Search form

KELUAREN 16

Manna ras leto

1Kenca bage berkat ka kerina perpulungen bangsa Israel i Elim nari, janah i bas wari pesepuluh limaken bulan si peduaken kenca nadingken Mesir, seh me kalak enda i gurun pasir Sin, kelang-kelang Elim ras Sinai. 2I tengah-tengah gurun pasir e kerina kalak e jungut-jungut man Musa ras Harun 3nina, “Ulin min ndube mate pe kami ibahan TUHAN i Mesir. I jah ndube banci kami kundul man daging, ras man pangan-pangan si deban asa besur kami. Tapi enggo ibabandu kami ndarat ku gurun pasir enda gelah kami kelihen seh mate.”

4Erkiteken si e nina TUHAN kempak Musa, “Genduari ateKu ndabuhken pangan bagi udan i langit nari man bandu kerina. Bangsa e arus luar tep-tep wari pepulungsa asa biasna guna wari e. Alu dalan si bagenda banci Kuuji ntah kin iikutkenna pengajarenKu ntah lang. 5I bas wari si peenemken ibabana lah ku bas kemahna dua kali lipat buena, jenari ipesikapnalah.”

6E maka ikataken Musa ras Harun man kerina kalak Israel, nina, “Kenca ben kari wari ietehndu me maka TUHAN nge si maba kam ndarat i Mesir nari. 7Erpagi-pagi, iidahndu me terang sinalsal kemulian TUHAN. Enggo ibegiNa sorandu jungut-jungut man baNa. Ia nge situhuna si ijungutindu, sabap kami enda persuruhenNa saja nge ngenca.” 8Tole nina Musa, “TUHAN nge kari si mereken daging man panganndu kenca ben wari, janah erpagi-pagi roti asa atendu buena, erkiteken enggo ibegiNa kuga sangatna kam jungut-jungut man baNa. Adi ijungutindu kami, situhuna TUHAN nge si ijungutindu e.”

9Nina Musa man Harun, “Suruh kerina perpulungen e reh tedis ngadap TUHAN, erkiteken enggo ibegiNa sora kalak e jungut-jungut.” 10Asum Harun ngerana man kerina perpulungen e, itulihken kalak e ku gurun pasir, janah rempet teridah terang sinalsal kemulian TUHAN i bas embun. 11Jenari nina TUHAN kempak Musa, 12“Enggo Kubegi sora kalak Israel jungut-jungut. Kataken man bangsa e maka kenca ben kari wari ialokenna me daging man panganna, janah erpagi-pagi ialokenna roti asa buena atena. Kenca bage ietehna maka Aku, TUHAN, e me kap Dibatana.”

13Karabenna sada rarasen leto si lanai kal lang-lang buena, kabang ku bas inganna erkemah e. Perbahan buena itamburina ingan erkemah e. Janah pepagina itamburi embun sekelewet ingan erkemah e. 14Kenca embun e kabang, lit tading i babo taneh tempasna menipes, bagi sisik, melumat bagi bening. 15Sanga kalak Israel ngidahsa, la itandaina kai e, e maka nungkun-nungkun ia sapih-sapih ia, “Kai e?”

Nina Musa man bana, “Enda me pangan si enggo ibereken TUHAN man panganndu. 16Enggo iperentahken TUHAN maka sekalak-sekalak kam pepulungsa asa iperlukenndu, dua liter man tep-tep anggota keluargandu.”

17Minter ilakoken kalak Israel bage. Deba ipepulungna lebih dua liter, deba kurang. 18Kenca isukati kalak e, kalak si lebih ipepulungna la ia kelebihen, janah kalak si kurang ipepulungna, la ia kekurangen. Asa perluna saja ngenca terpepulungsa sekalak-sekalak. 19Nina Musa man kalak e, “La ise pe banci munikenca seh pepagi.” 20Tapi lit deba si la megiken kata Musa, e maka isimpanna deba. Pepagina enggo berngan janah seh kal bauna; e maka merawa Musa man kalak ndai. 21Tep-tep erpagi-pagi sekalak-sekalak pepulung asa si iperlukenna; janah kenca enggo las matawari, asa kai si tading i babo taneh kerina melengas.

22I bas wari si peenemken ipepulung kalak ndai pangan dua kali lipat buena, e me empat liter guna sekalak jelma. Kerina peminpin-peminpin perpulungen e reh ndahi Musa guna ngataken kerna si e. 23E maka nina Musa man peminpin-peminpin e, “Enggo iperentahken TUHAN maka pagi me wari pengadi-ngadin si badia, si ipersembahken man baNa. Panggang janah tanggerken lah kai atendu si man tanggerenken. Serapkenlah asa kai si la keri, janah simpan guna si pepagi.” 24E maka sue ras si iperentahken Musa, isimpan kalak ndai asa kai si tading seh wari si pepagina; si e la macik janah la berngan. 25Pepagina nina Musa, “Pan lah enda sendah, sabap sendah e me wari Sabat, sada wari pekesahken si ipersembahken man TUHAN. Erkiteken si e labo lit idatndu pangan i darat ingan erkemah enda. 26Enem wari arus ipepulungndu pangan, tapi i bas wari si pepituken, e me wari pekesahken, la lit sitik pe Kupesusur pangan.”

27I bas wari pepituken lit deba ndarat ndarami pangan, tapi la lit sitik pe idatca. 28Kenca bage nina TUHAN kempak Musa, “Asa kai nari dekahna kam kerina la nggit ngikutken perentahKu? 29Inget, maka Aku, TUHAN, enggo mereken sada wari pekesahken man bandu, janah e me sabapna maka i bas wari si peenemken ateKu tetap mereken pangan man bandu cukup guna dua wari. Sekalak-sekalak arus tading i bas inganna i bas wari si pepituken, janah la banci nadingken rumahna.” 30Dage i bas wari pepituken, bangsa e la erdahin.

31Ibahan bangsa Israel gelar pangan e manna. Tempasna bagi buah sinuan-sinuan si kitik, rupana mbentar, janah nanamna bali ras cimpa si itama tengguli. 32Nina Musa, “Enggo iperentahken TUHAN man banta gelah sisimpan manna enda sitik, maka sibuniken man kesusurenta, gelah banci pagi idah kesusurenta e pangan si ibereken TUHAN man panganta i bas gurun pasir asum kita ibabaNa ndarat i Mesir nari.” 33Nina Musa man Harun, “Buatlah sada kudin, tamaken dua liter manna ku bas, jenari tamaken kudin e i adep-adepen TUHAN, gelah ibuniken guna sinursurta.” 34Sue ras si enggo iperentahken TUHAN man Musa, itamaken Harun kudin e i lebe-lebe Peti Perpadanen, gelah banci lalap tersimpan. 35Bangsa Israel man manna empat puluh tahun dekahna, ngadi-ngadi seh ia i negeri Kanaan, inganna tading. ( 36Sukat-sukat si ipake tupung e isina bali ras dua puluh liter.)

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index