Search form

KELUAREN 25

Persembahen guna majekken Kemah si Badia

(Kel. 35:4-9)

1Nina TUHAN man Musa, 2“Suruh kalak Israel erbahan sada persembahen man bangKu. Aloken persembahen kai pe si ibereken kalak alu ukurna ersuruh. 3Persembahen-persembahen e, e me kap: emas, pirak, tembaga; 4uis lenen halus; uis wool biru, ungu ras megara; uis si ibahan i bas mbulu kambing nari; 5kulit bajar biri-biri si icelup megara; kulit halus, kayu jati; 6minak guna lampu; rempah-rempah guna minak penangkuhen ras si man tutungen gelah merim; 7batu delima ras batu-batu permata si deban guna perhiasen epod Imam si Mbelin ras uis tutup tentenna. 8Bangsa Israel la banci la majekken sada Kemah si Badia man bangKu, gelah banci Aku ringan i tengah-tengah bangsa e. 9Bahan lah kemah e ras kerina perkakas-perkakasna sue ras rencana si nandangi Kucidahken man bandu.”

Peti Perpadanen

(Kel. 37:1-9)

10“Bahan lah sada peti i bas kayu jati nari, gedangna 110 sentimeter, belangna 66 sentimeter ras ganjangna 66 sentimeter. 11Jenari lapisi alu emas tulen arah bas ras arah darat janah bahan ukiren emas kelewet tepina. 12Bahan empat gelang emas ingan lanja-lanjana, jenari pasang gelang e i bas nahena si empat, dua gelang sembelah. 13Bahan lanja-lanjana i bas kayu jati nari jenari baluti alu emas. 14Tamaken lanja-lanjana arah bas gelang e, sada sembelah. 15Lanja-lanjana e arus tetap i bas gelang e, janah la banci iagui. 16Kenca bage tamaken ku bas peti e papan batu si dua si Kubereken man bandu, ingan pedah e isuratken.

17Bahan tutupna i bas emas tulen nari, gedangna 110 sentimeter, belangna 66 sentimeter. 18Bahan dua gambar mahluk si erkabeng i bas emas nari, 19sada i bas tep-tep ujung tutup emas ndai. Persada lah e ras tutup emas ndai. 20Mahluk si erkabeng e petala-tala i babo tutup emas e, janah kabengna ikirbangken e nutupi tutup emas e. 21Tamaken papan batu si dua ndai ku bas peti e jenari tamaken tutup emas e i babona. 22I je Aku njumpai kam; janah i babo tutup emas, i kelang-kelang mahluk si erkabeng e nari duana Kubereken man bandu kerina undang-undangKu guna bangsa Israel.”

Meja guna mpersembahken roti man Dibata

(Kel. 37:10-16)

23“Bahan lah sada meja i bas kayu jati nari, gedangna 88 sentimeter, belangna 44 sentimeter janah ganjangna 66 sentimeter. 24Lapisi lah meja e alu emas tulen janah bahan lah ukiren emas i sekelewet tepina. 25Bahan sada bingke kelewet, belangna 75 millimeter, janah sada ukiren emas i sekelewet bingkena e. 26Bahan empat gelang emas ingan ngangkatsa janah tamaken e i bas sukina si empat, ingan nahe meja e. 27Gelang ingan namaken lanja-lanjana e itamaken deher bingkena ndai. 28Bahan lanja-lanjana i bas kayu jati nari jenari baluti alu emas. 29Bahan piring, cangkir, guci ras mangkuk si ipake sanga mpersembahken anggur. Kerina si enda ibahan i bas emas tulen nari. 30Meja e itamaken i lebe-lebe Peti Perpadanen, janah i babo meja arus tetap lit roti si badia si ipersembahken man bangKu.”

Nahe lampu

(Kel. 37:17-24)

31“Bahan sada nahe lampu i bas emas tulen nari. Tapakna ras tangkena itepa i bas emas nari; bunga-bunga ukirenna e, termasuk bungana si langa terlak ras si enggo terlak, arus ibahan ersada tapakna ras tangkena e. 32Tupang nahe lampu e, enem arah kawes ras telu arah kemuhen. 33Tep-tep tupang si enem e lit ka telu bunga ukirenna, ibentuk bagi bunga ketapang rikut ras bungana si langa terlak ras si enggo terlak. 34Tangke nahe lampu e lit empat bunga ukirenna, ibentuk bagi bunga ketapang si langa terlak ras si enggo terlak. 35I bas bena-bena tep-tep tupang si telu pasang e, arus lit sada bunga si langa terlak. 36Bunga si langa terlak e, tupang-tupang ras nahe lampu e arus ersada kerina itepa i bas emas nari. 37Bahan pitu lampu guna nahe lampu e, janah iatur gelah isalsalina ku lebe. 38Bahan jepit-jepitna ras bakina i bas emas murni nari. 39Guna erbahan nahe lampu ras kerina peralatenna enda pake lah emas tulen telu puluh lima kilo. 40Perdiateken maka enda kerina ibahan sue ras gambar rencana si Kucidahken man bandu i das deleng e.”

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index