Search form

KELUAREN 19

Bangsa Israel i Deleng Sinai

1-2Berkat ka bangsa Israel i Rapidim nari. Jenari i bas wari si pemena i bas bulan si peteluken kenca ia enggo nadingken Mesir, seh ia kerina i gurun pasir Sinai. I je ipajekkenna ka kemahna i teruh Deleng Sinai. 3Jenari lawes Musa ku datas deleng e njumpai Dibata.

Ilebuh TUHAN ia i datas deleng e nari janah isuruhNa Musa ngatakenca man bangsa Israel, kesusuren Jakup bagenda, 4“Enggo idahndu kai si Kubahan man kalak Mesir. Idahndu ka pe kuga kam enggo Kutatang-tatang seh i jenda jumpa ras Aku, desken rajawali maba anak-anakna i datas kabengna. 5Genduari adi iikutkenndu Aku janah ipatuhindu perpadanenKu e maka kam jadi bangsangKu. Kerina doni enda Aku empuna, tapi kam me jadi bangsa pilihenKu, 6sada bangsa si nggeluh man gunangKu saja janah kam me jadi imam-imamKu.” 7Kenca e nusur Musa i datas deleng nari, idilona pulung kerina peminpin-peminpin bangsa Israel, janah ikatakenna man peminpin-peminpin e kai si enggo iperentahken TUHAN man bana. 8Jenari jelma si nterem ngaloi ras-ras nina, “Nggit kami ndalanken kerina si ikataken TUHAN.” Si enda isehken Musa man TUHAN.

9Nina TUHAN man Musa, “Reh Aku ndahi kam i bas embun si mekapal, gelah ibegi jelma si nterem Aku ngerana ras kam maka ia tek man bandu mulai genduari nari seh rasa lalap.” Ikataken Musa man TUHAN kai jabap bangsa e, 10e maka nina TUHAN man bana, “Dahilah bangsa e janah kataken man bana kerina gelah sendah ras pagi ibersihkenna bana guna ersembah. Arus maka icucina pakenna, 11janah kedun arus enggo sikap kerina. I bas wari e nusur Aku ku Deleng Sinai, maka i je banci kerina bangsa e ngidah Aku. 12Bahan balengna i sekelewet deleng e si la banci ilewati jelma si nterem, janah kataken man bana gelah ola inangkihina ntah pe ideherina deleng e. Ise si ndedehsa deleng e, la banci la mate, 13ibenteri alu batu ntah pe ipanah alu anak panah janah ise pe la banci ndadapsa ia. Si enda ibahan subuk man manusia ntah pe asuh-asuhen; la banci la mate si ngelanggarsa. Tapi adi enggo kenca iembus terompet jelma si nterem la banci la nangkih ku datas deleng e.”

14Kenca bage nusur Musa i datas deleng e nari jenari ikatakenna man bangsa e gelah ersikap guna ersembah. E maka icucina kerina pakenna. 15Ikataken Musa man bangsa e nina, “Kedun arus kam enggo sikap kerina janah mulai genduari nari seh wari e la banci kam ersada kula ras ndeharandu.”

16Erpagi-pagi i bas wari si peteluken, lit me sora lenggur ras kilap. Sada embun si mekapal nusur ku datas deleng e, janah sada sora terompet si megang pe terbegi. Kerina jelma si nterem i bas ingan erkemah e nggirgir perban biarna. 17Ibabai Musa ia ndarat i bas perkemahen e nari njumpai Dibata, jenari tedis ia kerina i teruh deleng e. 18Kerina Deleng Sinai itutupi gebuk, sabap TUHAN enggo nusur ku je i bas api. Gebuk ndai nangkih ku datas bagi cimber api si galang, e maka kerina bangsa e nggirgir kal. 19Sora terompet ndai reh gangna reh dekahna. Ngerana Musa, janah ijabap Dibata ia alu lenggur. 20TUHAN nusur ku ancuk-ancuk Deleng Sinai janah idiloNa Musa reh ku je. Reh Musa nangkih, 21jenari nina TUHAN man bana, “Nusur lah kam, pebetehken man jelma si nterem gelah ola ia reh engkepari baleng si enggo itentuken e guna ngenehen Aku; adi ikeparina nterem denggo ia mate. 22Aminna imam-imam pe si reh ndeheri Aku, la banci la ibersihkenna bana. Adi lang Kuukum ia.”

23Ikataken Musa man TUHAN nina, “Jelma si nterem e labo banci reh ku datas, sabap enggo iperentahkenNdu man kami maka deleng e arus ipebadiaken kami janah erbahan baleng i sekelewetna.”

24Erjabap TUHAN nina, “Nusur lah kam ku teruh janah baba Harun mulih ku datas ras kam. Tapi imam-imam ras jelma si nterem la banci reh engkepari batas e ndahi Aku. Adi ikeparina Kuukum ia.” 25Kenca bage nusur Musa njumpai jelma si nterem, jenari ikatakenna man bangsa e kai si enggo ikataken TUHAN.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index