Search form

Mat 16

Bafarisi na basaduki basaka kidiimbu

(Mal 8.11-13; Luk 12.54-56)

1Bafarisi na Basaduki mu kutsiitsa Yesu, bakokosolo kuri nde, na bamuloombo kabasoongo kidiimbu kya ku yulu. 2Yesu wabvutula kuri bo ti: «[Nsinsika bu yitubukaa, beenu luleelaa ti: "Ntaangu yayibwe, bukuri yulu dyabeenge." 3Na mu kipari, luleelaa ti: "Lolo kuri mvula, bukuri yulu dyabeenge na diri mampimbisi." Hahamosi, beenu luyaabaa kusobokoso kinzeri kya yulu; ngo hakaka, beenu lwahele kubangisina kusobokoso bidiimbu bya mantaangu.] 4Kiseendu kyakibi na kya kimpala, kiri mu kusaka kidiimbu. Kuri kidiimbu ki babaha ko, mbuti ka kya Yona ko.» Na nde kabasisaana weensi.

Lufunusu lwa Bafarisi na Basaduki

(Mal 8.14-21)

5Bayiki ba Yesu bu basabuka ku simu dyakaka, badzimukina kuholo mampa. 6Yesu waleele kuri bo ti: «Talee na seenee madyeele mu lufunusu lwa Bafarisi na Basaduki.» 7Bo babeke mu kwetsima bo-meene na baleele: «Ti kampe bukuri beetu tusii holaa mampa ko.» 8Bu kayaaba bubwo, Yesu waleele ti: «Baatu bangaa-kanyi dyantele, buri luri mu kwetsima mu beenu-meene ti lwahele na mampa? 9Beenu lwakiri kubakula pe, lwahele kubaambuka mwooyo mu mampa mataanu mu mafuunda mataanu, heki mitooto mikwe beenu luri lwatolo? 10Ti mu mampa nsaamu mu mafuunda mana heki mampiri makwe beenu luri lwatolo? 11Dyaburi beenu luri kubakula pe ti me nsii kuludzoonsolo ko mu mitariri mampa? Seenee madyeele mu lufunusu lwa Bafarisi na Basaduki.» 12Haho, bo babakuri ti, Yesu kari mu lufunusu lwa mampa kaba baleele ko ti se madyeele, ngo mu nyikusulu dza Bafarisi na Basaduki.

Petelo waleele ti Yesu ngo Kiristo

(Mal 8.27-30; Luk 9.18-21)

13Yesu bu kaba mu kweende ku nkoonsi ya Kayisareya ya Filipo, wafuula bayiki baandi ti: «Baatu nki bari mu kweleele, ti Mwaana muutu na kari?» 14Bamaba baleele ti: «Babamosi Yowane Mubotiki; bakaka ti, Eliya; bakimi ti, Yelemiya, bunu pe mosi mu babikiri.» 15Yesu waleele kuri bo: «Heki beenu, buri luri luleeriri, ti me na n yiri?» 16Simoni Petelo wabvutula, waleele ti: «Ye ngo Kiristo, Mwaana wa Nzaambi ya mwooyo.» 17Yesu wabweese kuleele kuri nde ti: «Ye wuri mu kiminu, Simoni mwaana Bariyoona; kari muswinyi na makila ko bikuyaabisiri dyo; ngo Taayi dyaami diri mu mayulu wukuyaabisiri dyo. 18Na me ndeeriri ku wuri yeenu: Ye ngo Petelo, mbangukulu ti tari; na ha yulu tari didyo me sa nyatuunga dibuundu dyaami. Mpinu dza lufwa ka dzibvula makwa na dyo ko. 19Me sa nyikuha mafungula ma Kimfumu kya mayulu. Ma wukaanga ye ha butoto, sa maba makaangu ku mayulu. Na mamo ma wunyanguna ye ha butoto, sa maba manyangunu ku mayulu.» 20Hanaho, Yesu wadika bayiki baandi, ti yaa baleele kuri muutu ti mosi ko, ti nde ngo Kiristo.

Yesu wayaabisa lufwa na mfulukulu yaandi

(Mal 8.31–9.1; Luk 9.22-27)

21Kuholosono ntaangu yiyo, Yesu wabaandika mu kweyaabisa kuri bayiki baandi ti, nde yelemini kutoomboko ku Yerusalemi, na kumono mpasi dzalaka mu myooko mya bakulu ba babakala, bakuutu ba bangaanga-nzaambi na batini ba mangisi, yelemini kuba wadzusu, na mu kiluumbu kyabitatu, yelemini kuba wafuluka. 22Petelo kamunataa ku lumperi, bandukiri kumuŋaŋina, waleele ti: «Nzaambi kakukebe Mfumu! Pele! Mimyo miri nyirimina mu ye ko!» 23Yesu bu kasyeeteke, waleele kuri Petelo ti: «Satana, ba ku mambisa ma me. Ye wubumisa me makya, bukuri ma wutsima ye mari ma Nzaambi ko, ngo ma baatu».

24Hanaho, Yesu waleele kuri bayiki baandi ti: «Mbuti muutu tiiri kunama me ha mambisa, lo hemese katuna nyutu ya nde-meene, kanata kuruwa dyaandi na kanama me. 25Mukwongo, mpisi wunde wutiiri kubvuukisa kidziingu kyaandi, lo sa kakidziimbisa; ngo kasi wunde wudziimbisa kidziingu kyaandi mu ntoono ya me, lo sa kakidzuukila. 26Nkya ndaandu yiri na muutu, mbuti bakiri nsi yansiina, ngo fuukisiri kidziingu kyaandi? Bunu pe, nki muutu katsiitsa kuha mu kuyiingisa kidziingu kyaandi? 27Mukwongo, Mwaana muutu weki mu kwiisa mu munkeembu wa taayi dyaandi, kintwaari na bambasi baandi; haho, nde kabvutula kuri muutu-muutu, bunu buri biyiriki byaandi. 28Mu ngwanwa me nyiluleeriri ti: Babamosi mu bateleme hamaha, bafwa ko, natee bakiri mono Mwaana muutu wiisiri mu Kimfumu kyaandi.»

Musamu Wamubwete

©2013 Bible Society of the Republic of Congo

More Info | Version Index