Search form

NUMBER 26

Minung Lurêl Veinihnâk

1Chu râi a lêng nûnah chun Mosi leh Aron fapa Eleazar sinah, 2“Israel mi zapi zawzawng lakah mi lurêlnâk um sele, mipa kum kul mi leh a tlûnlei mi, râltuk kawrsen rang dingah tlâk ding mi vial rêl na,” a ti. 3-4Mosi leh Eleazar nih chun anna êt le, mipa murui zawzawng kum tling mi vial an pumh na. Jeriko thawk hen Jordan Va kanh hen Moab phâi ah anna pûm.

Chubang tla chu Aigupta ram thawk hen hawng kal mi tla an si:

5Reuben phun (Reuben chu Jakob fapa upachem asi): Hanok thlâk tla chu Pallu, 6Hezron, leh Karmi an si. 7Hi chi lakah mipa rêl mi zat chu 43,730 an si. 8Pallu thlâk tla chu Eliab leh a 9fapa tla Nemuel, Dathan leh Abiram an si. (Hi Dathan leh Abiram tla hi mi zapi nih an thîm na mi asi. Korah leh a murui tla LALPA lakah an hel liauah Mosi leh Aron zuam hen Korah murui leikângah ṭângṭawmtu an si. 10Tual a hawng a sêu le, a dawlh hep na le, Korah leh a murui tla hen chunah chun an thi le, chu liauah minung 250 mei nih a veih na; mi zapi rangah lungfîm suahtu an si rawh. 11Sikhawmsele, Korah fapa tla chu thah an si lo.)

12Simeon phun lakah Nemuel chi tla chu Jamin, Jakin, 13Zerah leh Shaul an si. 14Hi chi tla hi an tam zat chu mipa 22,200 an si.

15Gad phun a mi: Zephon chi tla chu Hagi, Suni, 16Ozni, Eri, 17Arod, leh Areli. 18Hi chi tla tam zat chu mipa 40,500 an si.

19-21Juda phun a mi, Selah chi tla chu Ferez, Zerah, Hezron, Hamul, (Juda fapa panih Er leh Onan chu Kanaan ram ah an thi.) 22Hi chi tam zat chu mipa 76,500 an si.

23Isakar phun a mi, Tola chi tla: Puah, 24Jashub leh Simron, 25hi phun tam zat chu mipa 64,300 an si.

26Zebulun phun a mi: Sered chi, Elon, leh Jahleel. 27Hi chi tla tam zat chu mipa 60,500 an si.

28Fapa panih Manaseh leh Efraim pa Josef phun.

29Manaseh phun: Manaseh fapa Makir chu Gilead pa asi, hi thlâk tla bulpi chu Gilead asi: 30Iezer chi tla chu Helek, 31Asriel, Sekem, 32Semida leh Hepher, 33Hepher fapa Zelophehad nih fapa tla a nei lo le, fanu tla cho a nei: an min tla chu Mahlah, Noah, Hoglah, Milkah leh Tirzah an si. 34Hi chi tam zat chu mipa 52,700 an si.

35Efraim phun a mi: Suthelah chi, Beker, leh Tahan, 36Eran thlâk tla bul chu Suthelah. 37Hi chi tla tam zat chu 32,500 an si.

Hi tla hi Josef thawk hen thlâk mi chi tla an si.

38Benjamin phun a mi: Bela chi tla, Asbel, Ahiram, 39Sephupham leh Hupham. 40Ard leh Naaman chu Bela thlâk an si. 41Hi chi tam zat chu mipa 45,600 an ti.

42Dan phun a mi: Husim chi tla, 43an tam zat chu mipa 64,400 an si.

44Aser phun a mi: Imnah chi tla, Isvi, leh Beriah an si. 45Heber leh Malkiel chu Beriah thlâk an si. 46Aser nih fanu a min Serah a nei. 47Hi chi tam zat chu mipa 53,400 an si.

48Naphtali phun a mi: Jahzeel chi, Guni 49Jezer, leh Silem. 50Hi chi tam zat chu mipa 45,400 an si.

51Israel mi lakah mipa tam zat 601,730 an si.

52LALPA nih Mosi sinah, 53“Ram chu phun tla lakah an tâwm an tam zia hen ṭhenh na. 54-56Ram chu chamchawh hen ṭhen, a minung tam mi chu kâu dauh hen pêk, a minung tâwm mi chu bî dauh hen pêk na,” a ti.

57Levi phun a mi Gerson chi tla chu, Kohat leh Merari an si. 58Libni chi a dang tla fawnh hen, Hebron, Mahli, Musi leh Korah an si. Kohat chu Amram pa asi, 59Levi fanu Aigupta ram ah suak mi Jokebed umpitu asi. Amram rangah fapa panih Aron leh Mosi, leh a fanu pakhat Miriam a ring piak. 60Aron nih fapa pali a nei, Nadab, Abihu, Eleazar leh Ithamar. 61Nadab leh Abihu lam chu mei thianglo LALPA sinah an ap liauah an thi. 62Levi chi lakah mi mipa fa thla khat mi mawh chu ngâk a upa dauh mi tam zat chu 23,000 an si. Israel lakah mi a dang ê hen rîn an si. Israel lakah mi thil zeikhawm pêk an si lo ruangah.

63Hi bang chi tla hi Mosi leh Eleazar nih Jeriko thawk hen Jordan Va kanh hen Moab phâi ah Israel tla minung lurêl liauah an rîn mi asi. 64Mosi leh Aron nih Sinai ramkaro ah an rêl masa mi lakah pakhat khawm an relh na lo. 65LALPA nih, “Jephunneh fapa Kaleb leh Nun fapa Josua zeizawng titu cho lo chu ramkaro ah an thi ver lai,” a ti.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index