Search form

Lom 8

Kunata kidziingu bunu buri Mpeeve Nzaambi

1Ngo mu lumalu, kwasaala mbwiilu mu mutsuundu ko, kuri babo bari mu Kiristo Yesu. 2Bukuri, ngisi ya Mpeeve, ya bumwooyo mu Kiristo Yesu, yayeki yakuula me mu ngisi ya masumu na ya lufwa. 3Mukwongo, mangisi maketi kubangisina mimyo ko, bukuri maba mahele na makwa mu ntoono muswinyi. Ngo Nzaambi bu kaheeke Mwaana waandi, mu kifwa-fwani kya muutu ngaa-masumu, mu ntoono masumu, wabwiisa masumu mu nyutu ya muswinyi, 4mpisi heki nsungumunu mu mangisi, yiba yakukusu mu beetu, turi mu kwedyaatila mu Mpeeve nkani ka mu muswinyi ko. 5Mukwongo, babo bari mu muswinyi, bakwedyaatila bunu buri mi tiiri muswinyi; ngo kasi, babo bari mu Mpeeve, bakwedyaatila bunu buri mi tiiri Mpeeve. 6Ndyaatulu ya muswinyi yinataa ku lufwa, ngo kasi ndyaatulu ya Mpeeve yinataa ku bumwooyo na ku kiyeengi. 7Hango-nkuumbu, ndyaatulu ya muswinyi yiri kitaatu na Nzaambi, yahele kutumuma mu mangisi ma Nzaambi, na ka yitsiitsa kubangisina ko. 8Babo bari mu muswinyi ka batsiitsa kubweeye kuri Nzaambi ko.

9Beenu lwahele kuba mu muswinyi, ngo luri mu Mpeeve, mbuti heki Mpeeve Nzaambi yadzakala mu beenu. Mbuti muutu wahele na Mpeeve ya Kiristo, lo nde kari wa Kiristo ko. 10Mbuti Kiristo wuri mu beenu, lo nyutu yafwa mu ntoono masumu, ngo Mpeeve yiluha bumwooyo, mu ntoono nsungumunu. 11Mbuti Mpeeve ya wunde wafulukisi Yesu mu bafwa, yadzakala mu beenu, lo wunde wafulukisi Kiristo mu bafwa, sa kaha bumwooyo kuri manyutu meenu ma mfwiilu, mu Mpeeve yaandi yadzakala mu beenu.

12Mu didyo bampaangi, beetu turi na kibiimbu, ngo kari kuri muswinyi ko, mu kuri ti tuba bamwooyo mu muswinyi. 13Mukwongo, mbuti luri bamwooyo mu muswinyi, lo sa lwafwa; ngo kasi, mbuti mu Mpeeve, lo ludzusiri biyiriki bya kimuutu, na sa lwaba bamwooyo. 14Mukwongo, bobanso batwaalusu mu Mpeeve Nzaambi, babo ngo baala ba Nzaambi. 15Bukuri beenu lwahele kutaambula mpeeve ya bunkutu, mu kuri ti lubweese kuba na boomo: ngo kasi beenu lwataambula Mpeeve, yisa kuri ti luba baala ba Nzaambi, mu yo beetu tukoobikisaa ti: «Aba, Taata!» 16Mpeeve yo-meene, yita kimbaangi kuri kiluunsi kyeetu, ti beetu turi baala ba Nzaambi. 17Mbuti turi baala, lo turi se bakondiri ba saala: bakondiri ba saala dya Nzaambi, bakondiri kintwaari na Kiristo, mbuti heki tubamaa na nde, mpisi heki tuba se bakeembese na nde.

