Search form

EXODUS 12

Kalkanh Kût

1LALPA nih Aigupta ram ah Aron leh Mosi sinah thu a sim: 2“Hi thla hi kum khat sungah nan rangah thla masachem asi lai. 3Israel mipi zawzawng sinah hi sîntirnâk hi pêk na u: Hi thla a ni rânâk ah mikip nih dawrâ fa mawh kêl fa mawh a dâwngsung rangah a thîm lai le; 4ran a sa ei hep ding hen an dâwngsungkhur a tâwm tuk asi chun, amah leh a unaupa a in pah rangah sa a vauh kho lai. Mah dâwngsung tâwk vima hen mikip nih anmah tingvo an ei kho lai. 5Kêl mawh dawrâ mawh zeital nan thîm kho, sikhawmsele, kum khat mi a mipa simsâwinâk umlo mi asi ding asi. 6Churawhchun, chu thla ni leili zân ah, Israel mipi zawzawng nih chu ran tla chu an thah ding asi. 7Mi tla nih a thisen an lâk lai le, inkhâr tung leh a tlûnlei ransa an einâk ding in vial chu an nêk ding asi. 8Chu zân ah chun sâ chu an em lai le, an nah khâ mi thilnu telh lo sang hen an ei ding asi. 9A hel hen mawh suang lo hen mawh nan ei ding asi lo. Sikhawmsele, a lû tla, a kê tla, leh a sungril hen a pum hen em mi ei na seh. 10A thâi tiang hen zeikhawm siah lah ule, a leifûan um khawmsele nan duah hep ding asi. 11Kal sek ding hen tîm chia hen, nan kê lakah pheikawk bunh hen, nan kut ah ṭhianṭhunh put hen khulrang hen ei u. LALPA, kei nan hawng ka zahnâk ding hen Kalkanh Kût asi.

12“Chu zân ah chun Aigupta ram pumpiluk ka ṭawl awt, fapa tîr, minung leh ran lakah mi ka thah na lai le, Aigupta pathian zawzawng ka rêp awt. Kei hi LALPA chu ka si. 13Kawtkâ tung ah mi thisen chu nan umnâk singsiahnâk asi lai. Aigupta ram ka rêp tikah thisen ka muh chun ka nan kanh na lai le, nganfâk kan pêk na lo ding hen. 14Hi hi Kei LALPA Pathian nih thil ka ti mi nan theih nawlh lemang ding hen Pathian lei phung nan ulh tâwn ding asi. Mâilei khawm zeiliau zawngah nan ulh kumza ding asi,” a ti.

Sang Thilnu Telh loh Kût

15LALPA nih, “Ni sarih kar chu thilnu telh mi sang rerêng nan ei ding asi lo, thilnu tel lo mi karo nan ei ding asi. A ni khat ni ah nan in ah mi thilnu zawzawng nan thenh ver ding asi. Âuzawng nih ni sarih karah thilnu telh mi sang a ei chun, ka minung ah rêlsih asi lai lo. 16A ni khat ni leh a ni sarih ni ah Pathian sawnhnâk tawngpumhnâk nei u: chu ni ah chun âukhawm rianṭuan ding asi lo, buh-an lam chu nan timhtuah kho lai. 17Hi kût hi nei ule, Aigupta ram ah mi nan phun kan suaktir na mi ni asi ruangah; zeiliau zawngah hi kûtnâk hi nan nei kumza ding asi. 18Thla masachem a ni leili zânlei thawk hen ni kul leh ni khat zânlei tiang hen, sang thilnu telh hen siam mi nan ei ding asi lo. 19-20Ni sarih kar chu nan in sung khur ah thilnu rerêng nan siah ding asi lo. A ram mi nih mawh ramdang mi nih mawh thilnu telh mi sang a ei chun ka minung lakah rêlsih kho asi lai loh,” a ti.

Kalkanh Kût Masachem

21Mosi nih Israel ruitu zawzawng a kawh na le, an sinah, “Mikip nih dawrâ fa mawh kêl fa mawh nan thah chiau lai le, churawhchun, nan dâwngsungkhur nih Kalkanh Kût nan ulh lai. 22Husop ṭeng lâk ule, khêng lakah mi ran thî lakah nîm ule, nan in kawtkâ tung leh kawtkâ tlûnlei khawm nêk u, thâizîng tiang hen in sungah mi âukhawm nan suak ding asi lo. 23Aigupta ram mi tla thah na ding hen LALPA nih a hawng ṭawl tikah kawtkâ tlûnlei leh kawtkâ tung mi thî a muh lai le, a vânmifial chu nan in sungah a hawng lût hen an thahtir na lo ding hen. 24Nanmah leh nan fa nih hi dân hi nan theihkumza ding asi. 25LALPA nih thutiamh hen an pêk na mi ram nan va lût tikah hi dân hi nan nei kumza ding asi. 26‘Nan fa tla nih hi dân hi zei dân me si?’ an ti na chun, 27‘Hi hi LALPA zahnâk ding hen bâwlnâk Kalkanh Kût asi, Aigupta ram ah Israel dâwngsung tla chu a kanh na ruangah. Aigupta mi tla chu a thah na le, kannih lam chu hawng kan zuah ti hen nan sâng na ding asi,’” a ti na.

