Search form

EXODUS 34

Lungtlêp Siam Veinihnâk

(Deut 10.1-5)

1LALPA nih Mosi sinah “A lân hâwitê hen lungtlêp panih siam le, a lânah na khuai mi lungtlêp lakah thu a um mi tê kha ka rîn nawlh lai. 2A tîm zet le, thâizîng ah hawng ka tawng ding hen Sinai Tlâng tlûnah hawng kâi. 3Âukhawm na sinah an hawng ding asi lo, chu tlâng ah chun âukhawm a langh lah na seh, tlâng bul khawmah ranrual leh dawrâ tlawngtir ding asi lo,” a ti. 4Churawhchun Mosi nih lungtlêp panih a siam le, thâi zîngtê ah LALPA nih a sinah thu a pêk mi hâwi hen Sinai Tlâng ah a kâipi rawh.

5LALPA chu sûm lakah a hawng ṭum le, chunah chun a sinah a hawng dîr, a min thenhlimh, LALPA asi ti a hawng phuang. 6LALPA chu a kiangah a hawng le, Mosi rangah a kawh, “Kei LALPA Pathian, lungkham leh siherhnâk nei mi ka si, mi nunfual leh dâwttu rokual zumhkâi ka si. 7San sâng tla tiang thutiam kil thlirtu leh sualnâk leh palhnâk ngaihdamtu ka si; sikhawmsele, an tu leh fa tla san thum leh san li thlâk tiang an nu leh an pa sualnâk ruangah ka rêp na ding mi chu an âwl rerêng lai loh,” a ti.

8Mosi chu mawhsareh hen a kûn le, LALPA chu a sawnh rawh. 9“LALPA nangmah lawmhkâng mi ka si chun kan sinah hawng ding hen ka nan ngiar, hi minung tla hi an lung a khung le, sikhawmsele, kan palhnâk leh kan sual tla hawng kan ngaihdam le, nangmah mi takah hawng kan ruat rawh,” a ti.

Thudântuk Chu Tharh Nawlh Asi

(Ex 23.14-19; Deut 7.1-5; 16.1-17)

10LALPA nih Mosi sinah, “Tu chun Israel fa tla sinah thudântuk ka siam rawh. An mâika ah thil rokual tla zei ram khawmah ti dah lo mi, hi tual tlûn zei phun lak khawmah um dah lo mi ka ti awt. Mi zawzawng nih Kei LALPA nih thil rokual ka ti kho zia an muh lai, nan rangah thil ṭihnungkâi ka ti awt ruangah. 11Tusûn ni ah dân kan pêk na mi tla hi zûl u. Amor tla, Kanaan tla, Hit tla, Periz tla, Hiv tla, Jebus tla nan kalnâk kipah ka nar vima lai. 12Nan kalnâk ding ram mi tla hen zeikhawm khatnâk nei lah u, nan rangah thihnâk thang asi awt ruangah. 13Chu hâwi ti ngâk hen an mâichâm tla siat ule, an lungphun thenhlimh tla râwk u, an pathiannu Aserah ruk tla hâu u.

14“Kei LALPA nih helnâk ka sâithiam lo ruangah pathian dang rerêng sawnh lah u. 15Chu ram ah um mi minung tla hen khatnâk nei lah ule, an pathian tla sawnh hen anna bâwl tikah ti bâk ding hen an sâwm na lai le, an pathian sinah an ap mi buh tla chu ei ding hen an lêm na lai. 16Nan fapa tla nih chubang ramdang mi nunau tla an umpi lai le, ka lakah zumhkâilo tak hen an siam na lai le, an pathian tla an sawnhtir na lebang lai.

17“Thîr hen pathian lem siam hen sawnh lah.

18“Sang Thilnu telh lo Kût nei ule, thu ka nan pêk mi hâwi hen Abib thla ah sang thilnu telh lo ni sarih sung nan ei ding asi, chu thla ah chun Aigupta ram nan suaktâk ruangah. 19“Fa tîr zawzawng, mipa fa, vulh mi ran lakah mi khawm ka tâ asi. 20Sikhawmsele, chu fa tîr sanatung tla khawm bâwlnâk ding mi dawrâ hen a ruangrûl ah tlanh u. Nan tlanh lo chun a ngâwng chu nan khiak ding asi. Mipa fa tîr chu na tlanh nawlh ding asi.

“Thil ap put lo hen ka mâika ah âukhawm hawng a langh lah na seh. 21“Ni ruk kar rianṭuannâk ding nan nei, a ni sarih ni ah chun rian nan ṭuan ding asi lo, fângzûn liau khawm si seh, phâisen nâwn liau khawm si seh.

22“Fângzûn nanna dawmh tîr ah Fângzûn Kût nei u, nan fâng nan pumh ver nûnah Basâ Kût nei u.

23“Kei LALPA, Israel Pathian hawng ka sawnh ding hen nan mipa vial kum khat ah veithum nan hawng ding asi. 24Phun zawzawng nan mâika ah mi ka nar ver na hen nan ram ka kauh lai le, hi kût pathum sungah chun nan ram lâk ding âukhawm an tum lai lo.

25“Bâwlnâk ran ka sinah nan hawng ap liauah thilnu telh mi sang nan hawng ap ding asi lo. Kalkanh Kût ah nan thah mi ran chu a thâituan tiang nan siah ding asi lo.

26“Kum siar hen nan fa thar LALPA in ah nan hawng put ding asi.

“Dawrâ fa mawh kêl fa mawh a nu nûk hâng hen suang lah u,” a ti.

27LALPA nih Mosi sinah, “Hi thu tla hi rîn rawh, hi thu tla hi asi Israel leh nangmah lakah thudântuk ka siam mi chu,” a ti. 28Mosi chu chunah LALPA sinah ni sâwmli leh zân sâwmli a um, zeikhawm a din hen a ei lo. Lungtlêp lakah thudântuk Thupêk Parâ tla chu a rîn rawh.

Mosi Sinai Tlâng ah mi A ṭum

29Mosi Sinai Tlâng ah Thupêk Parâ put hen a ṭum liauah LALPA hen anna sâwn mi ruangah a mêl chu a chêu pup le; sikhawmsele amah nih chun a theih loh. 30Aron leh mi zapi tla zawzawng nih Mosi chu an zauh le, a mêl chêu pup hen an muh le, a kiangah va kal ding hen an ṭih. 31Sikhawmsele, Mosi nih a kawh na le, Aron leh mi zapi ruitu tla zawzawng chu a sinah an va kal le, Mosi nih an sinah thu a sim rawh. 32Chu nûnah chun Israel mi tla chu a kiangah an hawng a pûm. Mosi nih Sinai Tlâng ah LALPA nih dân a pêk mi zawzawng chu a pêk na. 33Mosi nih an sinah thu a sim mi a lîm rawh chun a mêl chu puan hen a khuh. 34Mosi chu LALPA umnâk Puanin sungah LALPA sinah thusim ding hen a kal kipah puan â khuh mi chu a awng. Israel mi zapi tla sinah LALPA thupêk sim ding hen a hawng suak chun, 35a mêl chu chêu pup hen an muh. LALPA va sawnh nawlh ding hen a kal lân lo chu a mêl chu a khuh kumza.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index