Search form

Lom 6

Kufwa na kuba mwooyo kintwaari na Kiristo

1Ngo nki tuleele? Mu masumu tunamitinee kweetu, mpisi heki bweese bubuukila? 2Ti bele na dyo pe! Beetuneenu bari twafwa mu masumu, buri tubweese kubeele bamwooyo mu masumu? 3Hoti beenu lwahele kuyaaba, ti beetu-banso twabotikiri mu Kiristo Yesu, mu lufwa lwaandi turi twataambula mbotokulu? 4Ngo beetu batudziika kintwaari na nde, mu mbotokulu mu lufwa, mpisi heki bunu bwafulukiri Kiristo mu bafwa, mu nkeembu ya Taayi, bunubwo se beetu, twedyaatila mu kidziingu kyamoono.

5Mukwongo, mbuti beetu twayeki muutu mosi na nde, mu lufwa lwafwanikina na lwa nde, lo sa twaba kintwaari na nde se mu mfulukulu. 6Bu tuyaari kuri ti, muutu weetu wamukulu bayeki bamukomono kintwaari na nde, mpisi heki nyutu ya masumu yiba yatsyaamunu, na tuhele kubweese kuba bankutu ba masumu. 7Bukuri, wunde wumwaafwa, lo walulukusu kwakinkulu mu masumu. 8Mbuti twafwa kintwaari na Kiristo, lo twasa kanyi ti sa twaba mwooyo kintwaari na nde. 9Bu tuyaari kuri ti Kiristo wafulukiri mu bafwa, kabweese kufwa ko, lufwa ka lubweese kuba na lutumu mu nde ko. 10Bukuri, wunde wafwiiri, wafwiiri lwolumosi mu ntoono masumu ngo wunde wuri mwooyo, wuri mwooyo mu ntoono Nzaambi. 11Mu didyo, beenu se, beeneenu bunu lwafwa mu masumu beenu-meene, na bunu luri mwooyo mu Kiristo Yesu, mu ntoono Nzaambi.

12Ngo yaa lutala ko ti, masumu maba na lutumu mu nyutu yeenu ya mfwiilu, mpisi luhele kutumuma mu nyiimunu dza nyutu. 13Yaa lusalila binamu byeenu, bunu bisalulu bya bubayi mu kuyirika masumu ko. Ngo kasi beenu-meene salileenu Nzaambi, bunu baatu bamwooyo bafulukusu mu bafwa, na salileenu binamu byeenu, bunu binwaanunu bya nsungumunu mu kusalila Nzaambi. 14Mukwongo, masumu ka mabweese kuba na lutumu mu beenu ko, bukuri beenu lwahele mu lutumu lwa mangisi, ngo luri mu lutumu lwa bweese.

Kusalila nsungumunu

15Hango nki? Masumu tukweyirikee kweetu, bukuri twahele mu lutumu lwa mangisi, ngo turi mu lutumu lwa bweese? Ti bele na dyo! 16Buri beenu lwahele kuyaaba ti, lutaambukila kusalila muutu bunu bankutu, lo lweki bankutu ba wunde wu luri mu kutambukila, bankutu ba masumu mu kweende ku lufwa, bunu pe bankutu ba bintambukulu mu kweende ku nsungumunu? 17Matoondo kuri Nzaambi, bukuri beenu lwaba bankutu ba masumu, ngo kasi lumwaataambukila mu mutima ndemunso, kiteesu kya nyikusulu dzi bari baluha. 18Bu balukuula mu masumu, lwayeki bankutu ba nsungumunu. 19Mu kimuutu me nyiri mu kudzoonsolo, mu ntoono ya muswinyi wahele na makwa. Bunu bu lwasariri binamu byeenu bunu bankutu kuri nsumukunu na kuri bubi, mu ntoono mamabi, bunubwo se mu lumalu, salileenu binamu byeenu bunu bankutu kuri nsungumunu, mu ntoono bungisi.

20Mukwongo, mu ntaangu yi lwaba bankutu ba masumu, lwaba na bunsaalisi mu mitariri nsungumunu. 21Ngo nkya bimbutu luri na byo? Mu lumalu beenu lweki na nsoni mu byo, bukuri manunu ya byo lufwa. 22Ngo kasi mu lumalu, bu bamwaalukuula mu masumu, lweki bankutu ba Nzaambi, na luri na bimbutu mu mbakulu bungisi. Manunu ya byo, ngo kidziingu kyahele manunu. 23Mukwongo, mufutu masumu ngo lufwa; ngo kasi kikabu kya mungengi kya Nzaambi, ngo kidziingu kyahele manunu, mu Kiristo Yesu Mfumu yeetu.

Musamu Wamubwete

©2013 Bible Society of the Republic of Congo

More Info | Version Index