Israel tla chu an siksidîr le, Pathian an sawnh. 28An kal le, LALPA nih Mosi leh Aron thu a pêk na mi hâwi hen an ti rawh.

Fa tîr Thihnâk

29Zân lâi chir chun LALPA nih Aigupta fapa tîr zawzawng chu a thah hep na. Lalchem fapa a laltophah luahtu ding thawk hen rêngin sungah mi rêngtlâ fapa; ran lakah fa tîr zawzawng khawm thah hep an si. 30Chu zân chun, lalchem leh a rianṭuantu tla zawzawng leh Aigupta mi zawzawng tla chu an thawk le, in pakhat khawm fapa ruak a um lo mi a um lo ruangah Aigupta ram pumpi ṭap hâu hen a khat. 31Chu zân chun lalchem nih Mosi leh Aron chu a kawhtir na le, “Nan ka deih mi hâwi hen nannih leh Israel fa tla ka ram thawk hen suak ule, LALPA chu va sawnh u. 32Nan dawrâ tla, kêl tla, nan ranrual, tla lâk ule, kal ule, ka rangah malsâwmnâk hawng ka deih piak bâk u,” a ti na.

33Aigupta mi tla nih Israel tla chu mawhsareh hen ram suaktâk ding hen an nâwr na le, “Nan suak lo chun kan thi ver lai,” an ti. 34Churawhchun, mi le tla nih thilnu telhlo sang chu emnâk khêng lakah an siah le, puan hen an tuam le, an liangah an put. 35Israel tla nih chun Mosi nih a simh na mi hâwi hen, Aigupta mi tla sinah ngûn tla, tangka tla, nipuan tla an deih na. 36LALPA nih Aigupta mi tla chu Israel fa tla chu a sunhsaktir na le, an deih mi zawng chu an pêk na. Hi hâwi hen Aigupta mi neih chu Israel mi tla nih an kalpi.

Israe Tla Nih Aigupta Ram an Kaltâk Rawh

37Israel tla chu Rameses thawk hen Sukot lei kal ding hen an suak rawh. Nunau leh ngâksia rêl lo hen mipa vial nuai ruk ding an si. 38Midang tamtak leh dawrâ tla leh kêl tla, ranrual tla khawm an sinah an kalpi na. 39Aigupta ram thawk hen an hawng suakpi mi sang chu an em le, an hawng suak liauah Aigupta ram mi nih mawhsareh hen an nar na ruangah eibâr zeikhawm an timhtuah manh lo.

40Israel tla chu Aigupta ram ah kum 430 ding an um. 41Kum 430 kum dawngh ah LALPA phun zawzawng nih Aigupta ram an mâk rawh. 42LALPA nih Aigupta ram thawk hen a suakpi na liau kha zân asi le; chu zân chu zeiliau zawngah Israel fa le nih LALPA sinah anna pumpêknâk zân si vima ding hen ruat asi.

Kalkanh Kût Dân Tla

43LALPA nih Mosi leh Aron sinah, “Hi hi Kalkanh Kût dân chu asi; ramdang mi âukhawm nih Kalkanh Kût buh chu an ei ding asi lo. 44Sikhawmsele, nan sal nan châwk mi âutal nih a fêm nan tan rawh mi nih chun a ei kho lai. 45Mun bir lo mi leh rianṭuan ah mang salam mi nih an ei kho ding asi lo. 46Ei ding mi buh-an tla chu an timhtuahnâk in sungah an ei ding asi, lênglei ah an ei ding asi lo. A sa an ei mi ran chu a ruh pakhat khawm khiak ding asi lo. 47Israel mipi zawzawng nih hi kût hi an ulh ding asi. 48Sikhawmsele, fêmtan lo mi nih an ei kho lai lo. Ramdang mi nan sinah a um mi nih Kalkanh Kût chu LALPA zahnâk ding hen ulh a duh chun, a masachem hen an in sung khur ah mi mipa vial fêm nan tan ding asi, chu tikah a ram mi Israel tla hâwi hen ngaih asi lai le, Kût lakah â tel kho lai. 49A ram ah mi Israel tla leh ramdang mi nan sinah um mi tla chubang cho hen dân nan nei ding asi,” a ti. 50Israel mi tla nih chun LALPA nih Mosi leh Aron rangah thu a pêk na mi chu Israel zawzawng nih an pawm le, an ti rawh. 51Chu ni ah chun Israel tla chu Aigupta ram ah mi LALPA nih a suakpi na.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index