Search form

NUMBER 15

Bâwlnâk Thu Ah Dân Tla

1LALPA nih Mosi sinah 2Israel mi tla rangah a pêk na ding mi ram ah an mang ding hen hi bang dân tla hi a pêk na. 3Chawchal, dawrâ chal, dawrâ mawh kêl mawh LALPA sinah duahphung thil ap mawh, thutiam lîm bâwlnâk mawh, mah duh thu hen thil ap mawh, nan phung kût nan nei kumza mi thil ap rangah mawh nan pêk kho; chubang hâwi eiphung thil ap rim nih LALPA a lawmhtir. 4-5Âuzawng nih kêl mawh, dawrâ LALPA sinah duahphung thil ap a hawng pêk chun ran ap mi kipah sangvut kilogramme khat oliv sariak litre khat hen chawmh mi fâng ap mi uain litre khat hen a hawng put ding asi. 6Dawrâ chal ap liauah sangvut kilogramme nih oliv sariak litre khat leh tan hen chawmh mi chu fâng ap mi 7uain litre khat leh tan hen pêk ding asi. 8Chawchal, LALPA sinah duahphung thil ap mawh thutiam lîmnâk ding hen bâwlnâk mawh, kawmhnâk thil ap, 9fâng ap mi ap liauah sangvut kilogramme thum oliv sariak litre nih hen chawmh mi 10uain litre nih hen pêk ding asi. Hi bâwlnâk rim nih hin LALPA chu a lawmhtir asi.

11Chu chu chawchal, dawrâ chal, dawrâ mawh kêl ap mi kip lakah pêk ding mi chu asi. 12Ran ap mi pakhat ngâk a tam ap asi chun, telh sih mi a dawh tâwk hen a tam bâk ding asi. 13A ram mi Israel tla kip nih eiphung thil ap an ap chun hi hi an ti ding asi, chu rim nih LALPA a lawmhtir asi. 14Zeiliau zawngah ramdang minung nan sinah um mi mawh, um salam mi mawh, um pawt mi mawh nih eiphung thil ap LALPA lawmhtir ding hen a siam chun hi dân hâwitê hen a ti ding asi. 15Zeiliau zawngah ramdang minung nan lakah um mi hen dân bang cho hen nan mang ding asi. LALPA mitmuh ah annih leh nannih chu nanna bang cho asi. 16Chu dân chu an sinah leh nan sinah bang cho hen mang asi.

17LALPA nih Mosi sinah 18Israel mi rangah ram a pêk na ding mi ah mang ding hen dân tla a pêk. 19Zei fâng tal chunah a hawng suak hen ei mi tla chu LALPA sinah thawhlâwm rang bîk ah zeimaw zat ding chu siah ding asi. 20Sang nan em chun nan fa thar lakah sang tlang masachem mi chu LALPA sinah thawhlâwm rang dingah a bîk hen nan pêk ding asi. Hi hi fâng nan khâwng mi lakah thawhlâwm a bîk a nan pêk mi hâwi hen bang cho nan pêk ding asi. 21Zeiliau zawngah sang nan em mi chu LALPA sinah a bîk hen nan pêk kumza ding asi.

22Sikhawmsele, mi zeimaw mi nih hi bang dân tla LALPA nih Mosi sinah a pêk mi chu ruat lo tak hen an palh kho. 23Zapi minung khawm nih hi nûnthâi ah LALPA nih Mosi mang hen thu a pêk mi lakah an palh kho. 24Mi zapi nih an theihthiam lo ruangah palhnâk an nei chun, chawchal hen duahphung thil ap an pêk lai le, fâng ap mi leh uain ap mi rim nih LALPA a lawmhtir asi. Chu lo khawmah, a dang kêl chal sual thil ap rangah an ap ding asi. 25Tum ruang silo hen palh mi chu an sual thil ap chu eiphung thil ap hâwi hen LALPA sinah an put lai le, bâwlpu nih mi zapi rangah dân hâwi hen thiangnâk a siam lai le, ngaihdam an si lai rawh. 26Mi kip nih thilsual an ti rawh ruangah Israel mi zawzawng leh ramdang minung an sinah um mi tla khawm ngaihdam an si lai rawh.

27Mi nih tumnâk ruang silo hen a sual mi chu kêl nunau kum khat mi sual thil ap ah a ap ding asi. 28Mâichâm ah bâwlpu nih chu minung pa rangah dân hen thiangnâk a siam lai le, ngaihdam asi lai rawh. 29A ram mi Israel tla mawh, ramdang minung um bâk mi mawh tum mi silo hen sualtu zawng chu dân bang khap hen an mang ding asi.

30Sikhawmsele, zei minung tal a sual êu mi chu, a ram mi mawh ramdang mi mawh khawm si seh, LALPA nehsawhtu leh zauhnawmhtu asi. 31LALPA nih a sim mi a êl le, a thupêk a buar ruangah thah ding asi. A thihnâk chu amah mawh asi.

Dinhni Buartu

32Veikhat chu Israel tla ramkaro ah an um liauah minung pakhat Dinhni ah thing khawmh hen an muh. 33Mosi leh Aron leh zapi sinah an kalpi le, 34vêngtu sinah an siah, zeitin ti ding ti â thei lo rih ruangah. 35Churawhchun LALPA nih Mosi sinah, “Chu minung chu riakmun lênglei ah zapi minung nih lung hen thi thlo an seh ding asi,” a ti. 36Churawhchun zapi tla nih riakmun lênglei ah an kalpi le, LALPA thupêk hâwi hen lung hen thi thlo hen an seh.

Puânsar Thlaih Mi Thu Ah Dân Tla

37LALPA nih Mosi chu 38Israel tla simh na ding hen thu a pêk: “Nan nipuan kî ah a sâr thlaih siam ule, a sâr thlaih lak kipah larual dumpâwl mi nan thlaih ding asi. Hi hi zeiliau zawngah nan ti kumza ding asi. 39Chu puan sâr thlaih chu nan zauh kipah ka thupêk zawzawng zûl hen; ka sinah mi kâng dang lei pial lo hen nan thinlung duhnâk leikâng zawh lo hen nan um ding asi ti theihnâk asi. 40Chu puan sâr thlaih nih chun ka thupêk zawzawng nan zûl ding mi leh keimah tâ tak nan si rawh ti an theihtir na lai. 41Kei, LALPA nan Pathian, nan Pathian si ding hen Aigupta ram ah mi an suakpi natu ka si. Kei LALPA chu ka si,” a ti.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index