Search form

NUMBER 35

Levi Murui Rangah Ruat Mi Khuapi Tla

1Jeriko thawk hen Jordan Va kanh hen Moab phâi ah LALPA nih Mosi a sawnh le, 2“Israel tla nih thil-le-rî anna ting mi lakah mi khuapi tla leh a kiangkam mun ṭha tla Levi tla rangah an umnâk ding hen pêk na ding hen simh na. 3Chubang khuapi tla chu Levi tingvo asi lai le, chunah chun an um bâk lai. Mun ṭha anna ting mi tla khawm chu an ran tla zawzawng rangah asi lai. 4Mun anna ting mi tla chu an khua kulh thawk hen lênglei dâwng 1,500 tluk khua hêl dak hen a kâu ding asi. 5A vâu lei kil li dâwng 3,000 vima kâu hen a um ding asi, chu a lâi ah chun khua chu um ding hen. 6Mi nih palh-le-rah hen anna thah sual zâwn ah himnâk ding hen teknâk khuapi paruk Levi tla rangah nan pêk na ding asi. Chu lo khawmah a dang khua 42 7mun anna ting mi fawnh hen 48 nan pêk na ding asi. 8Levi khuapi zat chu phun kip nih a mun a bît a kauh anna ting zia chiau hen asi lai,” a ti.

Himnâk Khuapi Tla

(Deut 19.1-13; Jos 20.1-9)

9LALPA nih Mosi sinah 10Israel tla sinah sim ding hen thu a sim le, “Jordan Tiva nan kanh hen Kanaan nan lût chun, 11mi anna thah palh sual ah him ding hen teknâk khuapi tla nan thîm ding asi. 12Chunah chun, thah hen a um mi minung unau tla nih phû an lam ding mi lakah a himnâk ding hen. Mi nih minung thahtu a phiar chun zatlâng lâirêlnâk lo hen thah ding asi lo. 13Khuapi paruk thîm ule, 14pathum chu Jordan saklei ah, pathum dang chu Kanaan ram ah. 15Hi bang tla hi Israel mi tla rangah leh ramdang mi tla um salam mi leh um kumza mi rang khawmah himnâk khuapi rangah mang asi lai. Âuzawng nih âumawh a thah palh chun chu khua tla a zei mi lak tal ah a lût chun a him khonâk ding hen.

16-18“Mi nih riamnâm thîr mawh, lung mawh, thing mawh hen mi thahnâk dingah a mang chun, minung thah hen a sual ruangah anih khawm thah bâk ding asi. 19A thi mi unau taksa tlâi naih chemtu nih a thahtupa rangah thah bâk ding â tâng. A tawngnâk zawngah a thah bâk ding asi.

20“Mi nih a hua ruangah a tûl hen mawh, thil dang hen a seh hen mawh, 21a kut hen a chumh hen mawh a thah chun amah khawm thah bâk ding asi. A thi mi unau taksa tlâi naih chemtu nih a thahtupa rangah thah bâk ding hen â tâng asi. A tawgnâk zawngah a thah bâk ding asi.

22“Sikhawmsele, mi nih hua ruang silo hen, âumawh a tûl hen mawh, zei thil hen mawh a seh hen a thah palh kho. 23Asi lo leh, hawlhnâk ah a leido si lêm lo hen, nganfâk pêk a tum ruang khawm silo hen, liah lo hen lung a lawnh mi lakah âumawh a thah palh kho. 24Chu hâwi thu lakah chun zatlâng nih lâi an rêl lai le, a thahtupa lei ṭângṭawm hen a thi mi unau tla, lehrûl sam tumtu tla leiah ṭângṭawm lo hen lâi an rêl ding asi. 25Zatlâng tla nih chu mi thahtu chu a thi mi unau lakah mi chu an hum lai le, ruangsuak ding hen himnâk khuapi leiah an kîrtir ding asi. Chunah chun bâwlpu lalchem asi mi thih lân lo chu a um ding asi. 26Mi thahtu nih chu himnâk khuapi chu kaltâk hen a suak chun, 27a thi mi unau tla nih tawng hen thah na khawmsele, phû lâknâk ah thah mi asi ruangah mi thah mawhnâk â ting lai lo. 28Minung thahtu rerêng chu himnâk khuapi ah bâwlpu lalchem thih tiang um ding asi le, bâwlpu lalchem thih nûnah a in leiah a tlung kho ding asi. 29Nan umnâk kipah nan thlâk leh nanmah nih hi dân hi nan mang ding asi.

30“Mi nih minung a thah ti hen an hawng phiar chun, minung panih mawh chu ngâk a tam mawh muh fiangtu a um tik lâwngah thah ding asi; theihtu minung pakhat cho hen chun thah rê ding hen phiarnâk chu zumh tâwk asi lo. 31Mi thahtu chu thah bâk ding asi. Hi rêpnâk hi tangka pêk hen a âwl kho ding asi lo. 32Mi himnâk khuapi ah a tek asi chun, bâwlpu lalchem a thih lân lo chu tangka pêk khawmsele in leiah kîrtir ding asi lo. 33Hi nan ti mi asi chun, nan umnâk ram nan nawmh mi asi lai. Mi thahnâk nih ram chu a nawmhtir le, mi thahtu thihnâk lo hen chun mi thah hen a umnâk ram chu dân hen thiangtirnâk lampi a um lo. 34Nan umnâk ram chu nawmh lah u, Kei LALPA chu Israel mi tla lakah ka um ruangah,” a ti.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index