Search form

DEUTERONOMY 16

Kalkanh Kût

(Ex 12.1-20)

1LALPA, nan Pathian zahnâk ding hen Abib thla ah Kalkanh Kût ulh u, chu thla zân ah chun Aigupta ram ah mi ruang an suah na ruangah. 2Mun pakhat, sawnhnâk ding mun ah chun kal ule, Kalkanh Kût buh LALPA zahnâk dingah ei ding hen nan ranrual mawh dawrâ mawh pakhat thah u. 3Chu buh chu nan ei tikah sang thilnu telh mi hen nan ei ding asi lo. Aigupta ram nan mâk awt liauah mawhsareh nan ei hâwi khan ni sarih chu sang thilnu telhlo mi nan ei ding asi. Chu sang nan ei ding mi chu tuarnâk sang ti asi lai. Aigupta ram thawk hen nan hawng suak hen, chu ram chu tuarnâk ram asi ti nan damsung zawzawng ah nan theih khonâk ding hen. 4Ni sarih kar zawng nan ram sungah âukhawm nih thilnu nan siah ding asi lo, a ni khat ni ah zânleibâi ah ran thah mi sâ chu chu zân lîlâ ah ei ding asi. 5-6“Kalkanh Kût ran chu sawnhnâk mun pakhat ah thah u, mun dang rerêng chu LALPA nan Pathian nih an pêk na awt lo. Aigupta ram nan suaktâk liau mi ni cham nî tlâk tikah ti u. 7Sawnhnâk mun pakhat ah chu sâ chu suang ule, ei u; a thâituan ah in leiah kîr u. 8A dang ni ruk kar chu sang thilnu telhlo mi nan ei lai le, a ni sarih ni chu LALPA nan Pathian sawnh ding hen a pûm ule, chu ni ah chun zei rian khawm ṭuan lah u.

Fângzûn Kût

(Ex 34.22; Lev 23.15-21)

9Fângzûn nanna dawmhnâk thawk hen rêl ule, zarhkar sarih ah 10Fângzûn Kût ulh u, LALPA nan zahnâk dingah malsâwmnâk an pêk na mi mah duh thu a thil ap tla a sinah put u. 11Nan khua ah um mi tla numei, ngâkṭah, ramdang minung, Levi tla, nan fa leh to-aw tla hen, munkhat dut hen lâwm bû hen LALPA mâika ah um u. Hi hi sawnhnâk mun pakhat ah ti u. 12Hi thupêk tla hi zûl ding hen theihkumza u; Aigupta ram ah sal nan si mi kha philh lah u.

Basâ Kût

(Lev 23.33-43)

13“Nan fâng nan khâwng hen grep nan sûr dih rawh chun Basâ Kût ni sarih ulh u. 14Nan khua sungah um mi numei, ngâkṭah, ramdang mi, Levi, nan to-aw leh nan fa tla hen a lâwm u. 15Sawnhnâk mun pakhat ah hi kût hi LALPA nan Pathian zahnâk ding hen ni sarih ulh u. LALPA nih nan fângzûn leh nan rianṭuan mal a sâwm ruangah a lâwm u. 16“Nan phun ah minung zawzawng sawnhnâk mun pakhat ah LALPA sawnh ding hen kum khat ah veithum nan kal ding asi: Fângzûn Kût tla, Kalkanh Kût leh Basâ Kût liau tla ah. 17Mikip nih thilpêk LALPA nan Pathian nih malsâwmnâk a pêk na mi chu mah tikho tâwk hen an pêk ding asi.

Lâirêl Dân Dik

18“LALPA nan Pathian nih a nan pêk na mi khua kipah lâirêltu leh rianṭuantu ruat na u. Chubang tla nih zapi tla chu thliar dangnâk neilo hen lâi an rêl ding asi. 19An lâirêlnâk lakah khat leikâng ṭângṭawmnâk nei hen diklo tak hen lâi an rêl ding asi lo; nawhnâk khawm an ei ding asi lo, thilpêk nih mifing leh mi zumhkâi mit a châwttir le, diklo tak hen thu thlûknâk a siam tâwn. 20Rep tak leh ṭha tak hen um kumza ule, churawhchun LALPA nan Pathian nih an pêk na mi ram nan luah lai le, chunah chun nan um kumza lai.

21LALPA nan Pathian rangah mâichâm nan siam chun a kiangah Aserah pathiannu lem thing hen siam mi siah lah u. 22Milem sawnhnâk ding hen lung zeikhawm phun lah u; chubang chu LALPA nih a hua asi.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index