Search form

Lom 2

Nsundusulu yasuunguma ya Nzaambi

1Hango-nkuumbu, ye muutu, wuri mutsuundisi, wuri mbakila mpemisi ko bwooso ye beele; bukuri ye wubaanaa wutsuundisa mbaasi, lo nyutu ye-meene wuri mu kubwiisa, bukuri ma wutsuundisila mbaasi, ye-meene se manamo wuri mu kuyirika. 2Tuyaari ti nsundusulu ya Nzaambi yilutilaa bunu buri ngwanwa, kuri babo bayirikaa mya bubwo. 3Ye muutu, wuri mutsuundisi bakweyirika mya bubwo, na ye-meene se wukwemiyirika; buri ye butsimini ti ye ngo wuri sa bvuuka mu nsundusulu ya Nzaambi? 4Hoti busina bwa mbweeyulu-mutima waandi, nkuundulu na nkindusulu-mutima waandi, ye wuri mu kunyaafuna, mu kuhele kuyaaba ti mbweeyulu-mutima ya Nzaambi, yinataa ye ku nyiingulu madyeele? 5Ngo mu bunkuri bwaaku na nkubusulu mutima waaku, ye wukwekutukisa nkesi dzibwa mu ye, mu kiluumbu kya nkesi, na kya nyabusulu nsundusulu yasuunguma ya Nzaambi, 6nde mbasi-tsuku wubvutula kuri mpisi muutu bunu buri biyiriki byaandi. 7Sa kaha kidziingu kyahele manunu kuri babamosi, bakwesaka mu kifiki kunsa kisalu kyaandi, nkeembu, lukiinsu na kiteesu kyahele mbolulu. 8Sa kasoongo nkesi na kabala kuri bakaka, mu ntoono tungu na bukuri bahele kutumuma kuri ngwanwa, kasi batumuma mu mya bubayi. 9Manyoongi na kinkuukulu kuri mpisi muutu wukweyirika mamabi, dyatete kuri Muyudayo tumi kuri Muhelene. 10Ngo kasi nkeembu, lukiinsu na kiyeengi kuri bakweyirika mamabwe, dyatete kuri Muyudayo tumi kuri Muhelene; 11bukuri Nzaambi wahele na bubayi.

12Mukwongo, bobanso bayirikiri masumu kwahele mangisi, sa bafuuka se kwahele mangisi; na bobanso bayirikiri masumu kunsa mangisi, sa baba batsuundusu mu mangisi. 13Bukuri kari bayukaa mangisi basuunguma ha busu bwa Nzaambi ko, ngo kasi basalilaa mangisi sa baba balulukusu. 14Mukwongo, mbuti bangooyi bahele na mangisi, bakwesalila mangisi bunubwo, bo bu bahele na mangisi, bo-meene ngo mangisi. 15Bo basoongaa kuri ti, biyiriki bya mangisi byatinima mu mitima mya bo, nsimunu bo yita kimbaangi, mu bo na bo bitsimi bikwebafuunda bunu pe bikwebakalila. 16Bubwo buba, mu kiluumbu ki tsuundisa Nzaambi mu Kiristo Yesu, mansweeki ma baatu, bunu buri Musamu waami Wamubwete.

Bayudayo na mangisi

17Ye wuri na nkuumbu ya Muyudayo, wasa nsiitu mu mangisi, na wuri na kimweese mu Nzaambi yaaku. 18Ye yaari kutya kwaandi, wusaanaa nsobokoso mu mari mufunu, wayikusu mu mangisi. 19Ye yirikiri kuyaaba ti ye wuri munati bafwa miisu, buungi bwa bari ku mampimbisi, 20muyikisi baatu bahele na nyaabulu, muyikisi mwaa-baala, wunde wuri na dyeele dya kuba na nyaabulu, na dya kuba na ngwanwa mu mangisi. 21Ngo habaanaa ye ngo wukweyikisa bambaasi, dyaburi wuri ye-meene kuyikisa pe? Ye wukweyikisa ti kuyiba pe, buri ye-meene wukweyiba? 22Ye wukweleele ti kimpala kusa pe, buri ye-meene wukwesa kimpala? Ye wumonaa kinkeni mu biteki, buri wuri mu kweyiba mu manzo ma Nzaambi? 23Ye wukwesa kimweese mu mangisi, buri wuri mu kwesaana Nzaambi mu kwesinina mangisi? 24Mukwongo, diri dyatinu ti: «Mu ntoono beenu, makaanda makwesaana nkuumbu Nzaambi.»

25Mukwongo, nteendulu bubakala yiri ndaandu mbuti ye wusalilaa mangisi; ngo mbuti ye wuri musinini mangisi, lo nteendulu bubakala bwa ye yampya. 26Ngo mbuti muutu wahele kuteende bubakala, wubvuminaa mangisi, buri lo mpelulu nteendulu bubakala bwa nde, yahele kumonokono bunu nteendulu bubakala? 27Muutu wahele kuteende bubakala mu muswinyi, ngo wusalilaa mangisi, sa katsuundisa ye wuri na mukaanda mangisi, na wateende bubakala, ngo wuri musinini mangisi. 28Mukwongo, Muyudayo kari wunde wubamonaa mu miisu ko, na nteendulu bubakala kari yibamonaa mu muswinyi ko, 29ngo Muyudayo, wa mansweeki; na nteendulu bubakala, ya mutima mu Mpeeve, nkani ka ya mu mukaanda ko. Wa bubwo wutaambula ndumusu ya Nzaambi nkani ka ya baatu ko.

Musamu Wamubwete

©2013 Bible Society of the Republic of Congo

More Info | Version Index