Search form

Lom 10

1Bampaangi, ma nyitiisila me kunsa mutima waami, na mu lusaambulu lwaami kuri Nzaambi mu bo, kuri ti baba babvuukusu. 2Mukwongo, me nyita kimbaangi mu bo ti bari na kuheme mu Nzaambi, ngo kasi bahele na nyaabulu. 3Mukwongo, babaanaa bahele kuyaaba nsungumunu ya Nzaambi, na bakwesaka kusalila nsungumunu ya bo-meene, lo bahele kuba batumuma mu nsungumunu ya Nzaambi. 4Bukuri Kiristo ngo nsukulu ya mangisi, mu ntoono nsungumunu, ya mpisi wunde wusa kanyi.

Mvuukulu yiri kuri mpisi wunde wusa kanyi mu Mfumu

5Mukwongo, Moose watina mu mitariri nsungumunu ya mangisi ti: «Muutu wumasalila, sa kaba wamwooyo mu mo.» 6Ngo kasi, nsungumunu mu kanyi yiri mu kuleele bumabu: «Yaa leele mu mutima waaku ko ti: Na wunde wunwaata ku yulu?» Mbangukulu lo ti: mu kusundula Kiristo. 7Bunu pe ti: «Na wusunduka ku nsi ya bafwa?» Mbangukulu lo ti: mu kutoombolo Kiristo mu bafwa. 8Ngo nki diri mu kuleele? «Maampu mari bebele na ye, mari munsa munwa waaku, na munsa mutima waaku.» Mamo ngo maampu ma kanyi ma turi mu kweyaabisa. 9Mbuti ye leeriri mu munwa waaku ti Yesu ngo Mfumu, na siiriri kanyi mu mutima waaku, ti Nzaambi wamufulukisa mu bafwa, lo ye sa bvuuka. 10Mukwongo, mu mutima bakoosiilaa kanyi mu kubaka nsungumunu, na mu munwa bakootambukilaa mu kubaka mvuukulu. 11Mukwongo, Matinu maleele ti: «Mpisi wunde wusiila kanyi mu nde, lo kafwa nsoni ko.» 12Mukwongo, kwahele nsobokoso ha kakati dya Muyudayo na Muhelene. Bukuri bobanso Mfumu mosi, wuri kisina kuri bobanso bakoomuteelaa mbila. 13Mukwongo: «Mpisi wunde wuteele nkuumbu ya mfumu, lo sa kaba kabvuuka.»

14Ngo dyaburi bateelele wunde wuri bahele kumusiila kanyi? Dyaburi basiila kanyi mu wunde wuri bahele kuyuka badzoonsolo mu nde? Dyaburi bayukila, mbuti kwahele wuyaabisa? 15Na buri bayabisila, mbuti bahele kubaheeke? Bunu bu diri dyatinu ti: «Miri myamibwete, miilu mya babo bakweyaabisa misamu myamibwete!» 16Ngo kasi, bobanso bahele kutumuma mu Musamu Wamubwete. Mukwongo, bunu buleele Esaya ti: «Mfumu, na wasiiriri kanyi mu ma kayukiri kuri beetu?» 17Hango, kanyi difumunaa mu mi bayukaa, mi bayukaa mu maampu ma Kiristo.

18Kasi me nyifuula ti: buri basii kuyuka ko? Heehe bayukiri kwaandi!

«Mbeembu bo yayukukuna mu nsi yansiina;

na maampu ma bo matubuka natee mwasukuna butoto.»

19Kasi me nyifuula ti: buri Isaheli wuri kasii bakula ko? Moose ngo watete mu kuleele ti:

«Me sa nyalusa bangaa-bukwa, mu babo bahele kuba kaanda;

me sa nyalubakisa nkesi, mu kaanda dyahele na nyukulu.»

20Esaya se wutsiitsa kuleele ti:

«Babo bari bahele kwesaka me, banzuukiri;

na me nyamonikini kuri babo bari bahele kwemfuula.»

21Ngo kuri Isaheli nde wuleele ti:

«Mpisi kiluumbu, me nyalaamburi myooko myaami,

kuri baatu bari na nko, na bari na tungu.»

Musamu Wamubwete

©2013 Bible Society of the Republic of Congo

More Info | Version Index