Search form

GENESIS 28

1Isak nih Jakob a kawh le, chibâi a bûk le, a sinah, “Kanaan ram mi nunau umpi lah. 2Chu ngâk chun Mesopotamia ram ah kal le, na pu Bethuel dâwngsung leikângah mi nunau na nu ṭapa Laban fanu lakah mi pakhat va umpi rawh. 3Pathian zeizawng tikhotu nih nanna umhnâk chu malsâwm sele, fa tamtak an pêk na seh; churawhchun phun tamtak pa hawng si rawh! 4Abraham rangah mal a sâwm mi hâwi hen, nang leh na thlâk tla mal an sâwm na seh, Abraham sinah a pêk mi na umnâk ram hi a ting rawh!” a ti. 5Isak nih Jakob chu Mesopotamia ram ah Aramean mi Bethuel fapa leh Rebek, Jakob leh Esau nu ṭapa Laban sinah a fial rawh.

Esau nih Nupi Dang a nei Nawlh

6Isak nih Jakob rangah mal a sâwm le, nupi hâwl ding hen Mesopotamia ram ah a fial ving ti Esau nih a theih rawh. Mal a sâwm liauah Kanaan ram mi nunau umpi lo ding a ti mi thu khawm a theih fâwn. 7Jakob nih a nu leh a pa thu ngâi hen Mesopotamia ram ah a kal mi khawm a theih. 8Esau nih chun a pa Isak nih Kanaan ram mi nunau a duhpi lo ti khawm a theih. 9Churawhchun Esau chu Abraham fapa Ismael sinah a va kal le, a fanu Mahalat, Nebaioth farnu chu a va umpi.

Bethel ah Jakob Mang Manh

10Jakob nih Bersheba a kaltâk le, Haran leiah â thawh. 11Nî tlâk rawp ah mun thenhlimh a va tlung le, chunah um mun a khuar. Lung â sanhtling le, a it rawh. 12Mang a manh le, leilâk tual thawk hen vân sunh khet mi a muh, chu lakah chun vân minung tla ṭum leh kâi mi a muh. 13LALPA chu a kiangah a dîr ko. “Kei, LALPA, Abraham leh Isak Pathian ka si,” a ti. “Hi na itnâk ram hi nang leh na thlâk tla rangah kan pêk na lai, a ti. 14Na thlâk tla chu tual ah valeidip zat hen an zan lai. Mun kipah an ram an kauh vima lai le, nang leh na thlâk tla ruangah phun zawzawng mal ka sâwm na lai. 15Na kalnâk zawzawng ah na sinah um hen ka nan kilkâwi lai, hi ram ah hin ka nan kîrpi nawlh lai. Thu ka nan tiamh mi zawzawng a tling lân lo chu ka nan kaltâk lai loh,” ti hen.

16Jakob chu a hawng a ṭhang le, hi hâwi hen a ti. “LALPA chu hinah a um ko ma hi a! Hi mun ah a um mi ka theih loh ma hi a!” a ti. 17A ṭih le tihin a ti, “Hi mun hi ṭihnung a kâi a! Pathian in asi ding asi; vân kawtkâ â awng mi ma hi a!” a ti.

18A thâituan zîng ah Jakob chu a thawk le, â tlinh mi lung chu a lâk le, theihkumzanâk ding hen a phun. Pathian sinah ap ding hen oliv sariak a tawih. 19Chu mun min ah Bethel+ ti hen a sak. Chunah mi khuapi chu (Luz ti asi.) 20Churawhchun Jakob nih Pathian sinah thutiamnâk a nei: “Ka khualtlâwngnâk ah ka sinah na um hen na ka zauhkhenh awt vima chun buh leh nipuan khawm hawng ka pêk hen, 21chun, ka pa in leiah damtê hen ka hawng kîr asi chun nang chu ka Pathian na si lai. 22Hi theihkumzanâk lung ka phun mi hi nangmah sawnhnâk mun ding a hawng si lai le, na ka pêk mi thil zawzawng lakah mi parâ lû pakhat ka nan pêk lai,” ti hen.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index