Search form

LEVITICUS 23

Phung Kût

1LALPA nih Mosi sinah, 2Pathian sawnh ding hen Israel mi tla an hawng a pûm liauah phung Kût an mang dân ding a pêk. 3Ni ruk kar nan rianṭuannâk ding nan nei, sikhawmsele a ni sarih ni chu Dinhni asi ti theihkumza u. Chu ni ah chun rianṭuan lah ule, Pathian sawnh ding hen a pûm u. Dinhni chu LALPA tâ asi, zei mun tal ah um khawm ule mang vima u. 4A tik ni vima ah Kût ni chu phuang u.

Kalkanh Kût Leh Sang Thilnu Telh Loh

5Kalkanh Kût chu LALPA zah zauhtirnâk ding hen ulh u, a thla khatnâk ni leili nî a tlâk ah a dawmh u. 6A ni leinga ni ah chun Sang Thilnu Telh loh Kût dawmh u, ni sarih kar vial chu sang thilnu telh mi nan ei ding asi lo. 7A ni khat ni ah Pathian sawnh ding hen nanna pûm lai le, mah rianṭuan âukhawm nih ṭuan ding asi lo. 8Ni sarih kar chu eiphung thil ap LALPA sinah ap u. A ni sarih ni ah Pathian sawnh ding hen nanna pûm lai le, âukhawm nih mah rian nan ṭuan ding asi lo. 9-10LALPA nih a nan pêk na mi ram nan va luah tikah fâng nan ât chun nan fatêl masachem bâwlpu sinah nan pêk ding asi. 11Anih nih chun a bîk hen LALPA sinah thil ap ah a pêk lai le, chu hâwi hen pawm nan si kho lai rawh. Bâwlpu nih Dinhni a thâituan ah a ap ding asi. 12Fâng nan ap mi ni ah duahphung thil ap bâwlnâk khawm dawrâ fa a mipa kum khat mi sâwinâk umlo mi ap u. 13Chu lakah oliv sariak hen chawmh mi kilogramme nih eiphung thil ap rangah pêk u. Hi thil ap rim nih LALPA chu a lawmhtir asi. Chu lakah chun uain litre khat nan pêk ber ding asi. 14LALPA sinah hi hâwi thil ap nan pêk lân chun hi fa thar chu a fâng mawh, rêu mi mawh, sang hen mawh nan ei ding asi lo. Hi dân hi nan thlâk tla zawzawng khawm nih an mang kumza ding asi.

Fângzûn Kût

15Dinhni thâituan LALPA sinah fatêl nan pêk mi ni thawk hen zarhkar sarih tling khap hen rêl u. 16A ni sâwmnga ni Dinhni vei sarih nûnah fa thar dang apnâk LALPA sinah pêk u. 17Dâwngsungkhur kip nih sang tlang nih put hen LALPA sinah a bîk hen thilpêk ap ding asi. Sang tlang kip sangvut kilogramme nih sang thilnu chawmh hen em mi, fângzûn dawmhtîr thil ap rangah LALPA sinah pêk ding asi. 18Mi zapi tla nih chun sang hen dawrâ fa kum khat mi pasarih, chawchal pakhat, kêl panih simsâwinâk umlo mi a pêk ding asi. LALPA rangah duahphung thil ap leh fâng thil ap leh uain thil ap chu a rual hen an ap ding asi. Hi bang apnâk rim nih LALPA chu a lawmhtir asi. 19Kêl chal pakhat, sual thil ap rangah, dawrâ fa a mipa kum khat mi panih kawmhnâk thil ap rangah ap u. 20Bâwlpu nih sang leh dawrâ fa panih hen bâwlpu tla rangah a bîk hen thilpêk ah LALPA sinah ap seh. Hi bang thil pêk tla hi a thenhlimh asi. 21Chubang ni ah chun âukhawm nih rian nan ṭuan ding asi lo, Pathian sawnh hen nanna pûm ding asi. Nan thlâk tla nih hi nûnthâi ah zeiliau zawngah an umnâk mun kipah hi dân hi an mang vima ding asi. 22Na phâisen fâng na ât chun a vâu dêng khêt hen ât lah, favûi na relh mi tla ât ding hen kîr nawlh lah; mipâm leh ramdang mi tla rangah siah rawh. LALPA chu na Pathian asi.

