Search form

KELUAREN 32

Lembu emas

(Ul. 9:6-29)

1Sanga iidah bangsa Israel maka Musa lalap la nusur i das Deleng Sinai nari, tapi ndekah ia tading i je, iulung-ulungna Harun janah nina, “La sieteh ntah kai enggo jadi man Musa, kalak si minpin kita ndarat i Mesir nari; e maka bahanlah sada dibata si man sembahen, guna minpin kita.”

2Nina Harun man bana kerina, “Tangtangilah anting-anting emas si ipake ndeharandu, anak-anakndu si dilaki ras si diberu, jenari bereken man bangku.” 3E maka kerina bangsa Israel nangtangi anting-antingna jenari iberekenna man Harun. 4Ibuat Harun kerina anting-anting ndai, ileburna, jenari ituang emas ndai ku sada cetaken, jenari itepana sada lembu emas.

Nina bangsa ndai, “O Israel, enda me dibatanta si mabai kita ndarat i Mesir nari!”

5Kenca idah Harun si e ipajekkenna sada batar-batar i lebe-lebe lembu emas ndai, jenari imomokenna nina, “Pagi ibahan sada pesta guna kemulian TUHAN.” 6Pepagina lampas, ibaba kalak ndai asuh-asuhen man tutungen jadi persembahen, ras si debanna si man pangan jadi persembahen persadan. Kundul ia kerina man ras minem-minem; dungna enggo sambar jadi sada pesta mabuk-mabuk, janah perlagu langkah dilaki ras diberu lanai erpepah.

7Nina TUHAN man Musa, “Pedas kam mulih ku teruh, sabap bangsandu si enggo ibabandu ndarat i Mesir nari enggo erdosa janah nulak Aku. 8Itadingkenna dalan si enggo Kupedahken gelah ikutkenna; ibahanna sada lembu emas tuangen janah enggo isembahna ras ibahanna persembahenna ku je. Ikatakenna e si mabai ia ndarat i Mesir nari. 9Enggo Kueteh kuga kengna bangsa enda. 10Genduari, ola cubaken ngambati Aku. Nembeh kal ateKu man bana kerina, janah Kukernepken ateKu. Kenca bage, Kubahan ateKu kam ras kesusurenndu jadi sada bangsa si mbelin.”

11Tapi meseksek ipindoken Musa man TUHAN, Dibatana nina, “TUHAN, ngkai maka bage rawanNdu man bangsaNdu, si enggo iselamatkenNdu i Mesir nari alu gegeh ras kuasa si mbelin? 12Adi ikernepkenNdu bangsa e, tentu ikataken bangsa Mesir me maka Kam enggo maba ia ndarat i Mesir nari alu tujun munuhsa i deleng-deleng enda janah ngeradaskenca tuhu-tuhu i bas doni enda nari. Ola min Kam merawa, ola min ukurNdu bage janah ola min sehken cilaka enda man bangsaNdu. 13Inget min suruh-suruhenNdu Abraham, Isak, ras Jakup. Ingetlah padan si enggo ibahanNdu ras ia maka iberekenNdu kesusurenna, teremna bagi buena bintang i langit, janah mereken man kesusurenna kerina taneh si enggo ipadankenNdu jadi sikerajangenna seh rasa lalap.” 14E maka erkusur ukur TUHAN janah la isehkenNa cilaka si enggo isurakenNa man bangsaNa.

15Nusur mulihken Musa i das deleng ndai nari, ibabana papan batu si dua e i ja tersurat pedah TUHAN i bas dua mbelahna. 16Dibata jine si erbahan papan batu e janah Ia ka pe si nuratken pedah e i je.

17Ibegi Josua sora bangsa Israel ersurak-surak jenari ikatakenna man Musa nina, “Kubegi sora kalak erperang i bas ingan erkemah.”

18Nina Musa, “Sora e labo sora kalak ersurak erkite-kiteken kemenangen ntah pe sora kalak nderkuh erkiteken talu erperang; sora e, e me kap sora kalak rende.”

19Kenca Musa enggo ndeher ku ingan erkemah e janah enggo teridah man bana lembu e dingen kalak ndai landek-landek, merawa kal ia. I bas nahe deleng e ibenterkenna papan batu si dua si ibabana ndai e maka pecah. 20Ibuatna lembu si ibahan kalak ndai, ileburna, igilingna jadi tepung halus, jenari icampurna ras lau. Kenca bage isuruhna bangsa Israel minemsa. 21Ikatakenna man Harun nina, “Kai nge ibahan bangsa enda man bandu, maka ibabaindu ia erbahan dosa si bage belinna?”

22Nina Harun njabapsa, “Ola kam merawa man bangku; itehndu jine nge gegehna bangsa enda erbahan si jahat. 23Ikatakenna man bangku, ‘La sieteh ntah kai enggo jadi man Musa, si maba kita ndarat i Mesir nari, e maka bahanlah sada dibata si minpin kita.’ 24Kusuruh ia mereken perhiasen-perhiasen emasna man bangku, e maka kalak si lit i bas ia, minter itangtangina jenari iberekenna man bangku. Kubenterken perhiasen-perhiasen e ku bas api, jenari jadi me lembu e!”

25Idah Musa maka enggo ipelepas Harun bangsa Israel rate-ate seh maka megombang imbang-imbangna man bana. 26E maka tedis Musa i bas gerbang ingan bangsa Israel erkemah, janah nina alu sora megang, “Ise si arah TUHAN reh ku jenda!” E maka kerina suku Lewi pulung sekelewet Musa. 27Jenari nina Musa man bana kerina, “TUHAN, Dibata Israel mereken perentah man bandu sekalak-sekalak gelah ibuatndu pedangndu, jenari laweslah arah tengah-tengah ingan erkemah enda i bas gerbang enda nari ku gerbang si deban guna munuh senina-seninandu, teman-temanndu, ras tetangga-tetanggandu.” 28Minter ipatuhi suku Lewi perentah e, jenari ibunuhna kira-kira 3000 kalak i bas wari e. 29Nina Musa man suku Lewi, “Sendah enggo itangkuhkenndu dirindu jadi imam-imam ndahiken dahin TUHAN alu munuh anak-anakndu, senina-seninandu, e maka TUHAN enggo mereken pasu-pasuNa man bandu.”

30Pepagina nina Musa man bangsa Israel, “Enggo kam erbahan dosa si mbelin. Tapi genduari lawes ka aku mulihken ku das deleng ndahi TUHAN; mbera-mbera banci dat aku pengalemi dosa man bandu.” 31Kenca bage mulih Musa ndahi TUHAN, janah nina, “Bangsa enda enggo erbahan dosa si mbelin. Enggo ibahanna sada gana-gana emas jenari ersembah ia ku je. 32Ngarap aku gelah ialemiNdu dosana; tapi adi la Kam nggit, sasapkenlah gelarku i bas kitap inganNdu nuratken gelar-gelar bangsaNdu.”

33Erjabap TUHAN nina, “Kalak si enggo erdosa man bangKu nge si Kusasapken gelarna i bas kitapKu nari. 34Genduari laweslah, babailah bangsa e ku ingan si enggo Kukataken man bandu. Ingetlah maka malekatKu pagi si nuduhken dalan man bandu, tapi paksana la banci la seh maka Kuukum bangsa enda erkite-kiteken dosana.”

35E maka ipesusur TUHAN sada penakit ku bangsa e, sabap enggo ipaksana Harun erbahan lembu emas e.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index