Search form

Jonas 2

Igdasal si Jonas

1Na, róggun si Jonas tun dalám katô gátták katô sáddà, igdasal sikandin tun ta Áglangngagán na Manama na ágpangadapán din, na mà din,

2“Áglangngagán, tô dutunna ta karasayan, igtawarra áknikó,

asta igtaba ka kanak.

Agad madaniya tun ta góddóan ka mga inaté,

igpédu-éduwa tun áknikó,

asta igpaminágga ikuna.

3Igantugga ikuna tun ta madalám dagat,

ilibutanna katô dagat,

asta itambunanna katô mga magdakál balud na igpapid nu.

4Igpanámdámma na igpapadiyù a ikuna,

asta diya muman makasadun tun ta ugis templo nu.

5Ilánnádda tun ta dagat,

tuuwa itambunan katô dagat,

asta itángngás ni ulu ku katô mga sigbát ka dagat.

6Ilánnádda sippang tun ta ágpónsadan katô mga pabungan tun dalám ka dagat.

Tô milánnádda, duwán ikadalang kanak, asta kéman ku na diyad makaluwà.

Asal Áglangngagán na Manama na ágpangadapán ku,

igpid ka kanak na manté tikud tun ta kadalámman.

7Áglangngagán, tô igriyuwa na masiggad maté,

isampáttan ku sikuna.

Purisu igdasalla áknikó

asta igpaminág ka kanak tun ta ugis templo nu.

8Na, tô mga manubù na ágpangadap katô mga ágmanaman na ándà ágpulusán,

ágtanan dan áknikó na makatabang pád kandan.

9Asal sakán, kumanta a asta dumurungnga áknikó.

Mangadappa áknikó ukit ka mannanap na bággén ku áknikó asta góbbón.

Tumanán ku tô mga igtandô ku áknikó.

Áglangngagán, tikud tun áknikó tô kaluwaan!”

10Na, igpapid katô Áglangngagán tô sáddà na luwaán si Jonas tun ta ligad ka dagat.

Kagi Ka Manama

© 2004, Wycliffe Bible Translators, Inc. All rights reserved. More Info | Version Index