Search form

GENESIS 40

Josef nih Rêngtlâk Mi tla Mang

A Simhfiang Mi

1A nehnûn chun Aigupta lalchem uain pêktu leh sang pêktu chu lalchem lakah thilsual an ti le, 2hi rianṭuantu panih tlûnah lalchem chu a thinthawk le, 3Josef an siahnâk rêngin ah munkhat hen rêngtlâk vêngtu hotu in ah an siah na. 4Rêngin ah hun sâwt tak an um le, hotu nih Josef chu anmah zauhkhenhtu ah a siam.

5Zân khat chu rêngin ah uain pêktu leh sang pêktu mang an nei vevê le, an mang chu â dang vevê. 6Josef chu zînglei ah an sinah a va kal le, an zûr thlo mi a muh na le, 7a deih na, “Tusûn chu nan zûr chiam e!” a ti na.

8Annih nih, “Kan panih hen mang kan nei vevê le, chu mang chu hawng kan simhfiangtu pakhat khawm an um lo ruangah,” an ti.

Josef nih, “Mang simhfiangnâk pêk khotu chu Pathian asi, nan mang chu hawng ka simh ko u me,” a ti.

9Churawhchun, uain pêktu nih, “Ka mang leiah grep zûn, 10ṭeng pathum nei mi ka mâika ah a um. A nah chu mawhsareh hen a hawng chawrh sawm le, a hawng pâr le, a rah chu a hawng min rawh. 11Lalchem hâi chu ka put le, grep rah chu ka lâk le, ka sûr le, lalchem ka pêk,” a ti.

12Josef nih, “Chu umzia chu hi hi asi: Ṭeng thum chu ni thum asi. 13Ni thum nûnah lalchem nih an suah lai le, a nan ngaihdam lai le, na rianṭuannâk muntê an luahtir nawlh lai. A lânah uain pêktu na si hâwi ber hen lalchem rangah uain hâi na pêk lai. 14Zângfahtê hen thil zeizawng ah na sul-le-lam a tluang tikah hawng ka theihkumza bâk le, rêngin ah mi hi suak ding hen hawng ka ṭangpi le, lalchem sinah hawng ka sim piak rawh. 15A lân khawmah Hebrai ram thawk hen a thup hen fîr hen ka um le, hi Aigupta ram khawm hin rêngtlâk phah rê ding hen zeikhawm ka ti lo,” a ti.

16Sang pêktu pa nih uain pêktu mang Josef nih sunhsak tak hen a simhfiang piak mi chu a muh le, Josef sinah, “Kei khawm mang ka nei bâk; ka lû ah kho pathum ka chuanh. 17A sungah lalchem tî-le-râwl chi kip a um le, chu chu vâ nih an ei,” a ti.

18Josef nih, “Hi hi a umzia asi: Kho pathum kha ni thum asi. 19Ni thum ni ah lalchem nih an suah lai le, na lû an tan phak lai! Na ruak chu thing pâr ah an thlâi lai le, na sa tla chu vâ nih an ei lai,” a ti.

20A ni thumnâk ah, Pharo suak cham puai lakah rianṭuantu zawzawng a sâwm na le, uain pêktu leh sang pêktu tla hotu chu rêngin ah mi chu a suah na le, a milian tla mâika ah chun a kawh na. 21Josef nih an mang a simhfiang piak na mi hâwi hen, uain pêktu chu amah rianṭuan muntê a luah nawlh le, 22sang pêktu hotu lam chu an thlâi rawh.

23Sikhawmsele uain pêktu nih chun Josef chu a theih phanh lo rawh le, a philh ving.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index