Search form

DEUTERONOMY 7

LALPA Mi Tla

(Ex 34.11-16)

1“LALPA nan Pathian nih nan va luah ding mi ram ah an kalpi na lai le, a sungah mi phun tamtak tla chu a nar hep na lai. Nan kalnâk kipah nanmah ngâk hen tam dauh mi leh thiltikho dauh mi phun sarih: Hit mi, Girgasit mi, Amor mi, Kanaan mi, Periz mi, Hiv mi, leh Jebus mi tla a nar phin na lai. 2LALPA, nan Pathian nih hi bang minung tla hi nan thiltikhonâk ah a siah na hen nan neh na tikah chun nan thah hep na ding asi. Anmah hen a tlainâk mawh, an lakah khuaruatnâk rêng nei lah u. 3Anmah tla chu nupi ah umpi na lah ule, nan fa tla khawm anmah hen umhtir lah na u, pathian dang tla sawnh ding hen 4nan fa le tla chu LALPA lakah mi pathian dang sawnh ding hen an rui na awt ruangah. Chubang hâwi thil a hawng um sual chun, LALPA nan tlûnah a thinthawk lai le, an veih sawm na lai. 5Churuangah an mâichâm tla râwk ule, an lungphun tla kektir dip u, Aserah an pathiannu lem chu hâu ving ule, an ruk tla chu duah u. 6LALPA nan Pathian tâ nan si ruangah hi bang tla hi ti u. Tual tlûnah minung zawzawng lakah mi a bîk hen amah minung si ding hen an thîm na mi nan si.

7“LALPA nih phundang ngâk hen nan tam ruangah an dâwt na hen an thîm na mi asi lo; tual tlûnah phun mêchem nan si. 8Sikhawmsele LALPA nih an dâwt na le, an thlâk natu sinah thu a tiamh mi zûltu si ding hen an duh na. Churuangah asi, Aigupta lalchem sal nan si mi a chaknâk hen ruang an suah na mi chu. 9LALPA nan Pathian amah cho chu Pathian asi hen zumh a kâi ti theihkumza u. A thudântuk leh a dâwtnâk dawng lo chu, amah dâwttu leh a thupêk zûltu tla sinah thlâk san sâng khat tiang hen a langhtir lai le; 10sikhawmsele, amah huatu tla chu rêp ding hen a dawrh na awt lo. 11Churuangah tuah nanna sîn mi chu zûl ule; tusûn ni ah dân ka nan pêk na mi zawzawng zûl u.

Ê-aw Ngâitu Rangah Malsâwmnâk

(Deut 28.1-14)

12“Hi thupêk hi nan ngâi hen zumhkai tak hen nan zûl chun LALPA nan Pathian nih nan sinah thu a tiamh mi chu a theihkumza lai le, a nan thlâk natu sinah thu a tiamh mi hâwi hen a dâwtnâk dawng lo a nan muhtir kumza na lai. 13A nan dâwt na hen mal an sâwm na lai le, nan zan hen fa tamtak nan nei lai; nan phâisen tla mal a sâwm lai le, fâng tla uain tla, oliv sariak tla nan nei lai le, ranrual tamtak leh dawrâ tla an pêk na hen mal an sâwm na lai. Hi bang malsâwmnâk zawzawng tla hi an thlâk natu sinah a tiamh na mi ram ah chun an pêk na lai. 14Laikulh ah nanmah hâwi hen âukhawm neih-le-siah hen malsâwm hen an um lo. Nanmah leh nan ranrual lak khawmah fa ring lo mi rêng an um lai lo. 15LALPA nih damlonâk zawzawng lakah an vêng na lai le, Aigupta ram ah nan muh rawh mi râi ṭihnungkâi rerêng nan lakah a tlungtir lai lo, nan mêlma tla zawzawng tlûnah a tlungtir dauh lai. 16LALPA nan Pathian nih nan thiltikhonâk lakah a siah mi zawzawng tla chu veih dep na ule, khuaruatnâk an tlûnah nei lah u. An pathian tla chu sawnh lah u, thihnâk ding mi asi awt ruangah.

17“Hi bang minung tla hi rêl châwk an silo, kannih suah kho na ding mi asi lo ti hen a ruah lah u. 18Anmah chu ṭih na lah ule; Aigupta ram lalchem leh a mi le tlûnah LALPA nan Pathian nih thil a ti mi kha theihkumza u. 19Nanmah mit ngelchel hen râi ṭihnungkâi nan muh mi kha theihkumza u, thilchê ti leh thilchê tla, thiltikhonâk rokual leh chaknâk hen LALPA, nan Pathian nih an suah na mi kha theihkumza u. Chu hâwi hen Aigupta mi khawm a veih na le, tuah nan ṭih mi minung tla khawm hi a veih ver na lai. 20An lakah zerhnâk a pêk na lai le, a tek mi tla leh â thup mi tla khawm a veih hep na lai. 21Churuangah hi minung tla hi ṭih na lah u. LALPA nan Pathian nan sinah a um; amah chu Pathian rokual leh ṭih ding mi chu asi. 22Nan kalnâk zawngah hi bang phun tla hi tâwm tâwm hen a nar vima na lai. Lâkkhatko chun nan veih hep kho na lai lo, chu hâwi asi chun ram sa tla a hawng pung lai le, nan rangah ṭihnungkâi asi lai. 23LALPA nan Pathian nih nan mêlma tla chu nanmah neh ding hen a siam na lai le, an vei hep tiang hen zerhnâk a pêk na lai. 24An lalchem tla chu nanmah neh ding hen a siam na lai. Nan thah na lai le, theih an si lai lo rawh. Âukhawm nih a nan kham kho na lai lo; mikip nan veih phin na lai. 25An milem tla chu duah u. Tangka leh ngûn hen siam an si mi kha ngarh lah u, nanmah rang ding hen a lâk lah u. Nan ti bâk chun nan thi phah lai, Pathian nih milem chu a hua ruangah. 26Chubang lem tla chu nan in sungkhur ah lûtpi lah u, chu hâwi asi lo chun an lakah siatnâk kha nan tlûnah a hawng tlung lai. Milem tla chu nan zauhnawmh hen hua ding asi, LALPA siatbarh mi an si ruangah.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index