Search form

DEUTERONOMY 4

Mosi Nih Israel Tla Ê-aw Ngâi

Ding Hen A Fawrh Na Mi

1Churawhchun Mosi nih zapi tla sinah, “Ka nan sîntir na mi dân hi zûl ule, chu tikah LALPA an thlâk natu Pathian nih an pêk na mi ram nan luah lai le, nung dam hen nan um lai. 2Thu ka nan pêk na mi lakah zeikhawm sapsuan nâk nei lah ule, chu lakah mi zeitê khawm nan lawnh ding asi lo. LALPA nan Pathian thu ka nan pêk na mi cho zûl u. 3Peor Tlâng ah nanmah ngelchel nih LALPA thilti nan muh rawh asi. Chunah Baal sawnhtu zawng chu a veih hep na le, 4sikhawmsele, LALPA nan Pathian ah zumhkai hen umtu tla chu tusûn ni tiang nung dam hen an um asi.

5“LALPA ka Pathian nih dân zûl ding hawng ka simh mi zawng chu kan sîntir na rawh. Nan va rûn hen nan va luah ding mi ram ah chun nan zûl kumza ding asi. 6Zumhkâi tak hen zûl ule, phun dang tla lakah mifing nan sinâk a lang lai. Chubang dân zawzawng an theih tikah chun, ‘Hi phun rokual tak nih finghnâk leh theihthiamnâk an nei a!’ an ti lai.

7“Phun dang zei ti tal rokual khawmsele, an herh leh an duh ni ah an pathian nih naih na khawmsele, LALPA kan Pathian kan sinah a um mi hâwi chu asi lo. Zeiliau zawngah ṭangpi kan deih chun hawng kan sâng. 8Phun dang, zei ti tal rokual khawmsele, tusûn ni ah ka nan simh na mi hâwi hen dân dik an nei lo. 9A vêng thlir u! Philh lo ding hen theih set u, nan mit ngelchel hen nan muh mi kha nan thih lân lo philh lah u. Sinai Tlâng ah LALPA nan Pathian mâika ah 10nan dîr liau tla kha nan fa le nan tu tla simh na u. Chu liau chun Pathian nih ka sinah, ‘Zapi tla pumh na. Ka sim ding mi thu ngâi na seh, an dam kar zawzawng ka lakah ê-aw an ngâinâk ding leh an fa le tla nih an hawng ka ṭih ding an sîntir khonâk ding hen, a ti.

11“Tlâng bul ah nan va kal hen nan va dîr le, tlâng chu sûm sah tak meikhû thim pang mi nih a hawng khuh mi leh vân leiah meialh a hawng lang mi tla kha nan fa tla simh na u. 12LALPA nih mei thawk hen thu a hawng sim le, a thusim nan theih le, amah chu zei hâwi asi nan muh lo thlo mi tla kha simh na u. 13Thudântuk kil thlir ding hen a nan siam piak na mi tla, Thupêk Parâ lungtlêp panih lakah a rîn mi tla chu nan zûl ding hen a nan simh na asi. 14LALPA nih dân zawzawng chu nan va rûn hen nan va luah ding mi ram ah nan zûl kumza ding hen an sîntir na ding hen a hawng ka simh.

Milem Sawnh Lo Ding

Hen Khapnâk

15“Sinai Tlâng ah LALPA nih mei thawk hen nan sinah thu a sim liau khan zei hâwi mi me asi, nan muh lo. Nanmah rangah ṭhatnâk ding hen 16zei lem tal a banghpi hen siam hen sual lo ding hen a thiamthih u, mipa mawh, nunau mawh, 17ram sa leh vâ, 18vâk phung mawh ngâ lem khawm nan rangah siam lah u. 19Vân ah nan muh mi nî tla, thlâ tla, ârfi tla sawnh ding hen khawm perpet hen um lah u. Chubang zawzawng tla chu LALPA nan Pathian nih midang tla rangah sawnh ding hen a pêk na mi asi. 20Sikhawmsele, nannih lam chu Aigupta ram ah êrnâk meialh lakah mi an suah na mi asi. Amah minung tak si ding hen a nan lâk na mi asi, tusûn tiang nan si hâwi hen. 21Nanmah ruangah asi, LALPA nan Pathian chu ka tlûnah a thinthawk le, ram ṭha a nan pêk na mi lakah lût ding hen Jordan Va ka kanh lo ding hen a sim mi chu. 22Kei lam chu hi ram ah hin ka thi lai le, tiva chu ka kanh awt lo, sikhawmsele, nannih lam chu nan va kanh lai le, ram ṭha chu nan va luah lai. 23LALPA nan Pathian nih nan sinah thudân a tuk mi chu philh lo ding hen theih set u. A thupêk zûl ule, zeitin mi zât lem khawm siam lah u, 24LALPA nan Pathian chu meialh hâwi asi ruangah; hel mi rêng a saithiam lo.

