Search form

LEVITICUS 10

Nadab Leh Abihu Sualnâk

1Aron fapa Nadab leh Abihu nih meikhêng an lâk vevê le, meiṭil an siah le, rimthâw an phulh le, LALPA sinah an pêk. Sikhawmsele chu mei chu a thenhlimh loh. LALPA nih ap ding hen thu a pêk na mi asi lo ruangah. 2Mawhsareh hen LALPA nih mei a hawng thlâk le, an panih hen a khangh na le an thi. 3Churawhchun, Mosi nih Aron sinah, “Hi hi asi LALPA nih âuzawng ka rianṭuantu nih chun ka thenhlimhnâk hi an zah ding asi, ka mi le sinah ka rokualnâk ka langh lai a ti liauah a sim mi chu,” a ti. Sikhawmsele Aron chu a dâisip. 4Mosi nih Misael leh Elzaphan, Uziel fapa tla, Aron patê chu a kawh na le, an sinah, “Hawng ule, hinah nan unau ruak Puanin thenhlimh ah mi hi lâk ule, riakmun lênglei ah siah u,” a ti. 5Churawhchun an kal le, ruak chu a puan tuam lakah an tleih le, Mosi nih thu a pêk na mi hâwi hen riakmun lênglei ah an kalpi rawh. 6Churawhchun Mosi nih Aron leh a fapa tla Eleazar leh Ithamar sinah, “Nan lungfâk ruangah nan nipuan thlêk lah ule, nan lû khawm thurhtir lah u. Chu hawi nan ti chun nan thi lai le, zapi pumpi tlûnah LALPA a thinrun lai. Sikhawmsele LALPA mei thlâk nih a thah na mi asi ruangah nan unau Israel tla lam chu an lungfâk siang asi. 7Hi Puanin tualmâi khawm hi kaltâk lah u, nan thi sual lai. LALPA sariak thuh hen thenhlimh tir mi nan si ruangah,” a ti. Churawhchun Mosi nih a sim mi hâwi hen an ti.

Bâwlpu Tla Rangah Dân Tla

8LALPA nih Aron sinah, 9“Nang leh na fapa tla chu zû mawh uain mawh nan din hen ka umnâk Puanin sungah nan hawng lût ding asi lo, nan hawng lût ni ah nan thi lai. Hi hi nan thlâk tla zawzawng nih nan kil thlir ding mi dân chu asi. 10Pathian tâ leh mang salam mi thil nan thliar ding asi. Dân lakah thenhlimh mi leh thenhlimh lo mi khawm nan thliar ding asi. 11Mosi mang hen dân kan pêk na mi zawzawng tla kha Israel mi tla rangah nan sîntir na ding asi,” a ti.

12Mosi nih Aron leh a fapa panih an um rih mi tla, Eleazar leh Ithamar sinah, “LALPA sinah eiphung ap mi a leifuan fâng ap mi lâk ule, chu hen sang thilnu telh loh hen siam ule, chu chu mâichâm kiangah ei u, chu thil ap chu a thenhlimh ruangah. 13Mun thenhlimh ah ei ule, eiphung LALPA sinah ap mi tla lakah mi nang leh na fapa tla tingvo asi ruangah. Chu chu LALPA nih thu hawng ka pêk mi asi. 14Sikhawmsele, nang leh na dâwngsung tla nih chun a î-âwm leh a kê nan ei kho lai, a bîk hen bâwlpu rang dingah LALPA sinah thilpêk asi ruangah. Dân hâwi hen a thenhlimh mi mun ah nan ei kho lai. Hi ap mi thil hi nang leh na fa tla nih kawmhnâk thil ap Israel fa le nih an pêk mi thawk hen nanna ting ding mi asi ruangah. 15Ei phung ap mi a thâu LALPA sinah an pêk liauah, a kê leh a î-âwm an hawng put ding asi. Hi bang hi LALPA thupêk hâwi hen nanmah leh nan fa tla vo kumza ding asi,” a ti. 16Mosi nih sual thil ap rang dingah kêl thu a deih mi chu duah asi rawh ti a theih. Churuang chun Eleazar leh Ithamar tlûnah a thinrun le, thu a pêk. 17“Zeirangah sual rangah ap mi mun thenhlimh ah nan ei lo zia? Mi zapi tla sual thiangnâk ding hen LALPA nih a nan pêk na mi thil thenhlimh tak asi mi. 18Puanin thenhlimh ah a thî khawm nan hawng put lo, thu ka nan pêk na mi hâwi hen chunah chun bâwlnâk sâ chu nan ei ding asi mi,” a ti. 19Aron nih a sâng le, “Tusûn ah hi sual ruangah ap mi ka ei asi chun zei hâwi asi lai rawh ne? Chu nih LALPA chu a lawmhtir khun awt ma? Tusûn hin zapi tla nih sual thil ap chu LALPA sinah an hawng pêk le, duahphung thil ap khawm an hawng put, chu khawmah ka rangah ṭihnung a kai nget rih,” a ti. 20Chu chu Mosi nih a theih rawh chun a lungâwi rawh.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index