Search form

KELUAREN 15

Ende-enden Musa

1Kenca bage Musa ras kerina bangsa Israel ngendeken ende-enden enda man TUHAN,

“Ateku rende man TUHAN, sabap enggo menang Ia alu mulia;

enggo ibenterkenNa ku bas lawit kerina kuda ras si ngersaksa.

2TUHAN kap pengawalku si megegeh;

Ia kap si enggo nelamatken aku.

Ia kap Dibatangku, e maka ateku muji Ia.

Ia kap Dibata bapangku,

e maka kupebelin gelarNa arah ende-endenku.

3TUHAN kap si mbisa;

TUHAN, e me kap gelarNa.

4IbenterkenNa ku bas lawit tentera Mesir ras gereta perangna;

mate gedap bas Lawit Merah puanglima-puanglima pilihenna.

5Lawit si mbages nutupi ia;

gedap ku teruh desken batu.

6TanNdu si kemuhen, o TUHAN, tuhu-tuhu seh kal gegehna;

musuh iperperkenNa seh getem kerinana.

7Alu kemenangen si mulia

ikerapkenNdu si ngelawan Kam;

rawaNdu luar desken api si gara,

ngkeriken musuhNdu seh meseng bagi nggala.

8IembusNdu lawit, e maka launa erjerungjung ku datas;

pajek desken lingling;

janah kubang i bas lawit si mbagesna pe jadi piher.

9Nina musuh i bas ukurna, ‘Kuayaki lah ia maka kutangkap;

kubagi-bagiken ertana, janah kubuat kerina si ngena ateku;

kusintak pedangku, gelah kukernepken ia.’

10Tapi sekali saja Kam erkumesah o TUHAN, enggo gedap bangsa Mesir,

desken timah, gedap ia kerina ku bas lau si mejin bagesna.

11O TUHAN, apai kin dibata-dibata si bali ras Kam?

Labo lit ise pe bagi Kam badiana.

Ise kin si ngasup erbahan tanda kuasa

ras perbahanen si mbelin bagi si ibahanNdu?

12Ipepinter Kam tanNdu si kemuhen,

e maka musuh kami itelen doni enda.

13Erkiteken setia Kam man padanNdu,

itaruhken Kam bangsa si enggo ipulahiNdu;

alu gegehNdu itegu-teguNdu ia

ku tanehNdu si badia.

14Bangsa-bangsa enggo megisa, e maka nggirgir ia ban biarna;

kalak Pilisti ikuasai kebiaren.

15Peminpin-peminpin kalak Edom gentar;

kalak si mbisa bangsa Moap nggirgir;

kalak Kanaan bene ukurna.

16Kebiaren ras aru ate ndabuh man bana.

Idahna gegehNdu, o TUHAN,

e maka kote ia kerina ibahan biarna.

Seh bangsaNdu enggo mentas,

e me bangsa si ibebaskenNdu i bas perbudaken nari.

17IbahanNdu ia, janah isuankenNdu ia i bas delengNdu,

ingan si enggo ipilihNdu, o TUHAN, jadi rumahNdu,

Rumah bekasNdu majekkenca.

18Kam, o TUHAN,

Kam kap Raja rasa lalap seh rasa lalap.”

Ende-enden Miriam

19Bangsa Israel erdalan arah tengah lawit i babo taneh kerah. Tapi kenca gereta perang kalak Mesir ras kudana bage pe puanglima si maba gereta e bengket ku bas lawit e, ipemulih TUHAN ka lau lawit e, e maka gedap ia kerina.

20Ibuat nabiah Miriam turang Harun, gendangna jenari kerina diberu-diberu ngikutken ia, ergendang janah landek. 21Rende Miriam man kalak enda kerina,

“Rende lah man TUHAN,

sabap enggo idatNa kemenangen si mulia

enggo ibenterkenNa kuda ras kerina si ngersaksa

ku bas lawit.”

Lau pagit

22Jenari ibabai Musa bangsa Israel lawes i Lawit Merah nari ku gurun pasir Sur. Enggo telu wari dekahna ia erdalan arah gurun pasir, tapi lalap la jumpa lau. 23E maka seh me ia ku sada ingan, gelarna Mara, tapi lau si lit i je seh kal pagitna, e maka la terinem. Em sabapna maka igelari Mara. 24Erkiteken si e jungut-jungut bangsa Israel man Musa janahna mindo nina, “Apai inemen kami?” 25Meseksek kal pertoton Musa man TUHAN, jenari ituduhken TUHAN man bana sepenggel batang kayu. Ibenterken Musa kayu ndai ku bas lau e, e maka lau ndai enggo banci iinem.

I bas ingan e ibereken TUHAN man bangsa Israel Undang-undang si man ikutenken, janah i je pe iujiNa bangsa e. 26Nina TUHAN, “Adi tuhu-tuhu kam erkemalangen man bangKu alu erbahan kai si payo Kuakap, janah iikutkenndu kerina si Kusuruh, la kam Kuukum alu penakit-penakit si Kubahan man bangsa Mesir. Aku kap TUHAN si erbahanca kam mejuah-juah.”

27Pepagina seh ia i Elim. I je lit sepuluh dua ulu lau ras pitu puluh batang kurma; e maka ia erkemah i tepi lau ndai.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index