Search form

GENESIS 35

Jakob chu Bethel ah Pathian nih Mal a sâwm

1Pathian nih Jakob sinah, “Bethel ah va kal sawm le, chunah chun va um rawh, na unaupa Esau thawk hen na tek liauah, na sinah Pathian â langhnâk mun ah mâichâm va siam rawh,” a ti.

2Churawhchun, Jakob nih a dâwngsung leh a sinah um mi tla zawzawng sinah chun, “Ramdang tla pathian nan nei mi kha lawnh u, nanmah kha a thenhlimh ule, ni le puan thiang a aih u. 3Hi mun hi kan mâk awt rawh le, Bethel ah kan kal lai rawh; chu ni ah ka lawksawngnâk hawng ka ṭangpitu leh ka kalnâk zawngah ka sinah um tâwn mi Pathian rangah mâichâm ka siam awt,” a ti. 4Churawhchun, ramdang pathian an nei mi zawzawng leh an nabeh anna beh mi tla Jakob sinah an pêk hep le, Sekem kiang mi Oak thing tangah a phûm rawh.

5Jakob leh a fapa tla anna thawh awt liau chirah, an kiangkam mi khua lakah um mi tla tlûnah thil ningṭihkâi a hawng tlung le, Jakob leh a fa le tla chu an ṭhâwl na lo rawh. 6Chun Jakob chu a minung tla hen Luz khua, Bethel an ti mi ah chun an tlung rawh, chu chu Kanaan ram asi. 7Chunah chun mâichâm a siam le, “El-Bethel’’ (Bethel Pathian) ti hen min a sak, a unaupa thawk hen a hawng tek liauah chunah amah Pathian tak â langh ruangah. 8Rebek umhtu Deborah chu a thi le, Bethel simlei ah Oak thing tangah an vûi rawh. Churuangah a min ah “Allon-bakuth’’ (Ṭahnâk Oak Thing) ti asi.

9Jakob chu Mesopotamia ram ah mi a hawng kîr liauah, Pathian a sinah a hawng a langh nawlh le, mal a sâwm. 10Pathian nih a sinah, “Na min chu Jakob asi le, sikhawmsele, tu thawk hen Israel ti asi lai rawh,” a ti. Churawhchun Pathian nih Israel ti hen a sak rawh. 11Chun, Pathian nih a sinah, “Kei Pathian chak zeizawng tikho ka si. Fa tamtak nei le, phun tla chu nangmah thawk hen thlâk mi si seh, nang chu lal tla thlâktu na si lai. 12Abraham leh Isak ka pêk mi ram hi ka nan pêk lai le, na nehnûnah na thlâk le tla rang khawm ka pêk lai,” a ti. 13Churawhchun Pathian nih a kaltâk rawh. 14Pathian hen anna sâwnnâk mun ah theihkumzanâk lung Jakob nih a phun le, uain leh oliv sariak a tawih le, a ap rawh. 15Chu mun chu a min ah Bethel a ti.

Rakel Thih Thu

16Jakob leh a dâwngsung tla nih Bethel chu an kaltâk le, Efrat thawk hen tâwm an kal le, Rakel chu nâu a neih tik a tlung rawh, a nâu neih a har thlo. 17A nganfâk chu a zual dadauh le, nâu dawmhtu nih a sinah, “Rakel, lâu lah, fapa dang na ring awt ma hi a,” a ti. 18Sikhawmsele, a chelh lo vima le, a thi awt ko rawh, a fapa min chu Benoni+ a sak ta, a pa lam nih chun Benjamin+ ti hen a sak.

19Rakel chu a thi rawh chun Efrat, tûliau ah Bethlehem an ti mi lam vâu ah an vûi. 20Jakob nih theihkumzanâk ding hen lung a phun le, tûtiang hen Rakel thlân ti singsiahnâk a um. 21Jakob chu â ṭhial vima le, Eder insâng khatlei varâl ah um mun a siam.

Jakob Fapa Tla

(1 Chr 2.1-2)

22Jakob chu chu ram ah a um liau chun, Reuben nih a pa nupisûn Bilhah chu a ihpi le, Jakob nih a theih le, thungâi a thinthawk.

Jakob nih fapa leinih a nei. 23Leah fa tla chu, Reuben, (Jakob fapa upachem), Simeon, Levi, Juda, Isakar, leh Jebulun. 24Rakel fa tla chu Josef leh Benjamin. 25Rakel to-awnu Bilhah fa tla chu Dan leh Naphtali. 26Leah to-awnu Zilpah fapa tla chu Gad leh Aser. Hi bang fapa tla hi Mesopotamia ram ah suak mi tla an si.

Isak Thihnâk

27Jakob chu a pa Isak, Hebron kiangah Mamre ah a um mi leiah a va kal le, chu chu Abraham leh Isak umnâk asi. 28Isak chu kum zâ leh kum sâwmriat upa asi, tar khen hen a thi; 29a fapa Esau leh Jakob nih an vûi.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index