Search form

EXODUS 16

Manna leh Mimtê

1Israel mi zapi tla chu Elim mun thawk hen an suak le, Aigupta ram ah mi an suaknâk thawk hen a thla nihnâk ni leingâ ah Sin ramkaro an tleng le, chu chu Elim leh Sinai Tlâng karah mi asi. 2Chu ramkaro ah an kal liauah chun Mosi leh Aron tlûnah thungâi an vûirâm le, an sinah, 3“Aigupta ram ah khan LALPA nih hawng kan thah ver sele a ṭha ding mi ma hi a, chunah chun, um sele buh leh an duh duh kan ei ding mi, sikhawmsele, hi ramkaro ah tîhâl leh sungvâng hen thi ver ding hen nan hawng kan kalpi ma hi,” an ti.

4LALPA nih Mosi sinah, “Tuah nan ektê rangah vân thawk hen sang ka hawng sûrtir lai. Mi zapi tla nih nisiar hen ni khat vo tâwk ding hen an va sar ding asi. Chu hâwi hen ka sîntirnâk tla hi nan zûl ma zûl lo kan nik na awt. 5A ni ruk ni ah chun a lehnih tam hen nan sar lai le, nan timhtuah lai,” a ti.

6Churawhchun, Mosi leh Aron nih Israel mi tla zawzawng sinah, “Tu zânlei hin, LALPA chu Aigupta ram thawk hen an suakpi natu asi ti nan theih lai. 7Thâizîng ah chun LALPA chêu mitser rê mi nan muh lai. A tlûnah nan chipchiarnâk kha a theih asi; asi, amah tlûn tak ah asi, kannih lam chu a sîntirnâk puttu cho kan si,” an ti. 8Churawhchun, Mosi nih, “Zânlei ah meh zînglei ah sang nan duh tâwk an pêk natu ding chu LALPA asi, a tlûnah nan chipchiarnâk a theih tam tuktarâi rawh ruangah, kan tlûnah nan chipchiar mi chu LALPA tlûnah chipchiar nan si,” an ti.

9Mosi nih Aron sinah, “Mi zapi tla chu LALPA mâika ah hawng dîr ding hen simh na, an chipchiarnâk tla a theih ruangah,” a ti. 10Aron nih mi zapi sinah thu a sim liau chirah, ramkaro lei anna hawi le, LALPA chêu mitser rê hen sûm lakah a hawng lang. 11LALPA nih Mosi sinah, 12“Israel mi tla chipchiarnâk chu ka theih. Mûi rawp ah meh an ei lai le, zînglei ah sang an duh rî hen an tawng lai,” a ti.

13Zânlei ah chun mîmtê rual an umnâk khat dil hen an zuang le an hawng lût, zînglei chun an umnâk kiang chu dâm karo a tlâ. 14Chun, dâmtî a hul rawh chun, thil zeimawh chu ramkaro mun ah chun sah tet tê hen a tlang tetê hen a rîl rui, vûr khal tlang tetê hâwi hen. 15Israel tla nih an muh rawh chun zei asi an theih rerêng lo, “Zei mesi?” ti hen anmah leh anmah anna deih. Mosi nih an sinah, “Hi hi buh LALPA nih nan ei ding hen an pêk na mi chu asi. 16LALPA nih mah herh tâwk chiau sar ding hen thu an pêk na; dâwng khat ah mi pakhat rangah litre nih vima ding asi,” a ti.

17Israel tla nih hi hâwi hen an ti rawh, a zeimaw mi nih tam dauh an sar, a zeimaw mi nih tâwm dauh an sar. 18An tah le, a sar tam mi khawm a tam tuk lêm lo, a sar tâwm mi khawm a tâwm tuk lêm lo; anmah sar mi chiau chu anmah tâwk asi ko. 19Mosi nih an sinah, “Âukhawm nih thâituan rangah nanna khiar ding asi lo,” a ti. 20Sikhawmsele, a zeimaw mi nih Mosi thu ngâilo hen tâwm an siah; a thâituan ah chun a tholung le, a uih thep; churawhchun Mosi chu an tlûnah a thinthawk rawh. 21Zîng siar anmah tâwk chiau an sar le, nî a sa rawh chun, an sar bang chu a zawr hep.

22A ni ruk ni ah chun, a lehnih hen an sar, minung pakhat lakah litre li chiau hen. Chu thâwngthâng tla chu murui kip mi ruitu tla Mosi sinah an hawng le, 23an sinah, “LALPA nih thâizîng chu dinhni thenhlimh asi, a sinah a pêk u. Em ding nan duh mi tusûn ah em u, suang ding nan duh mi suang u. A dang a lei mi chu thâituan rangah kil u,” a ti. 24Mosi nih thu a pêk na mi hâwi hen a lei mi vial chu thâituan rangah an kil le; â râwk lo, tholung khawm nih a lunh lo. 25Mosi nih, “Tusûn hi Dinhni asi ruangah hi hi ei u, dinhni asi. LALPA sinah a pumpêk u, um mun lênglei ah zei buh khawm nan tawng ding asi lo. 26Ni ruk kar chu buh nan sar lai le, sikhawmsele a ni sarihnâk chu dinhni asi, zeikhawm a um ding asi lo,” a ti.

27Ni sarih ni ah chun mi zeimaw mi chu buh sar ding hen an suak le, sikhawmsele zeikhawm an tawng lo. 28Churawhchun LALPA nih Mosi sinah “Zeitiang riamruam me nannih tla nih ka thupêk nan êl awt? 29Kei, LALPA nih dinhni kan pêk na mi hi theihkumza u. Churuangah asi a ni ruk ni ah ni nih ei vo kan pêk kumza na awt mi chu. A ni sarih ni ah chun mikip mah um mun chiauah nan um hen nan in nan kaltâk ding asi lo,” a ti. 30Churawhchun mi zapi tla nih ni sarih ni ah rian rêng an ṭuan lo rawh.

31Israel mi tla nih buh chu Manna+ . an ti, zei chî mawh a vâr cher mi a bangh, sang khuaitizû hen chawmh mi hâwi hen a thlum tîk. 32Mosi nih, “LALPA nih manna hawng kan pêk mi hi, mâilei kan thlâk tla rangah kil u hawng kan ti. Aigupta ram ah mi hawng kan suakpi liauah ramkaro ah buh hawng kan pêk mi asi ti an muh khonâk ding hen,” a ti. 33Mosi nih Aron sinah, “Bêl lâk le, a sungah litre nih manna siah le, kan thlâk tla rangah kil ding hen LALPA mâika ah va siah,” a ti. 34Mosi sinah LALPA nih thu a pêk hâwi hen Aron nih Thudântuk Bâwm mâika ah a va siah. Chu hâwi hen an kil asi. 35Israel tla nih chun an umnâk Kanaan an tlung lân lo chu kum sâwmli kar manna an ei. 36(A châr mi tahnâk dân chu litre kul hen â tluk.)

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index