki baandi, ha kaŋaŋina Petelo na kumuleele ti: «Satana, ba ku mambisa ma me, bukuri ma wutsima ye mari ma Nzaambi ko, ngo ma baatu.»

34Yesu kateelaa mpuumbu baatu ha kimosi na bayiki baandi, wabaleele ti: «Mbuti muutu tiiri kunama me ku mambisa, lo katuna nyutu ya nde-meene, kanaanguna kuruwa dyaandi, na kanama me. 35Mukwongo, wunde wutiiri kubvuukisa kidziingu kyaandi, lo sa kakidziimbisa; ngo kasi wunde wudziimbisa kidziingu kyaandi mu ntoono me, na mu ntoono Musamu Wamubwete, lo sa kakibvuukisa. 36Nkya ndaandu yiri na muutu mu kubaka nsi yansiina, ngo fuukisiri kidziingu kyaandi? 37Nki muutu, katsiitsa kuha mu kuyiingisa kidziingu kyaandi? 38Mukwongo, wunde wuba na nsoni mu me, na mu maampu maami, mu kiseendu kimaki, kya kimpala na kya masumu, lo Mwaana muutu se, ha kakwiisa nde na bambasi bangisi mu nkeembu Taayi dyaandi, sa kamumwiina nsoni.»

Musamu Wamubwete

©2013 Bible Society of the Republic of Congo

More Info | Version Index