Search form

EXODUS 29

Aron Leh A Fapa Tla Bâwlpu

Rangah Birhtirnâk Leh Sîntîrnâk

1“Hi hi ka rianṭuantu bâwlpu tla si ding hen Aron leh a fapa tla apnâk ding hen na ti ding mi chu asi. Chawchal tuai pakhat leh dawrâ chal panih simsâwinâk umlo mi lâk rawh. 2Sangvut a ṭha chem mi mang le, thilnu telh lo mi, oliv sariak hen sang siam le, a zeimaw mi chu sariak tel lo mi, a zeimaw mi sariak buaih mi sang siam rawh. 3Bâwm lakah khumh le, chawchal leh dawrâ chal panih hen bâwlnâk na hawng timhtuah tikah ka sinah hawng ap.

4“Ka umnâk Puanin kawtkâ kiangah Aron leh a fapa tla hawngpi na le, dân hâwi hen tak khawlh ding hen simh na. 5Churawhchun Aron chu bâwlpu thuam hen thuamh, kawrdawh, ephod, ephod tlûnah mi kawrfual, ṭâng bêk leh tâisâwm hen. 6Upâwng pawnhtir le, ‘LALPA sinah ap mi’ ti rîn apnâk singsiahnâk thenhlimh kha a upâwng lakah sih. 7Churawhchun sariak thuh ding mi lâk le, a lû ah tawih le, chulh.

8“A fapa tla hawngpi na le, kawrdawh ruk na; 9an tâi ah tâisâwm hen sâwm na le, lukhuh khuh na. Chu chu Aron leh a fa tla na birhtir na ding mi dân chu asi. Anmah leh an thlâk le tla nih bâwlpu si hen ka rian an ṭuan kumza ding asi.

10“Ka umnâk Puanin tualmâi ah chawchal hawng put le, Aron leh a fapa tla nih a lû tlûnah an kut thâng seh. 11Ka umnâk thenhlimh Puanin mâika ah chawchal thah. 12Chun, chawchal thisen chu na kutdawng hen tawh le, mâichâm kî fawng lakah nalh. Thisen a lei mi chu mâichâm bul ah bungh hep. 13Churawhchun, a sungril thâu zawzawng lâk, a thin a ṭha chem mi lâk le, akal panih a tuamtu thâu hen, mâichâm tlûnah duah le, ka sinah hawng ap. 14Sikhawmsele, chawchal sâ, a vun, a ril chu dâivâu ah duah. Chu chu bâwlpu tla sual thiangnâk dingah thil ap chu asi.

15“Dawrâ chal pakhat lâk le, Aron leh a fapa tla nih a lû tlûnah an kut thâng na seh. 16Chun, dawrâ chu thah le, a thî lâk le, mâichâm sîr ki li ah theh. 17Dawrâ chal chu chan dip le, a kê leh a sungril chu ṭâwl le, a neknâwi tla hen a lû hen munkhat siah na. 18Eiphung thî ap hâwi hen mâichâm tlûnah duah hep. Chu apnâk rim nih chun hawng ka lawmhtir asi.

19“Dawrâ chal dang ap ding mi chu lâk le, Aron leh a fapa tla nih a lû tlûnah an kut thâng ding hen simh na. 20Thah le, a thî lâk le, Aron nakhaw sâr ah leh a fapa tla an vawrhlei kutpi tla leh an vawrhlei kepi tla ah buaih; a lei mi thî chu mâichâm ki li ah theh. 21Mâichâm tlûnah mi thî tla leh sariak buaih mi tla lâk le, Aron leh a fapa tla nipuan lakah theh. Amah leh a fapa tla nipuan chu ka sinah ap mi asi lai rawh.

22“Dawrâ chal thâu, a mei thâu, a sungril thâu, a thin ṭha chem sêu khat, a kal panih leh a thâu, leh a êl vawrhlei kâng mi lep. 23Keimah an hawng ka apnâk pâi lakah mi chikip lakah mi sang tlang khat chiau; oliv sariak hen zêu mi tlang khat, sariak hen zêu lo mi tlang khat leh sang dang tlang khat lâk. 24Hi bang eiphung tla hi Aron leh a fapa tla kut lakah pêk na le, ka sinah a bîk hen thilpêk hawng ap ding hen simh na. 25Chun, an sinah thawk hen thil an hawng ap mi chu lâk le, bâwlnâk mâichâm tlûnah ka sinah eiphung apnâk hâwi hen mâichâm tlûnah duah. Chu thil ap rim nih chun hawng ka lawmhtir asi.

