Search form

Óosana 15

Ánutufa Abarammana faqa moodáanaki kíra ufa qinau.

1Rákirana taikáseenoo márufanoo Yáaweefa Abarammana áfu pisipasa mándeenoo qímaminau.

Abaramma anée sía rufiáa.

Qineé aní saqáriara foorá anísaa ititáfúananoo sía moó fánnoo aní áruannoo. Qinee miná ákiiqara firaa ainainá aní ámianaura.

2Abarammafa mi ufána iriséenoo narí qímaminoo qinau. Óo úriqarara káraambaiqa aneé nána qúmiasanee qiní qíminnaree qineé faiqì síaisa máridaqa. Máà qiní aináinira fáiqi áuqu Eerieseerafa Damaskusa máqusaindaraafa mifá kai máridanoo qineé kúquananoo qiní aináina máraannoo. 3Anee faiqì asumu sía qiní qímiananoo qiní aináinira fáiqi úqakiqari moó fánnoo qiní qumíasana máraannoo.

4Míqi qímaseenóo Abarammafa írufanoo kafáa Karaambáiqa qímaminoo qinau. Máà aní aináinira fáiqi Eerieseerafa sía aní qumíasana aináina máraannoo. Aninná faiqi uqanná fánnoo aní aináina máraannoo. 5Miqí qímaseenoo Karaambáiqa Abarammana áfiqee mádaanai múquseenoo qinau. Innaarúnai qáfamáseenana fásau amanée anee ásaana rinnáree. Aníki ani aruakínausa miqímmasee kambíqeefara.

6Abarammafa Yáaweena mi ufána iriséenoo narí saqárikirana mi ufánasaa rusísee márinau. Miqúnara Karaambáiqa asasammáseenoo Abarammana maréeqee narí áqoondikiranaki quqánau.

7Miqí qímasee Karaambáiqa Abarammana qímaminoo qinau, qinée Karaambáiqa aní Ura máqusakínaana Babiroonia máqa máaqaindaraana áfiqee mínisee maa maqa maaqána ámiananoo aníndikíanifee qímasee áfiqee ániqiafana.

8Miqí qufanóo Abarammafa irámirinoo qinau. Oo úriqarara Karaambáiqa qinée náqi fee másee qiníndi kámmiannoo fee qímasee írianauree.

9Miqí qufanóo Karaambáiqa narí qímaminoo qinau. Anee burimakáu faqa mimmí faqa sipsípa faqa qaaramoó áukuana márarausa faqa nakipurúna faqa kukúma faqa máree mini qímia. 10Miqí qímasoofanoo Abarammafa mi aandausá Ánutufa máruqoo máree míni quqáseenoo mináuqa qámbaaná kai afoommáséenoo dínni moó áfooirana dínni moó áfooirana qaaramau irásasaa quqánau. Ufiniqára kaí sía afoóinau. 11Meemóonauqa mi aandausá nárara aniroofanóo Abarammafa niiqaáqinau.

12Súani kéeqarana námu faqa eenóofanoo Abarammafa áfuki qaunduarufanóo faiqaqéeidanoo qainí márufanoo fíraa rúfiarafa faqa máparaairafa faqa Abarammana afaaqái áqufinau. 13Miqída rufíee márufanoo Karaambáiqa Abarammana qímaminoo qinau. Anísaaqari kambíqainausa ánaamuruara foorá moó máqannaasa maqásaa óonu máridaqa aináinira fáiqikiqa márifaqa 400 áukuanaki mandá fítiqnarana nímifaranoo. 14Miqí márifaqa qinée mi maqannáasa mi fitiqnárana nímimaríana ákiiqara aupúrarana nímianaura. Misa mi maqa maaqána minnísee óonurandee ániqa moómoo qúmiasana máree ánifaranoo. 15Aníara maaqí qíqa aneé asooáqeenana asooáranaki kuqufínaqa ákundaaqa. 16Ani áiku ásauku qaara fáqa qaara fáqa óosana mi rumbaránakiqari óonu randée ánifaranoo. Qinée sía Amoora máqannaasa dauni nárú taikáanaura. Misá káaqa mandáika uqanná ífaqa miqóo misá nárú níndaqaaqa másee aní áiku ásauku miqóo quqáanaura.

17Súani kéeqoofanoo eendírara mammandufanóo Abarammafa qáfoofanóo qafeekí idámuna námu fáqa qooma námu faqa akooqóo narí kai kambíqafinoo aandáù afoommá dínni dínni quqáqoona qámbaana rúnna finau. 18Doo aaqee mi karí kaí Yaaweefa Abarammana faqa moodáanaki kíra úfa qinau. Qineé maa maqa maaqána aní áiku ásauku nímianauranoo. Isipa máqannaa nammári dínni óosirafa ani rámeeqeenoo firaa nammari dínni Eeufarateesa námmari máriannoo. 19-21Keenaa máqusanaasa maqá fáqa Keennisa máqusanaasa maqá faqa Koodamoona máqusanaasa maqá faqa Qeeta máqusanaasa maqá faqa Peerisa máqusanaasa maqá faqa Reefaimma máqusanaasa maqá faqa Amoora máqusanaasa maqá faqa Kannaana máqusanaasa maqá faqa Kirakasa máqusanaasa maqá faqa Yeebusa máqusanaasa maqá faqa miqimmásee máqannaasa maqá faqa aní áiku ásauku nímianaura.

Fúka Moodaanaki Kira Ufa Afaqínaasa Ufa

© 2013, Wycliffe Bible Translators, Inc. All rights reserved. More Info | Version Index