Kum Thar Kût

(Num 29.1-6)

23-24A thla sarihnâk a ni khat ni ah dinhnâk bîk ni nei ule, tâwtawrâwt a âwn chun Pathian sawnh ding hen a pûm u. 25Eiphung thil ap LALPA sinah pêk ule, âukhawm nih mah rianṭuan lah u.

Tlanhnâk Ni

(Num 29.7-11)

26-27A thla sarihnâk a ni râ ni ah kum siar dân mi zapi sualthiangnâk ding hen nei u. Chu ni ah chun zei thil khawm ei lah u; Pathian sawnh ding hen a pûm ule, LALPA sinah eiphung thil ap pêk u. 28Chu ni ah zei rian khawm ṭuan lah u, sual thiangnâk ding dân timhtuah ni asi ruangah. 29Âuzawng nih chu ni ah zei thil tal eitu chu Pathian mi ah ngaih asi lai lo. 30Mi âuzawng nih chu ni ah rian a ṭuan chun LALPA nih amah chu a thah lai. 31Hi dân tla hi nan thlâk tla nih an umnâk zawngah an mang ding asi. 32A ni kua ni, nî tlâknâk thawk hen a ni râ ni, nî tlâk tiang hen a bîk hen dinhnâk ni chu ulh ding asi; chu kar chun zeikhawm ei ding asi lo.

Basâ Kût

(Num 29.12-40)

33-34Basâ Kût chu a thlasarih nâk ni leinga ni ah dawmh asi le, ni sarih tiang mang asi. 35A ni masachem chu Pathian sawnh ding hen pumhnâk asi; âukhawm nih rianṭuan ding asi lo. 36Chu ni sarih kar vial chu nisiar eiphung thil ap pêk ding asi. A ni riat ni khawm Pathian sawnh ding hen nanna pûm lai le, eiphung thil ap pêk ding asi. Pathian sawnh ni asi, âukhawm rian nan ṭuan ding asi lo. 37(Hi bang tla hi phung Kût LALPA zahnâk ding dân chu asi, Pathian sawnh ding hen pumh tla, eiphung thil ap, duahphung thil ap, fâng thil ap, bâwlnâk leh uain apnâk, a ni ni hen a herh zia hâwi vima hen pêk ding mi chu asi. 38Hi Kûtnâk hi Dinhni peh zal hen mang mi sapsuan asi. Hi thil apnâk tla chu peh zal hen thilpêk tla lakah sap singsuannâk asi. Nan thutiam rangtlingnâk ding hen apnâk leh mah duh thu hen LALPA rangah thil nan pêk mi chu asi.) 39Nan phâisen fâng nan ât tikah ni sarih sung kût nâk hi a thla sarihnâk ni leinga ni ah dawmh u. A ni masachem chu a bîk hen dinhnâk ni asi lai. 40Chu ni ah chun, nan theirah a ṭha chem mi tla, tûmkâu leh thing nah ṭeng tla put hen, LALPA nan Pathian zahnâk phung Kût nanna dawmh ding asi. 41Ni sarih kar ulh u. Hi dân hi nan thlâk tla nih zeiliau zawngah an nei kumza ding asi. 42Israel mi zapi zawng chu ni sarih kar chu basâ ah an um ver ding asi. 43Churawhchun chu tikah nan thlâk tla nih Israel mi tla chu basâ salam ah Aigupta ram thawk hen a suakpi na liauah an um ti an theih lai. Amah chu LALPA nan Pathian asi. 44Chu hâwi hen Mosi nih LALPA zahnâk ding hen phung Kût chu Israel fa tla rangah zûl kumza ding hen a pêk na rawh.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index