Search form

NUMBER 32

Jordan Saklei Ah Um Mi Phun Tla

(Deut 3.12-22)

1Reuben leh Gad phun nih ranrual tamtak an nei. Gilead leh Jazer ram chu an zauhnâk ah ran vulhnâk ding hen thungâi â rem hen an muh. 2Mosi, Eleazar leh zapi ruitu tla sinah an va kal le, 3-4“LALPA nih Israel mi tla rangah luahtir na ding hen a ṭangpi na mi khua tla, Atarot, Dibon, Jazer, Nimrah, Hesbon, Eleazar, Sibmah, Nebo, Beon tla hi ran rangah ram ṭha tak asi le, kannih tâ nih ran thungâi kan chawng. 5Zângfahtê hen ran hi kanmah rang dingah hawng kan pêk ule, Jordan Va kanh lo hen hinah hin hawng kan umtir u,” an ti.

6Mosi nih, “Nan hâwi Israel tla nih râltuk ding an kal liauah hinah um ko ding nan duh awt mazei? 7Chu hâwi asi chun Israel mi tla chu Jordan Va kanh hen LALPA ram tiam ah kal ding mi chu zeitin an lung nan dawngtir na awt zia? 8Chu ram chu nan pa le tla rangah Kades Barnea thawk hen va zauhfiang ding hen ka fial na mi asi. 9Eskol Vakuam tiang an va kal le, ram chu an va muh le, sikhawmsele an hawng kîr nawlh le, chu ram LALPA nih a pêk na mi ah lût lo ding hen mi tla an ṭhih na. 10LALPA chu chu ni ah a rothawk le, thu a tiamh na: 11‘Ka duhzia hen an um lo ruangah kum kul mi leh a tlûnlei mi Aigupta ram thawk hen hawng suak mi nih chun Abraham, Isak leh Jakob sinah ka tiamh mi ram ah an lût rerêng lai loh ti hen thu ka tiamh.’ 12Hi lakah hin, Keniz phun ah mi Jephuneh fapa Kaleb leh Nun fapa Josua cho lo chu an si hep; annih chu LALPA duhzia hen um mi an si ruangah. 13LALPA chu mi zapi lakah a rothawk le, amah lawmhtir lotu tla thlâk zawzawng an thi hep lân lo chu kum sâwmli kar ramkaro ah a vâitir na. 14Tuah nan pa le mun chu nan luah fâwn rawh, tuah thlâk thar misual tla khawm nih Israel lakah Pathian thinthawknâk tlungtir ding hen nanna tîm fâwn. 15Nannih Reuben leh Gad mi tla nih tuah LALPA nan zûl duh lo mi asi chun, hi ramkaro ah mi zapi zawzawng tla hi an kaltâk ving fâwn na lai le, siat-le-râwk an si nâk chu nanmah mawh asi lai,” a ti.

16Mosi kiangah an kal le, “A masa hen, kan dawrâ tla rangah lung kulh leh a dangtê hen kan umnâk dingah kulhnei khuapi tla hawng kan siam tir rih. 17Chu tikah kan hâwi Israel tla sinah râltuk ding hen kan kal lai le, an luah ding mi ram lakah kan umtir na lân lo chu râltuk kan bawmh na lai. Chu karah kan umnâk khua kulh lakah hin hi ram minung tla lakah mi an him kho ding hen. 18Anmah rangah ruat mi ram kan hâwi Israel tla nih an luah lân lo chu kan kîrtâk rîlmâl na lai lo. 19Jordan varâl leiah chun an lakah mi neih zeikhawm kan lâk awt lo, hinah Jordan saklei kannih chu tingvo kan nei rawh ruangah,” an ti.

20Mosi nih a sâng le, “Nan tum tak mi asi chun, LALPA mâika ah râltuk ding hen a tîm u. 21Nan lakah râltuk ding mi zawzawng nih LALPA thupêk hen Jordan Va kanh ding asi. 22LALPA nih a neh hen ram a lâk lân lo chu kan mêlma tla chu an do ding asi. Chu nûn chun LALPA sinah nan ti ding mi tla leh nan hâwi Israel tla sinah nan ṭuan ding mi chu nan ti thluh ruangah nan kîr kho lai rawh. Chu tikah Jordan saklei ram hi nan tâ asi tak rawh ti LALPA nih an theihtir na lai. 23Sikhawmsele, nan thutiam hâwitê nan tilo chun LALPA lakah thilsual nan ti mi asi ti ka nan simh na. Chu thu lakah chun palhrahnâk nei lah u; nan sual ruangah rêp nan tawng lai. 24Churuangah khua tla tuah ule, nan dawrâ rangah kulh tla siam u, sikhawmsele nan thutiam chu nan zulhpeh ding asi,” a ti.

25Reuben leh Gad mi tla nih chun, “Pu, nangmah thupêk hâwi hen kan ti lai. 26Kan nupi, kan fa tla, kan ranrual leh dawrâ tla chu hi Gilead ram khua tla ah hin um na ko seh. 27Sikhawmsele kannih lam chu LALPA thupêk zûl hen râltuk ding hen kanna tîm kumza. Na sim zia hâwitê hen Jordan Va kan kanh lai le, kan do na lai,” an ti.

28Churawhchun Mosi nih Eleazar, Josua leh Israel ruitu dang tla sinah hi bang thu hi a pêk na: 29“Reuben leh Gad mi tla nih Jordan an hawng kanh chun LALPA thupêk hen râltuk ding hen a tîm ule, anmah tla ṭangpi hen ram chu nan neh kho chun, chu tikah Gilead ram chu anmah rang dingah pêk na u. 30Sikhawmsele, Jordan Va kanh hen nan sinah râltuk ding hen an hawng lo chun, nanmah hâwi hen Kanaan ram ah tingvo an nei bâk lai,” a ti.

31Reuben leh Gad mi tla nih an sâng le, “Pu, LALPA thupêk hâwi hen kan ti lai. 32A thupêk hen Jordan kan kanh lai le, râltuk ding hen Kanaan leiah kan kal lai, chu tikah Jordan saklei hinah kan thil ting ding mi chu kanna ting kho lai rawh,” an ti.

33Churawhchun Mosi nih Gad leh Reuben phun leh Manaseh phun khingkhuai chu Amor lalchem Sihon leh Hasan lalchem Og ram zawzawng an kiangkam mi khuapi tla leh ram chu anmah rang dingah a ruat rawh. 34Gad phun tla nih Dibon, kulhnei khua tla, Atarot, Aroer, 35Atarot Sophan, Jazer, Jogbehah, 36Bet Nimrah leh Bet Haran an sak nawlh. 37Reuben thlâk tla nih Hesbon, Elealeh, Kiriathaim, 38Nebo, Baal Meon, (hi min hi an thleng), leh Sibmah an sak nawlh. An sak nawlh mi khua tla min thar an sak.

39Makir chi Manaseh fapa nih Gilead ram a va do le, a luah, chunah Amor um mi tla chu a nar phin na. 40Mosi nih Gilead ram Makir phun a pêk na le, chunah chun an um. 41Jair, Manaseh phun ah mi nih chun a do na le, khua zeimaw zat ding a lâk, a min ah “Havot-jair’’ (Jair khua tla) ti hen a sak. 42Nobah nih Kenat a do le, a khua tla a lâk, amah min put hen Nobah ti hen a sak nawlh.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index