Search form

NUMBER 10

Tangkasa Hen Siam

Mi Tâwtawrâwt

1LALPA nih Mosi sinah, 2“Tangkasa hen tâwtawrâwt siam, mi zapi kawhnâk leh um mun lâwmnâk ah mang ding hen. 3Chu tâwtawrâwt chu sâwt ual an tum vevê chun ka umnâk Puanin tualmâi ah zapi zawzawng chu na kiangah anna pûm ver ding asi. 4Sikhawmsele pakhat cho tum mi hâu asi chun, murui khat lakah ruitu vial cho na kiangah an hawng a pûm ding asi. 5An tum mi a sâwt lo chun saklei kângah um mi phun tla anna thawh ding asi. 6A veinihnâk sâwt lo hen tum mi lakah chun, simlei kângah an um mi phun tla anna thawh ding asi. Sâwtlotê tum mi lakah riakmun an lâwm lai le, 7mi zapi mun khat ah pûm ding hen chun hâu sâwt ual tum ding asi. 8Tâwtawrâwt chu Aron fapa bâwlpu tla nih an tum ding asi.

“Hi bang dân tla hi zeiliau zawngah mang ding asi. 9Nan ram ah tuknâk a um hen, an do natu mêlma lakah nanna vêng chun, hi tâwtawrâwt hâu lakah hin râltuk ding mi singsiahnâk nan nei ding asi. Kei LALPA nan Pathian nih nan mêlma lakah mi kan ṭangpi na lai le, kan hum na lai. 10Nanna lâwm zâwn khawmah nan Thla Thar Kût leh nan phung kût ni khua ah nan tum ding asi, duahphung thil ap liauah leh kawmhnâk thil ap liau khawmah. Churawhchun, Kei LALPA nan Pathian nih kan ṭangpi na lai,” a ti.

Israel Tla Nih Riakmun

An Lâwm

11Israel tla nih Aigupta an suak tâk nûnah a kum nihnâk a thla nihnâk ni kul ni ah, LALPA umnâk Puanin tlûnah mi sûm chu â châwi rawh le, 12Israel tla chu Sinai Ramkaro thawk hen an kalnâk ding leikângah anna thawh rawh. Sûm chu Paran ramkaro ah â dîn.

13LALPA nih Mosi mang hen thu a pêk zia zia hen an kal le, 14an kal kipah thupêk hâwi hen bang khap hen an kal. A masachem ah Juda phun tla anna thawh masa le, a murui a murui hen, Aminadab fapa Nason thupêk hâwi vima hen. 15Isakar phun chu Zuar fapa Nethanel nih thu a pêk na, 16Zebulun phun tla chu Helon fapa Eliab nih thu a pêk na.

17Churawhchun Puanin chu Gerson leh Merari phun puttu ding mi nih an put lai le, an suakpi lai.

18A sangtu ah Reuben phun murui puanzâr tangah mi nih an zûl lai, a murui a murui hen an suak lai, Sedeur fapa Elizur thupêk hen. 19Zurisadai fapa Selumiel chu Simeon phun thu pêktu asi, 20Gad phun thu pêktu ding chu Deuel fapa Eliasap asi lai.

21Kohat thlâk Levi murui nih thil thenhlimh chu put hen anna thawh lai. An riakmun ding mi an va tlung rawh chun an Puanin chu an zâr nawlh lai.

22Chu zûl ah Efraim phun tla anmah puanzâr tangah mi tla chu anna thawh lai le, a murui a murui hen, Amihud fapa Elisama thu pêk hen. 23Manaseh phun thu pêktu chu Pedazur fapa Gamaliel, 24Gideoni fapa Abidan chu Benjamin phun thu pêktu asi.

25A dawnghnâk chem ah Dan phun tla chu anmah murui puanzâr tangah mi an suak lai le, murui zawzawng hotu Amisadai fapa Ahiezer thu pêk hen a murui a murui hen an suak lai. 26Aser phun thu pêktu chu Okran fapa Pagiel, 27Naphtali phun thu pêktu chu Enan fapa Ahira asi. 28Churawhchun Israel tla a murui a murui hen an kal liauah an mun an khuar liauah leh an suak dân a sang vima hen an kal dân chu asi.

29Mosi nih a nupi ṭapa Hobab, Midian mi Jethro fapa sinah, “LALPA nih hawng kan pêk mi mun leiah kan kal awt rawh. Israel tla chu sul-le-lam tluangtir ding hen thu a tiamh na rawh, churuangah kan sinah hawng bâk le, kan sul-le-lam tluangnâk kan voh bâk lai,” a ti.

30Hobab nih a sâng le, “Ka duh lo, ka ram leiah ka kîr awt,” a ti.

31Mosi nih, “Hawng kan mâk thlap lah bâk ma a, ramkaro ah kan kalnâk ding mun khawm na theih, nang chu na hawng kan rui kho lai. 32Kan sinah na hawng bâk asi chun, LALPA nih mal hawng kan sâwm mi zawzawng kan ṭhenh bâk lai,” a ti.

Zapi Tla Chu Anna Thawh Rawh

33Zapi tla nih Sinai tlâng thenhlimh chu an kaltâk rawh le, ni thum ding an kal. LALPA Thudântuk Bâwm chu an riaknâk mun hâwltu si hen an mâilei ah a kal. 34An mun thawk hen anna thawh kipah LALPA sûm chu sûn ah chun an tlûnah a um.

35LALPA Thudântuk Bâwm â thawh awt kipah Mosi nih, “LALPA thawk le, na mêlma tla chu rektir na le, an huatu tla chu tektir na,” a ti. 36Â dîn kipah, “LALPA, Israel mi sâng tamtak dâwngsung sinah hawng kîr rawh,” a ti ding asi.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index