Search form

Mat 22

Nkuma ya munkeembu wa makweele

(Luk 14.15-24)

1Yesu bu kaba mu kubvutula, wadzoonso mu mankuma makimi kuri bo, waleele ti: 2«Kimfumu kya mayulu kyafwanikina bunu mbyaasi mosi wayirika munkeembu makweele ma mwaana waandi. 3Nde waheeke bisari byaandi mu kweteele babateeriri mu kwiisa kudya ku munkeembu; ngo bo basii tya kwiisa ko. 4Wabweese kuheke bisari bikimi mu kuleele ti: "Leele kuri babo babateerirye ti: Munkeembu wa ndiilu weki wayirima, bamwaadzusa bangoombo na bibulu byabinene. Byobinso byeki byayirima, wasee ku munkeembu!" 5Ngo babo babateeriri mbila banyaafuna mbila na bayende kwaaku, wamosi ku nseke yaandi; wakaka ku mumbungu waandi kusala. 6Bakaka basiiri babo, bakwaata bisari bya mbyaasi babatuka na babadzusa. 7Mbyaasi wabaka nkesi. Nde waheeke bayongolo baandi mu kweedzusa baatu babo, na wayoko bvula dya bo. 8Hanaho, waleele kuri bisari byaandi ti: "Munkeembu weki wayirima, ngo kasi babateerirye bahele kuba basoongolo. 9Yende mu mahaambu ma manzila, bobanso balumono, bateele ku munkeembu." 10Bisari byapala na bayende mu manzila, bakutikisa bobanso babamwiini, babatsiina na babeeru. Munkeembu waluula mu baatu bayisiri. 11Mbyaasi wakoto mu kwetala bari ha munkeembu na wamono muutu mosi waba wahele na kinkuta kya munkeembu. 12Wamufuula ti: "Nduku yaami, buri siiri mu kukoto hamaha, kuri ye wahele na kinkuta kya munkeembu?" Muutu wunde wakaanga munwa! 13Hanaho, mbyaasi waleele kuri bisari byaandi ti: "Mukaangee miilu na myooko, na mutubee ku mampimbisi ma ku mbasi, kukwo kuba bidilu na nkweetulu miinu." 14Mukwongo, balaka bari bateelu, ngo banteele basoolu.»

Mpaku yi bafutaa kuri Kayisari

(Mal 12.13-17; Luk 20.20-26)

15Hanaho, Bafarisi bu bayende ku mfuunda, bakaanga bitsima, kya kumutekele mweete, mpisi bamubaka mu nzoonsulu. 16Bo baheeke bayiki ba bo, kintwaari na baatu ba Erode kuri nde, baleele ti: «Muyikisi, beetu tuyaari ti ye ngaa-ngwanwa, na ye wuri mu kweyikisa nzila ya Nzaambi mu ngwanwa; ye wabataa muutu ko; bukuri ye wamonaa kinzeri kya baatu ko, 17ngo leele beetu, kitsimi kya ye buri kiri: Buri kuri na miswa mu kufuta mpaku kuri Kayisari hoti pele?» 18Ngo Yesu bu kaba kayaari mutima-bubi wa bo, wabaleele ti: «Bangaa-bumpitu-bumpyoongo, buri lutekele me mweete? 19Soongee mbeti me mupata wa mpaku.» Bo bamusoongo kidenali kimosi. 20Nde wafuula kuri bo ti: «Kidzisi ki na bisoni bi bya na?» 21Bo babvutula kuri nde ti: «Bya Kayisari», haho nde kaleele kuri bo ti: «Hango, bvutulee bya Kayisari, kuri Kayisari, bya Nzaambi kuri Nzaambi.» 22Bu bayuka, bakimuka, na bu bamusisa bayende.

Kifuuri mu ntoono mfulukulu ya bafwa

(Mal 12.18-27; Luk 20.27-40)

23Mu kiluumbu kikyo, Basaduki bamonokono kuri nde, baleele ti, mfulukulu ya bafwa yiri ko, bamufuula, 24bamuleele ti: «Muyikisi, Moose waleele ti: "Mbuti muutu fwiiri kwahele baala, lo mpaangi yaandi kukondolo mufwiiri nde mu kumubutila baala." 25Ngo ku bula beetu kwaba bampaangi nsaamu; watete kakweelaana fwiiri kwahele baala, na sisiri mufwiiri waandi kuri mpaangi yaandi. 26Bwobumosi mu waboolo, na mu wabatatu natee wansaamu. 27Ha mambisa ma bobanso, mukyeetu wafwa. 28Heki, mbasi-tsuku haba mfulukulu, mukasi na kaba mu bo nsaamu? Bukuri bobanso bamubakiri.» 29Yesu wabvutula, waleele kuri bo ti: «Beenu lwawumuka bukuri lwahele kuyaaba Matinu na mpinu dza Nzaambi. 30Mukwongo, mbasi-tsuku haba mfulukulu, kuba babakala bakweele ko, na bakyeetu babakweelese ko. Ngo sa baba bunu bambasi, mu mayulu. 31Ngo mu ntoono ya mfulukulu ya bafwa, beenu lwasii taanga ma leele Nzaambi kuri beenu ko? Waleele ti: 32"Me ngo Nzaambi ya Abalaami, Nzaambi ya Isaki na Nzaambi ya Yakobe." Nde kari Nzaambi ya bafwa ko, ngo kasi Nzaambi ya baatu bamwooyo.» 33Mampuumbu bu mayuka, makimuka mu nyikusulu dzaandi.

Ngisi yibvuriri bunene

(Mal 12.28-34; Luk 10.25-28)

34Bafarisi bu bayuka ti Yesu kaangisiryeenu Basaduki minwa, bakutukina ha kibeendu kinikyo. 35[Mutini] mangisi mosi mu bo, wamutekele mweete: 36«Muyikisi, nkya lutumu lubvuriri bunene mu Mangisi?» 37Yesu wamuleele ti: «"Tya Mfumu Nzaambi yaaku mu mutima waaku ndemunso, mu muheebulu waaku ndemunso na mu dyeele dyaaku dyodinso." 38Lulwo ngo lutumu lubvuriri bunene na lwatete. 39Lwadzoolo lwafwanikina na lulwo ngo lumalu: "Tya mbaasi yaaku bunu ye-meene." 40Mangisi momanso na babikiri byakaangama mu ntumu dzodzoolo dzidzo.»

Kiristo na Davidi

(Mal 12.35-37; Luk 20.41-44)

41Bafarisi bu baba bakutukina, Yesu wabafuula, 42waleele ti: «Kitsimi kya beenu buri kiri mu ntoono ya Kiristo? Nde mwaana na kari?» Bo babvutula kuri nde ti: «Wa Davidi.» 43Nde waleele kuri bo ti: «Ngo dyaburi, mu Mpeeve Davidi wumuteele "Mfumu"? Na wuleele ti:

44"Mfumu wuleele kuri Mfumu yaami ti:

Dzakala ha lubakala lwaami,

natee ku nyisuusa me bataatu baaku kunsa bitaambi byaaku!"

45Hango, mbuti Davidi wumuteele ti "Mfumu", lo dyaburi nde kabweese kuba mwaana Davidi?» 46Muutu ti mosi, kasii bangusina kumuleele ntoono ti mosi ko, mu kumuha mvutu. Kuholosono kiluumbu kikyo, kuri muutu waba bweese kutsiitsa kumuha kifuuri ko.

Musamu Wamubwete

©2013 Bible Society of the Republic of Congo

More Info | Version Index