Search form

EXODUS 5

Aigupta Lalchem Sinah Mosi

Leh Aron An Kal Mi

1Mosi leh Aron chu Aigupta lalchem sinah an kal le, “LALPA, Israel Pathian nih chun, ‘Hawng ka chawnglawmh ding hen ramkaro ah ka mi tla nih kût nei ding hen kaltir na seh’ a nan ti,” an ti.

2Lalchem nih chun, “Israel fa tla suaktir na ding hen a thu ka ngâi ding mi chu zei LALPA me si? Chu LALPA chu ka theih loh, Israel tla khawm ka kaltir na awt loh,” a ti na.

3Mosi leh Aron nih, “Hebrai Pathian chu kan sinah a hawng a langh asi. Ramkaro ni thum kal ah LALPA kan Pathian sinah bâwlnâk ap ding hen hawng kan siang piak râu rawh, chu hâwi kan tilo chun, ri leh râi hen mawh râl kut hen mawh hawng kan thah lai,” an ti.

4Lalchem nih Mosi leh Aron sinah chun, “Zeirangah mi le tla rianṭuan thlawrhthlâu tir na ding hen nan tum zia? Chubang sal tla chu rian lam ṭuantir na u; 5Aigupta mi tla ngâk hen nan tam dauh rawh le, tuah rianṭuan ding nan duh lo rawh asi!” a ti.

6Chu ni ah chun, Aigupta sal vêngtu leh Israel lakah rianṭuan ruitu tla chu thu a pêk na rawh. 7“Mi le tla chu tual rawhnâk siam ding hen fapawn pêk lah na rawh u, mah rang chiauah kal hen hâwl na seh. 8Sikhawmsele an tual rawh zat chu ni dang ngâk hen pakhat khawm â zûk ding asi lo. Rianṭuan ding anna khawp lo ruangah asi lo ma, an Pathian sinah bâwlnâk ap ding an ka deih mi hi. 9Hi minung tla hi rian fâk dauh ṭuantir na ule, tinh lo rê hen siam na u, chu tikah âwkrâwl thu an sim mi ngâi ding hen hun an nei lai lo,” a ti.

10Sal vêngtu tla leh Israel ruitu tla chu an suak le, Israel tla sinah, “Lalchem nih fapawn an pêk na awt lo rawh. 11Mah rang chiau va a hâwl na seh, an tual rawh lam chu a lânah mi zat nget ding asi, a ti,” an ti. 12Churawhchun mi tla chu Aigupta ram zawzawng ah fapawn hâwl ah an kal rawh. 13Sal vêngtu tla nih fapawn an pêk liauah tual rawh an siam mi zat siam ngelchel ding an nâwr na. 14Aigupta sal vêngtu tla nih Israel mi rianṭuan leikângah ruitu a lukhâi dauh hen an siah na mi tla chu an vuak na. “Zeirangah nannih tla hi a lânah tual rawh nan siam mi zat hen nan siam lo?” an ti na.

15Israel ruitu tla chu lalchem sinah an va kal le, an va phun, “Bâwipa, zeirangah hi hâwi hen hawng kan ti le? 16Fapawn pêk lo thlo hen tual rawh ding hawng kan fial! Tuah vuak hen kan um mi hi nanmah mawh asi,” an ti.

17Lalchem nih a sâng na le, “Nan zâng a zê le, rianṭuan ding nan duh lo, churuangah asi LALPA sinah bâwl ding hen kal ding nan hawng ka deih mi kha. 18Tuah rian lam va ṭuan u! Fapawn rêng an pêk na lai lo, khawmsele tual rawh lam chu a lân mi zat nget nan siam ding asi,” a ti. 19Israel ruitu tla nih chun, a lânah tual rawh nisiar hen an siam mi zat nget siam ding asi ti an theih ruangah an lawksawng rawh.

20Lalchem sinah mi chu an suak le, anmah ngâk hen an um mi hotu Mosi leh Aron hen anna tawng rawh. 21Annih nih Mosi leh Aron sinah, “Lalchem leh hotu tla huat leh thah ding hen nan kan tuah mi hi LALPA nih a muh le, rêp nan si lai,” an ti.

LALPA Sinah Mosi A Vûinâk

22Mosi chu LALPA lei â hâwi nawlh le, “LALPA zeirangah na mi le ti ti hen na rêp na? Zeirangah hinah na hawng ka fial? 23Lalchem sinah nangmah ruangrûl ah thu ka va simnâk thawk hen thungâi a rêp na, nang tâ nih na ṭangpi na lo fâwn,” a ti.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index