26“Dawrâ î-âwm chu lâk le, a bîk hen thilpêk si ding hen ka sinah hawng ap. Hi anrang lam chu nangmah vo asi lai.

27“Bâwlpu birhtir tikah dawrâ î-âwm leh a êl, birhtirnâk ah mang mi tla chu a bîk hen thilpêk si ding hen ka sinah ap ding asi. Chu chu bâwlpu tla rangah siah. 28Bâwlpu vo, ran a êl leh a î-âwm ka mi le tla nih a tlâinâk ding hen thil ap an siam mi chu ka thuthlûk lêt kho lo mi asi. Hi hi mi zapi tla nih, Kei, LALPA sinah an thilpêk chu asi.

29“Aron Bâwlpu thuam tla chu a thih nûnah a fapa tla sinah pêk ding asi, birhtir an si tikah anna ruk ding hen. 30Aron fapa amah bâwlpu sinâk luahtu ka umnâk Puanin Mun Thenhlimh ah ka rianṭuan ding hen lûttu nih ni sarih kar hi nipuan tla hen a thuam ding asi.

31“Dawrâ chal sâ Aron leh a fapa tla birhtirnâk ah mang mi chu mun thenhlimh ah suang. 32Ka umnâk Puanin tualmâi ah pâi lakah sang siah mi hen an ei ding asi. 33Anmah birhtirnâk dingah ngaihdamnâk dân ah mang mi chu an ei ding asi. Hi hi thil thenhlimh asi ruangah bâwlpu tla cho nih an ei ding asi. 34Meh mawh sang mawh zînglei tiang hen a leifuan a um mi chu thil thenhlimh asi ruangah ei ding asi lo, duah hep ding asi.

35“Aron leh a fapa tla rangah thu ka nan pêk mi hâwi hen birhtirnâk dân chu ni sarih si ding hen siam. 36Nisiar hen chawchal hen bâwlnâk na ap ding asi, sual tla ngaihdam asi khonâk ding hen. Hi nih hin mâichâm a thiangtir lai. Oliv sariak hen buaih mi chu a thenhlimhtir lai. 37Hi ni sarih karah hin nisiar hen ti. Churawhchun mâichâm chu a hawng thenhlimh ver lai le, âutal nih mawh zeital nih mawh a tawnghtu chu a thenhlimhnâk thiltikhonâk nih nganfâk a pêk lai.

Nisiar Thil Ap

(Num 28.1-8)

38“Nisiar hen tik a hawng tlung ding mi rang zawng khawmah kum khat mi dawrâ fa panih mâichâm tlûnah bâwlnâk a um ding asi. 39Dawrâ pakhat chu zînglei ah, a dang chu zânlei ah ap. 40Dawrâ fa masa chu sangvut kilogramme khat leh oliv sariak litre khat hen chawmh hen ap. Uain litre khat chu apnâk dingah tawih. 41Dawrâ fa panihnâk chu zânlei bâwlnâk ah mang le, oliv sariak leh sangvut khawm a tîr mi zat hen mang le, uain khawm zînglei mi zat hen. Hi hi Kei, LALPA sinah eiphung ap mi chu asi le, a rim nih hawng ka lawmhtir asi. 42Zeiliau zawngah hi duah mi thil ap hi ka umnâk Puanin tualmâi ah nan hawng ap ding asi. Chunah chun ka mi tla hen kanna tawng lai le, nan sinah thu ka sim lai. 43Chunah chun Israel mi tla hen kanna tawng lai le, ka chêu mit ser rê mi nih chun mun chu a thenhlimhtir lai. 44Puanin leh mâichâm chu ka thenhlimhtir lai le, Aron leh a fapa tla chu ka rianṭuan ding hen bâwlpu ah ka thlei na lai. 45Israel mi tla lakah ka um lai le, Kei an Pathian ka si lai. 46Kei LALPA, an Pathian Aigupta ram ah mi suakpi natu ka si ti an theih lai, churawhchun kei an sinah ka um lai. Kei, LALPA an Pathian chu ka si.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index