Search form

LEVITICUS 7

Rulhnâk Thil Ap

1Hi bang hi rulhnâk thil ap dân thenhlimh tak chu asi. 2Ap mi ran chu duahphung ap mi ran thahnâk mâichâm sîr marlei kângah an thah ding asi, a thî tla chu mâichâm kî pali ah theh ding asi. 3A thâu zawzawng chu a lâk lai le, mâichâm ah a ap lai; a sungril tuamtu thâu, 4akal leh akal lakah mi thâu, a thin ṭha mi vial lâk hen mâichâm ah ap ding asi. 5Bâwlpu nih a thâu zawzawng chu eiphung thil ap ah LALPA sinah mâichâm tlûnah a duah ding asi. Chu chu rulhnâk thil ap asi. 6Bâwlpu dâwngsung mipa fa vial nih an ei kho lai le, sikhawmsele thungâi a thenhlimh ruangah mun thenhlimh ah ei ding asi. 7Sual thil ap leh rulhnâk thil ap chu â bang cho mi dân pakhat ah mang asi, sâ chu bâwlnâk aptu bâwlpu tâ asi. 8Duahphung thil ap mi ran vun khawm chu bâwlnâk aptu bâwlpu vo asi. 9Fâng ap mi bêl lakah hût mi mawh, khêng lakah timhtuah mi mawh rial mi mawh chu LALPA sinah aptu bâwlpu vo asi. 10Suang lo mi fâng ap mi; sariak hen telh mi mawh, rêu mi mawh chu Aron thlâk bâwlpu tla nih zat seng anna ṭhen ding asi.

Kawmhnâk Thil Ap.

11Hi hi LALPA sinah kawmhnâk thil ap dân chu asi. 12Mi nih lâwmthu simnâk thil ap Pathian sinah a ap chun, ran bâwlnâk ah mi leh thilnu telh loh sang ap mi hen munkhat hen a pêk lai. Oliv sariak hen chawmh mi sang tlang a sah mi mawh, sang rêu oliv sariak telh mi mawh, em mi mawh a pêk ding asi. 13Chun, a dang thilnu telh lo mi sang tlang a ap ding asi. 14A chi kip a khingkhuai vima hen a bîk hen khawlh mi chu LALPA sinah a pêk lai; mâichâm ah ran thî thehtu bâwlpu vo asi. 15Chu ransa meh chu bâwlnâk pêk ni ah an ei ding asi; a thaituan tiang a leifuan siah ding asi lo. 16Mi nih a thutiam tlingtir ding hen kawmhnâk thil a ap chun mawh amah duh thu hen a ap mi asi chun, ap ni ah ei hep ding asi lêm lo, a leifuan tla chu a thaituan lei khawmah a ei kho lai. 17Sâ a lei mi ni thum tiang a um nget rih asi chun duah ding asi. 18A ni thum ni tiang a ei chun Pathian nih chu minung thil ap chu a pawm lai loh. Chu thil ap chu siar piak asi lai lo le, nâwm hen ngaih asi lai, âuzawng a ei tu chu a tuar lai. 19Chu sâ chu dân ah a thianglo mi hen telh asi chun, ei ding asi lo, duah ding asi. Âuzawng dân hawi a thenhlimh mi nih sâ chu an ei kho lai. 20Sikhawmsele â thenhlimh lo mi nih a ei chun Pathian mi ah ngaih asi lai lo. 21Âuzawng nih dân ah thil thianglo minung mawh ran mawh a tawngh nûnah chu ap mi sâ chu a ei asi chun, Pathian minung ah ngaih asi lai lo. 22Hi bang dân tla hi 23Israel mi tla rangah LALPA nih Mosi sinah a pêk. Ran, dawrâ mawh kêl mawh a thâu ei ding asi lo. 24Ran amah thi hen a thi mi mawh, ram sa nih a thah mi mawh a thâu ei ding asi lo, thil dang rang chun mang kho asi lai. 25Mi âuzawng eiphung thil ap LALPA rangah ap mi ran thâu a ei chun, Pathian mi ah ngaih asi lai lo. 26Israel fa le umnâk kipah vâ mawh ran mawh thî ei ding asi lo. 27Âuzawng nih chu dân chu a buar chun Pathian mi ah ngaih asi lai lo. 28LALPA nih Mosi sinah 29Israel fa tla rangah hi bang dân tla hi a pêk. Âuzawng nih kawmhnâk thil ap hawng puttu nih chun thilpêk a bîk hen a khingkhuai LALPA rangah a hawng pêk ding asi. 30Eiphung ap mi hawi hen amah kut ngelchel hen a hawng put ding asi. Ran thâu chu a î-âwm hen a bîk hen LALPA sinah thilpêk hâwi hen a hawng pêk ding asi. 31A thâu chu bâwlpu nih mâichâm tlûnah a duah lai le, a î-âwm lam chu bâwlpu vo asi lai. 32Ran a kê, a vawrhlei kâng a kê chu 33kawmhnâk thil ap lakah ran thâu leh thî aptu bâwlpu sinah pêk ding asi. 34Ran î-âwm leh a kê chu a bîk hen bâwlpu rang dingah LALPA nih Israel mi tla thawk hen bâwlpu pêk ding hen a lâk mi asi. Hi hi zeiliau zawngah Israel tla nih bâwlpu sinah an pêk ding mi asi. 35Hi hi LALPA sinah eiphung ap mi lakah Aron leh a fapa tla chu bâwlpu ah birhtir an sinâk ni thawk hen an vo chu asi. 36Chu ni ah chun LALPA nih, Israel fa tla chu thil ap lakah mi chu an vo siam ding hen thu a pêk na mi asi. Hi nûnthâi mâilei zawng khawmah Israel mi nih an zûl ding mi dân chu asi. 37Hi bang tla hi duahphung thil ap, fâng thil ap, sual thil ap, rulhnâk thil ap, birhtirnâk thil ap, leh kawmhnâk thil ap dân tla chu asi. 38Ramkaro ah mi Sinai Tlâng ah Mosi nih Israel mi tla rangah an thil ap tla ap ding hen a simh na ni ah LALPA nih hi bang thupêk tla hi Mosi sinah a pêk mi chu asi.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index