Search form

KELUAREN 30

Batar-batar ingan nutungi si merim-merim

(Kel. 37:25-28)

1“Bahanlah sada batar-batar i bas kayu jati nari ingan nutungi si merim-merim. 2Bentukna segi empat, gedangna ras belangna 45 sentimeter, janah ganjangna 90 sentimeter. Tandukna i bas sukina si empat, arus ersada ras batar-batar e. 3Lapisi lah alu emas murni bagin si arah das, empatna dingdingna bage pe tandukna, jenari pasang bingke emas kelewet. 4Bahan dua gelang emas ingan ngangkatsa, jenari leketken gelang e arah teruh bingke e dua dingding gelah banci i je itamaken lanja-lanjana guna ngangkatsa. 5Lanja-lanjana enda bahan i bas kayu jati nari, jenari lapisi alu emas. 6Tamakenlah batar-batar enda i darat kire-kire si gantung i lebe-lebe Peti Perpadanen e. I bas ingan e me Aku njumpai kam. 7Tep-tep erpagi-pagi asum Harun reh nikapken lampu e, arus itutungna barang tutungen si merim i babo batar-batar e. 8Karaben pe arus bage ibahanna asum isaganina lampu e. Persembahen tutungen si merim enda arus iterusken alu la erpeltep-peltep i bas kerina paksa-paksa si reh enda. 9Ola persembahken i babo batar-batar enda: rempah-rempah si ilarang, asuh-asuhen ntah, persembahen buah gandum; janah ola iamburken anggur persembahen ku je. 10Sekali setahun la banci la ilakoken Harun pembersihen batar-batar alu namaken dareh i bas tanduk batar-batar e. Dareh si itamaken ku je, e me dareh asuh-asuhen si ipersembahken guna pengalemi dosa. Si enda la banci la ibahan tep-tep tahun i bas kerina paksa-paksa si reh enda. Batar-batar enda arus badia tuhu-tuhu, man bangKu saja ngenca ipergunaken. Aku kap TUHAN.”

Cuke guna Kemah si Badia

11Nina TUHAN man Musa, 12“Adi ibahanndu sensus man bangsa Israel, tep-tep dilaki arus nggalar man bangKu tukur kesahna, gelah ola ia dat bahaya tupung ibahan sensus. 13Tep-tep kalak si bengket i bas sensus la banci la nggalar duit asa si enggo itentuken. Duit e arus igalarken man bangKu. 14Tep-tep kalak si isensus, e me tep-tep dilaki si umurna lebih dua puluh tahun, arus nggalar duit asa si enggo itentuken e. 15Asum nggalar tebusen kesah kalak bayak la banci lebih, bage pe kalak si mesera la banci kurang. 16Pepulung lah duit enda i bas bangsa Israel nari jenari pergunaken guna keperlun-keperlun Kemah Perjumpan. Cuke enda e me tukur kesahna, maka Kuinget engkawali ia.”

Baskom tembaga

17Nina TUHAN man Musa, 18“Bahan sada baskom tembaga ras tapakna pe tembaga. Tamaken baskom e kelang-kelang Kemah ras batar-batar e, jenari isi alu lau. 19Harun ras anakna la banci la murihi tanna ras nahena alu lau e, 20ope denga ia bengket ku bas Kemah ntah pe ndeheri batar-batar, guna mpersembahken persembahen pangan; alu bage la ia ibunuh. 21La banci la iburihina tanna ras nahena, gelah ola ia mate. Enda me sada peraturen si la banci la iikutkenna ras kesusurenna seh rasa lalap.”

Minak penangkuhen

22Nina TUHAN man Musa, 23“Buat rempah-rempah si mejilena, e me enem kilo mur kental, telu kilo kayu manis, telu kilo tebu si merim, 24ras enem kilo kayu teja (kerina itimbang rikutken timbangen si enggo itentuken). Tambahken empat liter minak saitun, 25jenari bahan lah minak penangkuhen si badia icampur bagi minak wangi. 26Curcurken minak enda ndai ku Kemah Perjumpan, ku Peti Perpadanen, 27ku meja ras kerina alat-alatna, ingan lampu ras alat-alatna, batar-batar ingan nutungi si merim-merim, 28ku batar-batar ingan persembahen tutungen ras kerina alat-alatna, bage pe ku baskom ingan erburih ras tapakna gelah badia. 29Endesken lah barang-barang enda ndai kerina alu cara si enda man bangKu, gelah badia tuhu-tuhu kerina, janah ise pe, ntah kai pe si ndadapsa la banci la kena mara erkite-kiteken gegeh kebadianna. 30Kenca bage minakilah Harun ras anak-anakna lako nangkuhken ia jadi imam gelah idahikenna dahinKu. 31Kataken man bangsa Israel, nindu, ‘Minak penangkuhen si badia enda arus ipake guna dahin-dahinKu i bas kerina paksa-paksa si reh. 32Minak e la banci icurcurken ku kerina kalak, janah la banci ipakendu campuren si bage erbahan minakndu. Enda badia, e maka la banci la ipebadiakenndu e. 33Ise pe si erbahan minak si bage ntah pe makeken minak e man kalak si labo imam, ia lanai nari ikira bangsangKu.’ ”

Rempah-rempah tutungen si merim

34Nina TUHAN man Musa, “Buatlah tep-tep erbage si seri beratna i bas rempah-rempah si merim si tersinget i jenda: duruh damar, kulit kerang, duruh pinus, ras kumenen murni. 35Pakelah enda kerina erbahan campuren si merim-merim, icampur bagi erbahan minak wangi. Jenari tambahken ku je sira gelah banci tetap bersih ras badia. 36Kenca bage tutu lah sada bagin jadi tepung halus, baba ku Kemah Perjumpan jenari pirpirken i lebe-lebe Peti Perpadanen. Jaga maka rempah tutungen si merim enda tetap badia. 37Ola pake pulungen si seri guna erbahan minak wangi man pakenndu jine. Jagalah maka barang enda sada barang si badia si ikhususken man bangKu saja ngenca. 38Ise pe si erbahan si merim-merim man pakenna si seri ras si enda, ia lanai nari ikira i bas bangsangKu.”

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index