Search form

Mat 3

Nyikusulu ya Yowane Mubotiki

(Mal 1.1-8; Luk 3.1-18; Yow 1.19-28)

1Mu biluumbu bibyo, Yowane Mubotiki wamonoko mu nsi yankatu ya Yudaya, mu kwebikisa 2[na] kweleele ti: «Yiingee madyeele, bukuri Kimfumu kya mayulu kikokisiri.» 3Mu nde, Esaya mubikiri kaba dzoonsolaana ha kaba leele ti:

«Mbeembu ya wunde wukwebikisa mu nsi yankatu ti:

Yirikeenu munsaku Mfumu,

suungukeenu manzila maandi!»

4Nde, Yowane, waba na kinkuta kya myoosi mya kamelo, na musweele wa mukaanda kibulu mu luketu lwaandi. Nde waba kwedya bambambala na maasi ma nyosi ya ku bitiiti. 5Bari Yerusalemi bobanso, bari Yudaya, na bari mu nkoonsi yoyinso ya Yorodani, baba kweendaa kuri nde, 6na nde waba babotokaana mu nyari ya Yorodani mu ntambukulu masumu maaku.

7Bu kamono Bafarisi balaka na Basaduki baba kwiisaana mu kuri ti nde kababotoko, wabaleele ti: «Kitsuumbu kya bampiri, na walusoongiri bwa kuyitikila nkesi dziri mu kwiisa? 8Soongeenu biyiriki byayelemene na nyiingulu madyeele, 9na yaa lubeke kweleele mu beenu-meene ko ti: "Taayi dya beetu Abalaami." Bukuri me nyiluleele ti: mu matari ma lo Nzaambi telemisi baala kuri Abalaami! 10Kikuba kyeki kyasuusa ha yulu myaansi mya muti; ngo mpisi muti wahele kubuta bimbutu byabibwete, lo wa kutabala na wa kutuba ku mbaawu. 11Me nyilubotoko mu maampa mu ntoono nyiingulu madyeele; ngo wunde wukwiisa ku mambisa ma me, bvuriri makwa na me, me nyahele kukuka mu kusyonono masapaatu ma nde. Nde sa kalubotoko mu Mpeeve Yangisi na mu mbaawu. 12Nde wuri na kiyengese mu kooko kwaandi, sa kakoombolo mbasi yaandi, sa kakutukisa mankono maandi ku yulu talaka, ngo sa kayoko bitiiti ku mbaawu yiri yadzimaa ko.»

Mbotokulu Yesu

(Mal 1.9-11; Luk 3.21-22)

13Yesu kafumuna ku Ngalili, wiisiri ku Yorodani kuri Yowane, mpisi Yowane kamubotoko. 14Kasi Yowane wamutungukula, wamuleele ti: «Me nyiri na nzala kutaambula mbotokulu kuri ye; kasi ye ngo weki kwiisa kuri me?» 15Yesu wabvutula, waleele kuri nde ti: «Hemese mu lumalu; bukuri bubwo bwayelemene kuri beetu na ye mu kukukisa nsungumunu yoyinso.» Haho, Yowane wataambula. 16Yesu na kumubotoko na kutoomboko ku nkoto; na mono, mayulu madzibuma [mu ntoono ya nde], na nde wamono Mpeeve ya Nzaambi yakulumuka, bunu beembe [na] yayisa ha yulu nde. 17Na mono, mbeembu ya nangukina ku mayulu yaleele ti: «Wumawu ngo mwaana waami wa mutima; mu nde me nyimonaa kiminu.»

Musamu Wamubwete

©2013 Bible Society of the Republic of Congo

More Info | Version Index