Nkeembu yiri mu kwiisa

18Me nyitsima ti, mpasi dza lumalu dzahele kuyelemene, na nkeembu mbasi-tsuku wuba wayabakana kuri beetu. 19Mukwongo, nsi yoyinso yiri mu kwekiingila mu kinsukulu-mutima, ntaangu mbasi-tsuku, yi yabakana baala ba Nzaambi. 20Bukuri, nsi yoyinso yayeki kunsa lutumu lwa mimyo myahele mufunu, kari mu ntiilu ya yo-meene ko, ngo mu ntoono wunde wayituma, mu nsiitu 21yiri ti, nsi yo-meene se, sa yaba yakuuluka mu bunkutu bwa mbiiyulu, mu kutaambula bunsaalisi bwa nkeembu ya baala ba Nzaambi. 22Mukwongo, beetu tuyaari ti nsi yoyinso yiri mu kwekuuma, na kwenyonyomoko mu misoongo mya mbutulu, natee mu lumalu. 23Kari yini nsi yo yikaka ko, ngo na beetu se tumwaabaka mintekesele mya Mpeeve; beetu se mu beetu-meene, tukwekuuma mu kwekiingila ntaangu ya kuba baala ba Nzaambi, na ya nkuululu manyutu meetu. 24Mukwongo, mu nsiitu beetu turi twabvuukusu; ngo nsiitu dzibaanaa dzamonokono lo dzisiiri nsiitu ko; mukwongo, na wuri lo siiri nsiitu mu bi kamono? 25Ngo mbuti beetu tusa nsiitu mu bibyo biri twahele kumono, lo tukwekiingila mu nkindusulu-mutima.

26Bunubwo se, Mpeeve yikwiisaana mu kutubakisa mu bubolo bweetu, bukuri twahele kuyaaba kusaambila bunu buyelemini. Kasi Mpeeve nde-meene, wutunwanikinaa mu lusaambulu mu nkuumunu, yahele na bwa kubangukila. 27Wunde wufyongokinaa mitima myeetu, yaari bunu buri bitsimi bya Mpeeve, bukuri wunwanikinaa bangisi mu lusaambulu, bunu bu tiiriri Nzaambi.

28Beetu tuyaari kuri ti, byobinso bisalisinaana mu bubwe bwa batyaanaa Nzaambi, babo bakari kateele mbila bunu buri bitaasi byaandi. 29Bukuri babo ba katekisiri kuyaaba, wabataasila mu kuba bafwanikina na mwaana waandi, mpisi nde kaba mwaana watete, ha kakati dya bampaangi balaka. 30Babo ba kataasiri, babo se kari kateele mbila; babo ba kari kateele mbila, babo se kari kalulukisa; babo ba kari kalulukisa, babo se kari kakeembese.

Bunene bwa ntiilu ya Nzaambi

31Ngo nki tuleele mu mamo? Mbuti Nzaambi wuri na beetu, lo na wubwiisa beetu? 32Nde wuri kasii wuungula Mwaana wa nde-meene ko, kasi wamuyekiri mu ntoono beetu-banso, lo dyaburi kahele kutuha byobinso kintwaari na nde? 33Na wutsiitsa kufuunda basoolu kuri Nzaambi? Nzaambi ngo mululukisi! 34Na wubakesele mukanu? Kiristo Yesu wafwiiri, ha yulu haho se wafulukiri, wuri ha lubakala lwa Nzaambi, na wuri mu kutunwaanikinaa mu lusaambulu. 35Na wutuhaambila na ntiilu ya Kiristo? Buri manyoongi, kinkuukulu, nkwamusunu, nzala, mpene, nsisi, bunu pe mbeesi yayila? 36Bunu bu diri dyatinu:

«Mu ntoono ye, beetu turi ha busu bwa lufwa mpisi kiluumbu.

Beetu bayeki batuhololo bunu bimeeme,

bi bari mu kunata ku nzo yi bapaakulaa bibulu.»

37Kasi mu momanso mamo, beetu tubvuriri kuba baluuluka mu wunde watutya. 38Mukwongo, me nyirikiri kuyaaba ti hayuku lufwa, bumwooyo, bambasi, bangaa-lutumu, misamu mya lolo di bunu mpe mya ntaangu yikwiisa, mpinu, 39kudzaangama, musundu, ti hayuku kiyiriki kikimi ka kitsiitsa kuhaambula beetu ko, na ntiilu ya Nzaambi, yiri mu Kiristo Yesu, Mfumu yeetu.

Musamu Wamubwete

©2013 Bible Society of the Republic of Congo

More Info | Version Index