Search form

GENESIS 33

Jakob leh Esau Anna Tawngnâk

1Jakob nih Esau chu minung zali hen a hawng mi a muh le, a fa le tla chu Leah, Rakel, leh a nupisûn panih tla sinah a ṭhen khuai na. 2A mâilei chem ah a nupisûn leh an fa tla, chu zûl ah Leah leh a fa tla, a madungchem ah Rekel leh Josef. 3Jakob chu mâilei chem ah a va kal le, vei sarih tual lei kûn hen a mâimûk. 4Esau chu a tawng ding hen amah leiah chun a va tek le, a râlthuam chu a kiangah a siah le, a va châwchawk, an ṭap vevê rawh. 5Esau chu â hâwi le, nunau ngâksia tla chu a muh na le, “Na sinah mi minung tla hi âu tla me an si?” ti hen a deih.

Jakob nih, “Ka u, hi bang tla hi Pathian ka lakah a ṭha ruangah hawng ka pêk mi asi,” a ti. 6A nupisûn tla chu an fa tla hen an hawng le, Esau rangah mâi an mûk. 7Chun, Leah leh a fa tla khawm an hawng, a dawnghnâk ah Rakel leh Josef khawm an hawng le, mâi an mûk bâk.

8Esau nih, “Zapi minung ka tawng na mi kha zeitin mi? Kha zei zia?” a ti.

Jakob nih a sâng le, “Na thinlung ka tawng khonâk ding ka ti le ma kha a,” a ti.

9Esau nih, “Unaupa, kei khawm ka nei tâwk rêng bâk, na neih chu nangmah nih a ting ko,” a ti.

10Jakob nih, “Silo, zângfahtê hen na thinlung ka tawng tak mi asi chun ka thilpêk hi lâk rawh,” a ti. Na mêl muh hi Pathian mêl muh tluk hen ka ruat, tuah hi tluk hen ka lakah na ṭha. 11Na rangah ka hawng put mi lâwmman hi zângfahtê hen hawng ka lâk piak ko; Pathian ka lakah vêl a nei le, ka herh mi zawzawng a hawng ka pêk,” a ti, lâwmman chu a lâk lân lo a pêk êu.

12Esau nih, “Kal ding hen lam kanna tîm lai rawh, kei mâilei chem ah ka ka lai,” a ti.

13Jakob nih a sâng le, “Ngâksia tla hi an chak lo zia leh dawrâ leh ranrual leh an fa tla kilkâwi an herh zia khawm na theih ko; tâwm khulrang hen kan khalh na asi chun ni khat ko khawm an thi ver lai. 14Kan mâilei ah kal vima le, kan ranrual leh an fa tla hen Edom ram na umnâk tiang hen dusah hen kan zûl lai,” a ti.

15Esau nih, “Takhan chun, ka minung zeimaw zat chu ka nan mâk piak na lai ne,” a ti.

Sikhawmsele, Jakob nih a sâng le, “Zeirang khawm a herh loh, na thinlung tawng cho ka duh,” a ti. 16Churawhchun, chu ni chun Esau chu Edom ram leiah chun a kîr rawh. 17Sikhawmsele, Jakob chu Sukot ah um mun a khuar, a ran leh amah umnâk ding hen. Churuangah asi chu mun chu Sukot an ti nâk chu.

18Jakob chu Mesopotamia ram thawk hen a kîr le, Kanaan ram ah Sekem khuapi chu him tak hen a va tlung rawh, khuapi kiangah mi phâiah um mun a khuar. 19Chu mun khingkhuai chu Sekem pa Hamor thlâk tla thawk hen tangka zâ hen a châwk. 20Chunah chun mâichâm a siam le, a min ah Israel Pathian min suangkhâng hen “El-elohe’’ a ti.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index