Search form

DEUTERONOMY 1

Thu Masa

1Hi lasuibu lakah mi thu tla chu Jordan saklei ramkaro ah an um liauah Mosi nih Israel mi tla sinah a sim mi asi. Jordan Vakuam ah mi Suph kiangah an um le, khatlei kângah Paran khuapi a um le, khatlei kângah Tophel, Laban, Hazerot leh Dizahad khuapi tla an um. 2(Edom tlâng ram lampi ah kal hen Sinai Tlâng thawk hen Kades Barnea tiang ni leikhat kal asi.) 3Aigupta ram an mâknâk thawk hen a kum sâwmlinâk thla leikhatnâk ah LALPA nih mi zapi tla simh na ding hen thil zeizawng Mosi sinah thu a pêk mi chu a simh na rawh. 4Hi hi LALPA nih Amor lalchem Sihon, Hesbon khua ah lâirêltu leh Basan ram Og lalchem Astarot leh Edrei ah lâirêltu a neh na nûnah mi asi. 5Chu liau chun Jordan saklei Moab ramri ah an um le, chunah chun Mosi nih Pathian dân tla leh sîntirnâk a simhfiang.

6“Sinai Tlâng ah kan um liauah, LALPA kan Pathian nih, ‘Hi tlâng ah hin nan um tâwk ual rawh. 7Nan riakmun tla siat ule, a ṭhial u. Amor umnâk tlâng ram ah chun kal ule, a kiangkam ah mi ram tla zawzawng ah khawm, Jordan Vakuam lei tla, tlâng ram lei leh phâi lei tla, simlei tla, Mediteranian leiah. Kanaan ram leiah kal ule, Lebanon Tlâng lanh lei ram Eufretis Tiva tiang hen. 8Hi bang ram zawzawng tla chu Kei LALPA nih a nan thlâk natu tla, Abraham, Isak leh Jakob leh an thlâk zawzawng tla rangah ka tiamh na mi asi; kal ule, luah u hawng kan ti’” a ti.

Mosi Nih Lâirêltu Tla A Ruat Na

(Ex 18.13-17)

9Mosi nih zapi tla sinah, “Sinai Tlâng ah kan um liau khawmah, ‘Ka nan rui na mi thu ah hin mawhphurhnâk ka rangah a rit tuktarâi, keimah lâwng hen ka tikho ding asi lo. 10LALPA nan Pathian nih chun vân ah ârfi zat hen an tamtir na rawh. 11LALPA, nan thlâktu tla Pathian nih chun, thu a tiamh mi hâwi hen a let sâng hen an pungtir na sele, nan sul-le-lam an tluangtir na seh: 12Sikhawmsele nan thunawk lâirêl ding hen zeitin keimah lâwng hen hi tluk mawhphurhnâk rit hi ka phurh kho lai? 13phun kipah mi theihthiam ding mi leh ruatdân thiam mi mifing ruat na ule, nan tlûnah hotu ah ka siah na lai. 14Nan remti hâwi hen thil ṭha ti ding tak asi lai. 15Churawhchun, phun kip lakah mi mifing leh ti dân thiam tla nan thîm na mi chu ka put na lai le, nan hotu rang dingah ka siam na lai. A zeimaw mi sâng tlûnah mawhphurhtu ding hen, a zeimaw mi zâ tlûnah, a zeimaw mi sâwmnga tlûnah, a zeimaw mi parâ tlûnah mawhphurhtu tla ka ruat na.

16“Chu tikah chun ka sîntir na lai le, ‘Nan lakah thunawk tla chu nanmah lakah mi minung mawh ramdang mi nan sinah um mi tla thunawk tla chu ṭha tak hen rêl u. 17Nan thu thlûk chu âu lei khawm ṭângṭawm lo hen langhtir ule, mikip rangah bang khap hen lâirêl ule, anih rang ê tilo hen. Âukhawm ṭih na lah ule, nan thu thlûk chu Pathian thawk hen mi asi ruangah. Zei thu tal nan rangah a har tuktarâi chun ka sinah hawng put ule, keimah nih ka thlûk lai.’ 18Chu tikah chun thil zeizawng nan ti ding mi chu kan sîntir na lai.

Zauh Thlingtlâktu Kades Barnea

Thawk Hen Fial Mi Tla

(Num 13.1-33)

19“LALPA kan Pathian thupêk hâwi hen Sinai Tlâng chu kan mâk le, ramkaro ṭihnungkâi kâu tak pal hen Amor umnâk tlâng ram lampi leiah kan kal. Kades Barnea ah kan tlung rawh chun, 20-21‘Tu chun Amor umnâk tlâng ram chu nan hawng tlung rawh le, LALPA kan Pathian hawng kan thlâktu tla Pathian nih hawng kan pêk mi ram chu kan tlung rawh. Zauhnik u, hi hi asi rawh. Kal ule, a thupêk hâwi hen luah u. Zenh lah ule, ṭih khawm ṭih lah u,’ ka nan ti na.

