Search form

Mal int

Nkotulu

Mukaanda wa Malako bvuriri bukufi, na kampe bvuriri bukulu mu mikaanda myomina, midzoonsolo mu kidziingu na mu Musamu Wamubwete wa Yesu Kiristo.

Kunu mbandukulu, Malako wusoongo ti «Yesu ngo Mwaana» Nzaambi (1.1). Bubwo bumonoko munsa mukaanda ndemunso (1.11; 9.7; kutala se mu 3.11; 5.7); kasi Yesu wahele kutya ti diba dyayabakana (3.12; 5.43; 7.24; 8.30; 9.30). Mu nki ntoono Yesu kabisa kuyabakana mu nkuumbu ya Mwaana Nzaambi? Bukuri kinzeri kyaandi, sa kyayabakana kunsa mpaanu dza mpasi, lufwa lwaandi, na mfulukulu yaandi.

Kisalu kya Yowane Mubotiki, wabotokiri Yesu (1.9-11), kyaba mu kuyirika nzila Yesu mpisi muutu-muutu kayirima mu kumubwaana (1.2-8).

Ha mambisa ma nsindukulu ku nsi yankatu (1.12-13), Yesu wabaandika kisalu kyaandi ha busu bwa baatu bobanso. Mu kitsuri kyatete kya mukaanda waandi, Malako wusoongo lutumu lwa Yesu lwamonoko mu nteelulu baatu mbila ya kumunama, ha mambisa ma nyikusulu mpuumbu baatu, bunu pe ma nsinukusu ya babeeru (1.14-8.30).

Mu kitsuri kyabyoolo kya mukaanda waandi, Malako wudzoonsolo mu mpasi na manyoongi ma Yesu, mu lufwa na mfulukulu yaandi biyirima ku Yerusalemi (8.31–10.52). Mbala tatu, Yesu wadzoonsolo kuri bayiki baandi mu misamu mimyo, na wuri mu kuholo nkuumbu ya Mwaana muutu, mu kudzoonsolo mu nde-meene, ngo kasi bo bahele kubakula.

Ku Yerusalemi, ku bamubwaana mu munkeembu, nde wabinga baba yarikaa mu Nzo-nzaambi, wabwanikina na nwanusunu dza bakuutu ba dibuundu dya Isaheli. Yiyo yaba mpwaani kuri nde mu kuha nyikusulu dza mpotulu kuri bataatu baandi, kuri mpuumbu na bayiki baandi (kik. 11–13).

Mu bikabu bya 14–15, Malako wadzoonsolo mu biluumbu byoolo bya mpotulu bya Yesu. Mu bikabu bibyo nde kari mu kuyaabisa musamu wa ndiilu ya mpotulu ya Yesu na bayiki baandi, lusaambulu lwa nde-kaka ku Ngetesemane, nkaangulu yaandi, nzeengulu mukanu wa lufwa, nzusulu yaandi ha yulu kuruwa, na nziikulu yaandi mu mampeembe. Biluumbu byoolo mu kyabitatu, bakyeetu bayende ku mampeembe, ngo bahele kumono nyutu, bayuka ti wafuluka mu bafwa, na wuri mwooyo (16.1-8), babvutuka kunsa boomo bwobunso. Tumi Yesu wamonokono kuri bayiki baandi, mu munokunu dza bitsuumbu-bitsuumbu.

Musamu Wamubwete

©2013 Bible Society of the Republic of Congo

More Info | Version Index