Search form

GENESIS 27

Isak nih Jakob Mal a Sâwmnâk

1Isak chu a tar rawh le, khua a muh lo rawh, a fapa upa dauh mi Esau chu a kawhtir na le, “Ka fapa,” a ti.

“Uai” ti hen a sâng.

2Isak nih, “Ka tar rawh le, ka thih ni a nâi rawh ti na theih. 3Na chanhtiang leh a thalzum put le, ram ah va suak rawh, sa ka rangah hawng ka kah piak. 4Ka duhzia tê hen thâw tak hen suang le, hawng ka pêk. Ka ei thluh tikah, ka thih lânah ka malsâwmnâk madungchem ka nan pêk lai,” a ti.

5Isak nih Esau rangah thu a ruah liauah Rebek nih a ngâi na ko. Churuangah Esau chu sa kah ding hen a suak kâ hen, 6Rebek nih Jakob sinah “Na pa nih Esau sinah thu a sim mi ka theih; 7‘Sa suang chia hawng ka pêk le, ka ei thluh nûnah ka thih lânte hin LALPA mâika ah mal ka nan sâwm lai,’ a ti. 8Rebek ber nih, “Ka fapa, tuhin thu ka sim mi hi ngâi rawh. 9Kal le, ranrual lakah mi a lâ a bit tel mi panih hawng lâk le, na pa duhzia tê hen buh-an ka timhtuah piak khonâk ding hen. 10Chu chu a ei ding hen a sinah na va pêk lai le, a thih lântê ah malsâwmnâk a nan pêk lai,” a ti.

11Sikhawmsele, Jakob+ nih a thawh le, a nu sinah, “Esau chu a mul thlo mi, kei chu ka tak a mil ziar mi na theih ko kha ta a. 12Ka pa nih hawng ka muai lebang chun, ka perpet mi asi ti a theih lai le; ka rangah malsâwmnâk ngâk hen siatbarhnâk lam asi lai,” a ti.

13A nu nih a sâng le, “Zei siat tal a nan barh mi chu ka tlûnah tlung seh, ka fapa; ka sim ziatê hen ti ko, va kal le, kêl chu hawng ka lâk piak ko,” a ti. 14Churawhchun a va kal le, a nu sinah a hawng put, anih nih a pa duhziatê a suang piak. 15Churawhchun, Esau puan a ṭha chem mi a kil piak mi chu a lâk le, Jakob rangah a aihtir. 16Kêl vun chu a bân tla, a ngâwng a mul umlonâk ah a menh piak. 17An thâw tak leh sang em mi chu a puttir.

18Jakob chu a pa sinah a va kal le, hi hâwi hen a sim, “Pa” a ti.

Anih nih, “Uai” ti hen a sâng. “Ka fapa lakah a zei mi me na si?” a ti.

19Jakob nih a sâng le, “Na fapa upa dauh mi Esau ka si; na sim ziatê hen kan ti piak rawh hi, zângfahtê hen to le, ka nan put piak mi buh-an hi ei rawh, mal na hawng ka sâwm ding hen,” a ti.

20Isak nih, “Zeitin khulrang tak hen na tawng kho le, ka fapa?” a ti.

Jakob nih a sâng le, “LALPA na Pathian nih tawng ding hen hawng ka ṭangpi asi,” a ti.

21Isak nih Jakob sinah, “Zângfahtê hen ka nan muai kho ding hen hawng ka naih dauh nik; Esau tak ma na si?” a ti.

22Jakob nih a pa chu a va naih le, a muai le tihin a ti, “Na aw-hâu nih Jakob a bangh le, na bân lam chu Esau bân a bangh fâwn!” a ti. 23Esau hâwi hen a bân a mul thlo ruangah Jakob asi ti a theih kho lo. Mal a sâwm awt bâitê ah, 24“Esau na si tak bei ne,” a ti.

“Ka si ta a,” ti hen a sâng.

25Isak nih, “Buh-an chu hawng put rawh ma ne, ka ei thluh tikah mal ka nan sâwm lai,” a ti. Jakob nih a pêk rawh; chun, din ding hen uain khawm a pêk. 26Chun, a pa nih tihin a ti, “Ka fapa, hawng ka naih le, hawng ka châwchawk,” a ti.