22“Sikhawmsele, ka sinah nan hawng le, ‘Keimah lânah mi ram zauh ding hen thlingthlâktu kan fial lai le, chunah a khuapi tla leh a lampi tla a ṭha kâng hawng kan simhtu ding hen, nan ti.

23“Chu chu thungâi ṭha ding hen a lang, churawhchun minung leinih ka thîm na le, phun khat mi pakhat vima hen. 24Tlângram leikângah Eskol Vakuam tiang an va kal le, an va zauhfiang ver. 25Chu ram ah mi theihrah tla an muh mi chu an hawng put le, LALPA kan Pathian nih hawng kan pêk mi ram chu thungâi a ṭha ti hen an hawng kan simh.

26“Sikhawmsele, LALPA nan Pathian thupêk lakah nan hel le, chu ram sungah lût ding nan duh lo. 27Nan chipchiar le, ‘LALPA nih hawng kan hua le, Aigupta ram ah mi Amor kut ah hawng kan pêk ding hen leh thah ding hen hawng kan put. 28Zeirangah chunah kan va kal rîlmâl lai? Kan ṭih asi. Minung kan va fial mi tla nih chunah um mi tla chu kanmah ngâk hen an chak hen an sâng dauh, khuapi kulh vân tawgh khet mi lakah um mi an si. Milian tla an muh na an ti!’ nan ti.

29“Sikhawmsele, kei nih, ‘Chubang minung chu ṭih na lah u. 30LALPA nan Pathian nih an rui na lai le, an do piak na lai; Aigupta leh ramkaro ah nan muh mi hâwi hen khan. 31Him tak hen hi mun tiang ah pa nih a fapa a rui mi hâwi hen an rui na mi nan muh asi! 32Sikhawmsele, ka sim mi thu ngâi ding ngangâk hen LALPA chu nan zumhlo nget rih. 33Chu hâwi si menza khawmsele nan mâilei ah nan rangah um mun ding hâwl hen a kal masa vima. Lampi an muhtir na ding hen sûn ah sûm dîr, zân ah mei dîr hen nan mâilei ah a kal vima.

LALPA Nih Israel Tla A Rêp Na

(Num 14.20-45)

34“Pathian nih nan chipchiar mi a theih le, a thinthawk, churuangah thinlung tak hen thu a sim le, 35‘Nan thlâktu tla sinah ka tiamh mi ram ṭha ah hi thlâk misual tak tla hi pakhat khawm nan lût lai lo. 36Jephuneh fapa Kaleb lâwng a lut lai. Anih chu ka lakah zumhkai tak hen a um le, a va zauh mi ram chu amah leh a thlâk tla rangah ka pêk lai.’ 37Nanmah ruangah ka tlûnah LALPA chu a rothawk le, ‘Nang Mosi khawm hi chu ram ah chun na lût lai lo hawng ka ti. 38Sikhawmsele, nangmah an ṭangpitu Nun fapa Josua thiltum chu birhtir rawh. Ram chu luah ding hen Israel tla chu a rui na lai.’

39“Churawhchun LALPA nih kan ektê sinah, ‘Nan fa tla a siat a ṭhat theihlo rih mi, mêlma nih tleih ver na ding hen nan ruat na mi tla nih ram chu an luah lai. An sinah ram chu ka pêk na lai le, an luah lai rawh. 40Sikhawmsele, nannih zapi tla lam chu nan kîr lai le, nan dung leiah ramkaro ah Akaba Likâwlneng lei mi lampi ah nan kal lai.’

41“Nannih nih nanna thawh le, Mosi LALPA lakah kan sual ngâk. Sikhawmsele tuah LALPA nih thu hawng kan pêk mi hâwi hen kan do lai nan ti.’ Nan ektê hen do ding nanna tîm chiau le, chu tlâng ram chu awldek rûn ding hen nan ruat.

42“Sikhawmsele, LALPA nih ka sinah, ‘Do lo ding hen simh na, an sinah ka um awt lêm lo mi, an mêlma tla nih an neh salam na lai a ti.’ 43LALPA nih a ka simh mi hâwi hen ka nan simh na le, khawmsele nan ngâi duh lêm lo. LALPA tlûnah nan hel le, mah zumhnâk hen tlâng ram ah nan va kal. 44Churawhchun Amor tla, chu tlâng ram ah um mi tla chu khuai bû lai sut mi hâwi hen nan lakah an hawng. Hormah tiang hen an ṭhawl na le, Edom tlâng ram ah an neh na rawh. 45Churawhchun LALPA sinah ṭangpi deih hen nan âu le, sikhawmsele nan thu chu a ngâi duhlo hen nan leiah a nâ a thlîr duh lo.

Ramkaro Ah An Râu Mi Kum Tla

46“Kades ah hun sâwt ual kan um rawh chun, la dawnghnâk ah kanna her le, ramkaro leiah kan kal.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index