Search form

LEVITICUS 16

Tlanhnâk Ni

1Aron fapa panih mei thenhlimh lo LALPA sinah an ap ruangah thah an si mi nehnûnah LALPA nih Mosi sinah thu a sim. 2“Na unaupa Aron chu tuhin Mun Thenhlimh Chem ah puanzâr pîn leiah a kal ding hen a tik tak ah a kal ding asi ti simh, Thudântuk Bâwm sinh tlûnah sûm lakah ka a langh ruangah. A ngâi lo chun thah asi lai. 3Chawchal sual rangah ap ding mi leh dawrâ duahphung thil ap rangah a hawng put tik cho ah Mun Thenhlimh Chem ah a lût kho lai,” a ti. 4Churawhchun LALPA nih hi bang sîntirnâk tla a pêk. Aron chu Mun Thenhlimh Chem ah a lût lânah tak â khawlh lai le, bâwlpu thuam puannêm kawrfual leh kekawr, tâisâwm, upâwng hen â thuam ding asi. 5Israel mipi nih Aron chu kêl chal panih sual thil ap rangah leh dawrâ chal duahphung thil ap rangah ap ding an pêk ding asi. 6Chawchal chu amah leh a dâwngsung tla sual thiangnâk ding hen bâwlnâk ah ap ding asi. 7Churawhchun, kêl panih chu LALPA umnâk Puanin mâi ah a kalpi ding asi. 8Chunah chun lung panih hen chamchawhnâk a nei lai le, pakhat chu “LALPA rang ding,” pakhat dang chu “Azazel.” 9Chamchawh hen LALPA rangah a tlû mi kêl bâwlnâk ah mang ding mi chu Aron nih sual thil ap rangah a mang ding asi. 10Azazel rangah a tlû mi kêl chu LALPA sinah a nung hen pêk ding; chun ramkaro ah Azazel leiah, zapi tla sual thiangnâk ding hen a thlah ding asi. 11Aron nih amah leh a dâwngsung tla rangah chawchal sual thil ap rangah a ap chun, 12mâichâm lakah mi meiṭil khêng hen a lâk lai le, zapei nih rimthâw hen Mun Thenhlimh Chem ah a kalpi lai. 13Chunah LALPA mâika ah chun mei lakah rimthâw chu a phulh lai le, a rimthâw khû nih chun Thudântuk Bâwm sinh chu a phenh lai le, a muh lai lo le, a thi lai lo. 14Chu chawchal thî chu a lâk lai le, a kutdawng hen, a tawh lai le, Thudântuk Bâwm mâilei ah a theh lai le, Thudântuk Bâwm mâilei ah vei sarih a theh lai. 15Chu nûnah chun kêl chal chu zapi rangah sual thil ap rangah a thah lai le, a thî chu Mun Thenhlimh Chem ah a va lûtpi lai le; a sinh tlûn leh Thudântuk Bâwm mâilei ah a theh lai, chawchal thî a ti mi ziatê hen. 16Hi hâwi hen Israel mi tla nâwmnâk leh an sual zawzawng chu Mun Thenhlimh Chem ah thenhlimh tir dân chu siam ding asi. Hi hi LALPA Puanin ah a ti ngelchel ding asi, riakmun lâi ah nâwmtâm mun ah a um ruangah. 17Aron chu Mun Thenhlimh Chem ah a va lût hen dân hâwi hen thenhlimhnâk a va siam hen a hawng suak lân lo chu Puanin sungah âukhawm um ding asi lo. Amah leh a dâwngsung rangah leh mi zapi zawzawng rangah a va timhtuah rawh chun, 18a hawng suak lai le, mâichâm ah duahphung thil ap a ap lai le, a thenhlimh tir lai. Dawrâ thî leh kêl thî a lâk lai le, mâichâm kî zawzawng chu a buaih lai. 19Mâichâm chu a kutdawng hen thî vei sarih a theh lai. Hi hâwi hen Israel mi zapi sualnâk chu a thiangtir hen a thenhlimh tir ding asi.

Thlah Mi Kêl

20Aron nih Mun Thenhlimh Chem, LALPA umnâk Puanin leh mâichâm tla thenhlimh tirnâk dân a timhtuah thluh rawh chun, Azazel rangah ti mi kêl nung chu LALPA sinah a pêk lai. 21A kut khiang khinih kêl lû tlûnah a thâng lai le, diklonâk, sualnâk leh Israel mi zapi tla helnâk a phuang lai le, kêl lû ah a thâng lai. An ruat mi minung nih kêl chu ramkaro ah a khanh ving lai. 22Chu kêl nih an sual zawzawng tla chu minung umlonâk mun ah a kalpi lai rawh. 23Aron chu Puanin ah a lût hen Mun Thenhlimh Chem ah a lût lânah â ruk mi bâwlpu thuam a lît lai le, chunah chun a nipuan a siah lai. 24Mun Thenhlimh ah tak â khawlh ding asi, amah nipuan â ruk nawlh ding asi. Chu nûnah a va suak lai le, amah leh mizapi sual rangah duahphung thil ap a pêk ding asi. 25Ran thâu tla chu sual thil ap rang dingah mâichâm ah a duah ding asi. 26Azazel leiah kêl khalhtu chu riakmun a hawng tleng lânah a nipuan tla a suk hen tak â khawlh ding asi. 27Chawchal leh kêl sual thil ap rangah mang mi sual thiangnâk ding hen a thî Mun Thenhlimh Chem ah put mi chu riakmun lênglei ah put hen duah ding asi. A vun, a sâ, a riltê tla duah hep ding asi. 28Chu duahtupa chu riakmun a hawng kîr lânah a nipuan suk hen tak â khawlh ding asi.

Tlanhnâk Ni Ulh Dân

29Hi nûnthâi mâilei zawng khawmah hi bang dân tla hi nan mang ding asi. A thla sarihnâk ni râ ni ah Israel mi tla leh ramdang mi an lakah um mi tla nih chun an ulh hen zei rian khawm an ṭuan ding asi lo. 30Chu ni ah chun, an sualnâk zawzawng lakah mi thenhlimhnâk ding hen an timhtuah ding asi, chu tikah dân hâwi hen thenhlimh an si khonâk ding hen. 31Chu ni chu, ni thenhlimh ni asi ding asi. Chu ni ulhtu nih buh ngei hen rian rerêng ṭuan ding asi lo. Hi nûnthâi mâilei khawmah hi dân hi nan zûl kumza ding asi. 32Bâwlpu Lalchem a rua dingah birhtir mi leh a pa ruangrûl ah mun luahtu nih chu thenhlimhnâk dân chu a timhtuah ding asi. 33Bâwlpu nipuan hen â thuam lai le, Mun Thenhlimh Chem, LALPA umnâk Puanin, mâichâm, bâwlpu tla leh mi zapi zawzawng thenhlimh tirnâk dân a timhtuah ding asi. 34Hi bang dân tla hi, hi nûnthâi tiangah nan mang kumza ding asi. Hi dân hi Israel mi zapi tla sual thenhlimh tirnâk ding hen kum khat ah veikhat nan nei ding asi. Mosi nih LALPA thupêk hâwi hen a ti rawh.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index