25“Chu ram ah chun sâwt tak nan um hen, fa tla, tu tla nan nei khawmah zei lem banghpi khawm nan rangah siam hen sual lah u. Hi bang hi LALPA mitmuh hen sual asi le, a thinrunh tirnâk asi. 26Theihpitu dingah tusûn ni ah hin nanmah ruangah tual leh vân ka auh asi, ka thu nan ngâilo asi chun chu ram ah mi chu nan vei dep sawm lai. Jordan Va kanh hen nan va umnâk ding ram ah chun tam nan um sâwt lai lo. Nan vei dep lai. 27LALPA nih phundang nâwngah a nan rektir phin na lai le, chunah chun a thibang tâwmtê cho nan um lai. 28Chunah chun minung kut hen siam mi pathian tla, thing pathian, lung pathian muh kholo mi, theih kholo mi, ei kholo mi leh rim khawm theih kholo mi nan sawnh lai. 29Chunah chun LALPA nan Pathian nan hâwl lai le, nan thinlung zawzawng hen amah chu nan hâwl tikah nan tawng kho lai. 30Nan lawksawng hen chubang thil tla chu nan lakah a hawng tlung tikah a dawnghnâk ah amah leiah nanna her lai le, a thu nan ngâi lai. 31Anih chu khuaruattu Pathian asi. A nan kaltâk na lai lo, veih khawm an veih dep na lai lo, a nan thlâk natu tla sinah amah ngelchel nih thudântuk a siam mi khawm a philh lai lo.

32“A lân mi tla, nan suak lânah mi, Pathian nih tual tlûnah minung a siam liau mi zawzawng tla ruat set u. Tual pumpi ruat nik u. Hi hâwi rerêng a lânah thil rokual a um tâwn ma? Zeital hi bang hâwi thil hi âu nih theih dah tâwn? 33Nanmah hâwi hen Pathian nih mei thawk hen an sinah thu a sim mi an theih hen an nung mi âu nan theih dah tâwn? 34Aigupta ram ah LALPA nan Pathian nih a nan ti piak na mi hâwi hen phun dang lakah um mi suah ding hen kal ngamtu leh amah minung ah siam natu pathian rerêng nan nei mazei? Nan mitmuh ngelchel hen a thiltikhonâk rokual leh a chaknâk mang hen râi leh râltuknâk a tlungtir, thilchê a ti le, thilchê a umtir, thil ṭihnungkai tla a tlungtir. 35LALPA nih amah cho chu Pathian asi zia leh pathian dang rêng a um lo ti theihnâk ding hen hi hi an muhtir na mi asi. 36Vân thawk hen a hâu a nan theihtir na, an sîntir kho na ding hen; hi tual tlûnah hin a mei thenhlimh a nan muhtir na le, chu mei thawk hen chun nan sinah thu a hawng sim. 37A nan thlâk natu tla a dâwt na ruangah a nan thîm na le, a thiltikhonâk rokual hen amah ngelchel nih Aigupta thawk hen a nan suakpi na. 38Nan kalnâk zawngah nanmah ngâk hen phun rokual leh chak dauh tla a nan nar piak na, an ram an pêk na mi, nanna ting mi ram lakah hin an lûtpi kho na ding hen. 39Churuang chun tusûn ni tiang hen theihkumza ule, philh lah u; LALPA chu tual leh vân Pathian asi. Chu lo chu pathian dang rerêng a um lo. 40Tusûn ni ah ka nan pêk na mi dân zawzawng chu zûl ule, nan thlâk leh nanmah rangah sul-le-lam tluangnâk asi vima lai. LALPA, nan Pathian nih nan tâ si kumza ding hen a nan pêk na mi ram ah hin nan um vima lai,” a ti.

Jordan Saklei Mi Himnâk Khuapi Tla

41Mosi nih Jordan saklei kângah himnâk khuapi pathum a ruat le, 42chunah chun mi nih mêlma silo hen mi a thah palh chun chunah chun ruang a suak kho ding hen leh a him khonâk ding hen. Hi khua tla lakah hin a zei mi khua tal ah a him hen thah asi lonâk ding hen. 43Reuben phun rangah chun ramkaro phâi ah Bezer khuapi asi; Gad phun rangah chun Gilead ram Ramoth khua asi; Manaseh phun tla rangah chun Basan ram ah mi Golan khua asi.

Pathian Dân Pêk Mi

Lakah Thu Masa

44Mosi nih Israel tla chu Pathian dân leh sîntirnâk a pêk na. 45-46Aigupta ram an suaktâk nûnah Bethpeor khua zâwnah mi Jordan Va saklei kuam ah an um liauah hi bang dân tla hi a pêk na mi asi. Hi ram hi Hesbon khua ah lâirêltu Amor lalchem Sihon tâ asi. Mosi leh Israel mi tla nih Aigupta ram thawk hen an hawng suak liauah an neh mi chu asi. 47A ram leh Basan lalchem Og, Amor lalchem dang Jordan Va saklei ah a um mi ram chu an luah. 48Hi ram hi Aroer khuapi thawk hen Arnon Tiva rîl hen; marlei kângah Sirion Tlâng tiang asi, chu chu Hermon Tlâng asi. 49Jordan Va saklei ram zawzawng, simlei kângah Tipi Thi leh saklei kângah Pisgah Tlâng phûr tiang a uap hep asi.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index