Search form

NUMBER 9

Kalkanh Kût Vei Nihnâk

1Israel mi tla nih Aigupta ram an kaltâk nûnah a kum nihnâk a thla khatnâk ah LALPA nih Sinai Ramkaro ah Mosi sinah thu a sim le, hi hâwi hen a ti. 2-3“Hi thla a ni leili ni ah Israel mi tla nih chun a dân hâwitê hen Kalkanh Kût chu nî tlâk rawp ah dawmh hen an mang ding asi,” a ti. 4Churawhchun Mosi nih Israel mi tla chu a thla khatnâk, 5ni leili zânlei ah Sinai Ramkaro ah Kalkanh Kût chu mang ding hen a simh na le, chu hâwi hen an mang rawh. LALPA nih Mosi rangah thu a pêk mi hâwi hen mi zapi tla nih chun zeizawng an ti rawh.

6Sikhawmsele, mi zeimaw mi nih ruak an tawngh ruangah dân hâwi hen thianglo mi an um le, chu ni ah chun Kalkanh Kût chu an mang kho lo. Mosi leh Aron sinah an va kal le, 7“Ruak kan tawngh ruangah kan thianglo ma chu, sikhawmsele Israel tla nih LALPA sinah thil an ap mi lakah zeirangah kanna tel bâk kho lo zia?” an ti.

8Mosi nih a sâng na le, “LALPA thawk hen sîntirnâk ka tawng lân lo chu ngâk u rih,” a ti.

9LALPA nih Mosi sinah 10Israel tla sinah simh na ding thu a simh le, “Nan lakah mi mawh, nan thlâk tla lakah mawh âutal nih ruak tawngh ruangah thianglo hen mawh, khualtlâwng ruangah mang kho lo hen an um hen, mang ding an duh thlo bâk asi chun, 11thla khat mawh chu ngâk a tam dauh a thla nihnâk ni leili ni zânlei ah mang ding siang asi. Sang thilnu telhlo leh belh khâ hen mang u. 12Buh chu zeitin mi tal a thâituan tiang nan siah ding asi lo, ran ruh khawm nan khiak ding asi lo. Kalkanh Kût chu a dân hâwitê hen nan mang ding asi. 13Sikhawmsele, âutal dân hâwi hen thiang ko hen khualtlâwng khawm kal lo hen, Kalkanh Kût mang lotu chu ka mi ah ngaih asi lai lo, ka sinah thil ap pêk tik takah a um lo ruangah. A sualnâk mawh chu amah nih a phurh lai.

14“Ramdang minung nan sinah um mi nih Kalkanh Kût mang ding a duh bâk asi chun, ti ding mi dân hâwitê hen a mang ding asi. A ram mi mawh ramdang mi hen a dân bang cho hen mang ding asi.

Sûm Mei

(Ex 40.34-38)

15-16LALPA umnâk Puanin dirh asi ni ah, sûm a hawng um le, a khuh pang. Zân ah chun sûm chu mei hâwi asi. 17Chu sûm chu â thawh kipah Israel mi tla nih an riakmun chu an lâwm le, sûm a hawng ṭumnâk kipah riakmun chu an khuar nawlh. 18Mi zapi tla nih LALPA thupêk hen riakmun an lâwm le, LALPA thupêk ber hen riakmun an khuar. Puanin tlûnah sûm a um kar vial chu riakmun ah an um kumza. 19Puanin tlûnah sûm chu hun sâwt vat a um chun LALPA thu ngâi hen anna ṭhial lo. 20A zeimaw zâwn chun Puanin tlûnah sûm chu ni tâwmtê a châm; zei lak zawngah LALPA thupêk hen an um hen an kal. 21A zeimaw zâwn chun sûm chu zânlei thawk hen zînglei tiang cho a um, sûm chu â ṭhial rawh chun mawhsareh hen anna ṭhial bâk. Zeiliau zawngah sûm â thawh chun anna thawh bâk. 22Ni nih mawh, thla khat mawh, kum khat mawh, chu ngâk a sâwt mawh Puanin tlûnah sûm a um kar vial chu anna ṭhial lo; sikhawmsele â thawh tikah anna ṭhial. 23LALPA nih Mosi sinah thu a pêk zia hâwi hen ê-aw ngâi tak hen riakmun an khuar le, an lâwm.

Bawm Common Language Bible Version

This translation, was published by the Bangladesh Bible Society in 2004 ©BBS 2004

More Info | Version Index