Search form

KELUAREN 27

Batar-batar ingan persembahen

(Kel. 38:1-7)

1“Bahan sada batar-batar ingan persembahen i bas kayu jati nari. Bentukna segi empat, gedangna 2,2 meter ras belangna pe 2,2 meter, janah ganjangna 1,3 meter. 2I bas tep-tep sukina si empat arah datas bahan tandukna. Tanduk enda empatna arus ersada ras batar-batar e, janah ilapisi alu tembaga. 3Bahan belanga ingan abu si erminak e, janah bahan pe sekop, mangkok, garpu, ras talam ingan api. Kerina alat-alat enda ibahan i bas tembaga nari. 4Bahan sada jaring tembaga janah tamaken empat gelang tembaga ingan ngangkatsa i bas sukina. 5Tamaken jaring tembaga e i teruh tepi batar-batar e, ganjangna setengah asa ganjang batar-batar e. 6Bahan lanja-lanjana i bas kayu jati nari, lapisi kerina alu tembaga, 7janah tamaken i bas gelang arah kawes kemuhen batar-batar e adi iangkat. 8Bahan batar-batar e i bas papan nari janah pelepas lit ruangna, sue ras gambar si Kucidahken man bandu i das deleng e.”

Kire-kire Kemah si Badia

(Kel. 38:9-20)

9“Bahan sada bide Kemah Perjumpan e i bas kire-kire lenen halus nari. Arah bagin Selatan, gedang kire-kire e 44 meter, 10tiang inganna sangkut buena dua puluh, ibahan i bas tembaga nari. Alas tiangna e pe tembaga, buena dua puluh. Sangkutenna ras tulanna ibahan i bas pirak nari. 11Bage ka pe ibahan arah bagin Utara. 12Arah bagin Barat, gedang kire-kire e 22 meter, tiangna sepuluh, alasna pe sepuluh. 13Arah Timur, e me dalan bengket, belang bide 22 meter ka nge. 14-15Arah kawes ras kemuhen dalan bengket e tamaken kire-kire gedangna 6,6 meter; tiangna telu, alas tiangna pe telu. 16Man dalan bengket e jine tamaken sada kire-kire, gedangna 9 meter, ibahan i bas lenen halus, si itenun ras benang wool biru, ungu, ras megara, jenari ihiasi alu sulamen. Tiangna empat, alas tiangna pe empat. 17Kerina tiang-tiang i sekelewet bide e ihubungken alu galah pirak, sangkutenna i bas pirak nari ras alasna i bas tembaga nari. 18Gedang bide e 44 meter, belangna 22 meter, janah ganjangna 2,2 meter. Kerina kire-kire e ibahan i bas lenen halus nari janah alasna tembaga. 19Kerina alat-alat si ipake i bas Kemah e bage pe kerina pantukna ras pantuk bide e, ibahan i bas tembaga nari.”

Minak lampu guna Kemah si Badia

(Im. 24:1-4)

20“Suruh bangsa Israel maba minak saitun si mejilena guna lampu e, gelah banci ipegara tep-tep karaben. 21Harun ras anak-anakna si dilaki arus namaken lampu e i bas Kemah Perjumpan i darat kire-kire si arah lebe Peti Perpadanen. Lampu e la banci la ipegara i lebe-lebengKu mulai karaben nari seh erpagi-pagi. Perentah enda la banci la idalanken bangsa Israel ras kerina kesusurenna seh rasa lalap.”

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index