27Châwchawk ding hen a va naih liauah Isak nih a puan a nimh piak le, churawhchun mal a sâwm rawh. Hi hâwi hen a ti, “Ka fapa rim chu LALPA nih mal a sâwm mi phâisen rim hâwi si seh. 28Pathian nih vân ah mi dâmtî a nan pêk hen na phâisen chu ṭhat tir seh! Fâng leh uain tamtak a nan pêk seh! 29Phun tla chu na to-aw si na sele, mi tla chu na mâika ah kûn na seh. Na unau tla zawzawng tlûnah lâirêltu si rawh, na nu thlâk tla chu na mâika ah kûn na seh. Siat an barhtu chu siatbarh hen um na seh, mal a nan sâwmtu chu malsâwm hen um na seh,” a ti.

Esau nih Isak sinah

Malsâwmnâk a Ngiar mi

30Isak nih mal a sâwm mi chu a lîm le, Jakob kal kâ hen, a unaupa Esau mâng a tâwi mi a hawng tlung. 31Thâw tak hen a suang le, a pa sinah a hawng put. Hi hâwi hen a ti, “Pa, zângfahtê hen to le, mal na ka sâwm khonâk ding hen, buh-an kan put piak mi hi ei rawh,” a ti.

32“Âu me na si?” ti hen Isak nih a deih.

“Na fapa upa dauh mi Esau ka si,” ti hen a sâng.

33Isak chu a thir le, â nîn hep, chun, hi hâwi hen a ti, “Sa a thah le, buh-an hawng ka pêktu kha âu me si ne? Na hawng lântê khan ka ei ving rawh. Ka malsâwmnâk madungchem ka pêk ving rawh, churuang chun amah nih â ting pawt rawh,” a ti.

34Esau nih chu chu a theih kâ hen, ngaihsia tak leh fâk tak hen a ṭap le, tihin a ti. “Pa, na malsâwmnâk hawng ka pêk bâk ma a!” a ti.

35Isak nih a sâng le, “Na unaupa a hawng le, hawng ka perpet le, na malsâwmnâk chu a lâk ving rawh,” a ti.

36Esau nih, “Hi hi hawng ka perpetnâk veinih asi rawh, a min ah Jakob ti ding rêng a si ngâk. Fapa tîr ka sinâk tâ nih hawng ka suh, tuah malsâwmnâk ka ting ding mi hawng ka lâk piak ving fâwn; kei rangah malsâwmnâk na zuah lo thlo ma?” a ti.

37Isak nih a sâng le, “Anih chu na hotu rangah ka siam ving rawh, a unau tla zawzawng khawm a to-aw ah ka siah ver na rawh; fâng leh uain khawm ka pêk hep rawh. Tuah chun, ka fapa, nang rangah zeikhawm ti kho ka nei lo rawh,” a ti.

38Esau nih a pa chu a ngiar vima rih: “Malsâwmnâk pakhat cho mazei na nei? Pa, mal hawng ka sâwm bâk me!” ti hen a ṭap nawlh fâwn.

39Churawhchun Isak nih,

“Vân ah mi dâmtî na rangah a um lo,

Phâisen ṭha khawm na rangah a um lo rawh.

40Nangmah riamnâm hen na nung lai le,

Na unaupa to-aw na si lai;

Na hel tikah a thu tangah na um mi chu na suak teh lai,”

a ti.

41A pa nih Jakob rangah malsâwmnâk a pêk ving ruangah Esau nih Jakob rangah a hua rawh. A thinlung hen, “Ka pa thih ni ding a nâi rawh, chu tikah Jakob chu ka thah nget lai,” a ti.

42Sikhawmsele, Rebek nih Esau thiltum chu a theih le, Jakob a kawh le, “Ngâi rawh, na unaupa Esau nih thah ding an tum. 43Tuah ka fapa, ka sim mi hi ngâi rawh, Haran ah ka ṭapa Laban sinah kal sawm rawh; 44chunah chun zeimaw tiang ding va um le, na unaupa thinthawk a reh hen, 45a lakah thil na ti mi tla a philh dep tiang hen. Chun, an kîrpitu ding âumawh ka hawng fial lai. Zeitin ka fapa nan panih hen ni khat ah ka nan thlâu ving na zia lai?” a ti.

Isak nih Jakob chu Laban sinah a Fial

46Rebek nih Isak sinah, “Esau nupi ramdang mi nunau tla hi ka diarh lo rawh. Jakob nih Hit mi nunau pakhat a umpi bâk asi chun ka thih phah lai rawh,” a ti.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index