Search form

KELUAREN 34

Dua papan batu si deban

(Ul. 10:1-5)

1Nina TUHAN man Musa, “Bahan dua papan batu seri ras si pemena ndube, gelah Kusuratken i je kata-kata si lit i bas papan batu si ipecahkenndu e. 2Pagi erpagi-pagi arus enggo dung, jenari rehlah kam ku das Deleng Sinai njumpai Aku i tampuk deleng e. 3Ise pe la banci ikut nangkih ras kam; ise pe la banci deher ras deleng e. Biri-biri ras lembu pe la banci nggagat i je.” 4E maka minter ibahan Musa dua papan batu, seri ras si pemena, jenari pepagina lampas, ibabana ku das Deleng Sinai bagi si enggo ipedahken TUHAN man bana.

5E maka nusur me TUHAN ku teruh i bas sada embun, tedis Ia ras Musa i je, jenari ikatakenNa gelarNa si badia, e me TUHAN. 6Kenca bage mentas TUHAN arah lebe Musa janahNa erlebuh, nina, “Aku kap TUHAN. Aku kap Dibata si dem alu lias ate ras perkuah ate. Aku la sukah merawa, janah Kucidahken keleng ateKu si mbelin ras kesetianKu si tetap. 7Kusehken padanku man meribu-ribu kesusuren janah Kualemi kejahaten ras dosa; tapi la banci la Kuukum anak ras kempu seh ku bas kesusuren si peteluken ras si peempatken erkite-kiteken dosa orang tuana.”

8Pedas-pedas Musa nembah erjimpuh, ayona seh ku taneh. 9Nina, “TUHAN, adi tuhu-tuhu kin keleng ateNdu aku, kupindo gelah ras kita lawes. Bangsa enda tuhu mekeng, tapi alemi lah kejahaten ras dosa kami, janah alokenlah kami jadi bangsaNdu.”

Perpadanen iperbarui

(Kel. 23:14-19; Ul. 7:1-5, 16:1-17)

10Nina TUHAN man Musa, “Genduari Kubahan sada perpadanen ras bangsa Israel. I lebe-lebe bangsa e Kubahan perbahanen-perbahanen si mbelin si la enggo pernah ilakoken bage i japa pe i babo doni enda i tengah bangsa apai pe. Kerina bangsa ngidah perbahanen si mbelin e pagi, si banci Kubahan, TUHANndu, sabap ateKu ngelakoken sada tanda sengget man bandu. 11Patuhilah undang-undang si ateKu Kubereken man bandu sendah, bangsa Amori, bangsa Kanaan, bangsa Heti, bangsa Peris, bangsa Hewi, ras bangsa Jebusi, kerina pagi kupelawes tupung kam ngasak ku je. 12Ola kal ibahanndu perpadanen ras anak negeri si ibengketindu, sabap enda banci jadi sada siding si erbahanca kam bene. 13Tapi arus iruntuhkenndu batar-batar inganna ersembah, perperken tugu-tugu berhalana, janah tabah lah binangun Dewi Aserana.

14Ola sembah dibata si deban, sabap Aku, TUHANndu, tuhu-tuhu mecimberu kal. 15Ola bahan perpadanen ras anak negeri e, sabap adi isembahna pagi dibata-dibatana, dibata perbegu, iundangna kam ikut ras ia, jenari tentu merincuh kam man pangan si isembahkenna man dibata-dibatana. 16Banci jadi anak-anakndu si dilaki ngempoi diberu kalak asing e, si mabai ia lanai setia man bangKu, jenari isembahna dibata-dibata kalak perbegu e.

17Ola bahan janah ola sembah dibata-dibata i bas besi nari.

18Pestaken lah Wari Raya Roti si La Itama Ragi. Bagi si enggo Kupedahken man bandu, panlah roti si la itama ragi pitu wari dekahna i bas bulan Abip, sabap i bas bulan e me kam nadingken Mesir.

19Tep-tep anak dilaki sintua ras anak si pemena daluna i bas asuh-asuhen, Aku empuna. 20Tapi la banci la itebusindu tep-tep anak kelede si pemena alu mpersembahken anak biri-biri jadi sambarna. Adi la itebusindu, penggelkenlah kerahungna. Tebusilah tep-tep anak dilaki sintua.

Ise pe la banci ngadap Aku adi la maba persembahen.

21Enem wari ibereken kesempaten man bandu guna ndahiken dahinndu, tapi ola erdahin i bas wari si pepituken, aminna gia paksa si e paksa nenggala ntah rani.

22Pestakenlah Kerja Rani tupung kam menaken peranin buah pagendu si pemena, janah pestakenlah Wari Raya Sapo-sapo i bas pendungi tahun, tupung iperanindu buah kayundu.

23Telu kali setahun kerina si dilaki la banci la reh ersembah man bangKu, TUHANndu, Dibata Israel. 24Kenca enggo Kupelawes bangsa-bangsa si i lebe-lebendu, janah Kupebelang daerahndu, ise pe la nggit ncubakenca erperang ras kam tupung wari raya si telu e.

25Ola persembahken roti si tama ragi tupung ipersembahkenndu asuh-asuhen man bangKu. Ola tadingken sitik pe seh erpagi-pagi asuh-asuhen si igeleh asum Wari Raya Paskah e.

26Tep-tep tahun babalah ku Rumah TUHAN buah gandum si pemena iperanindu.

Ola tanggerken anak biri-biri ntah pe kambing alu susu indungna.”

27Kedungenna nina TUHAN man Musa, “Suratkenlah kerina kata-kata enda, sabap erpalasken si e Aku erbahan perpadanen ras kam bage pe ras bangsa Israel.” 28Musa ringan i das deleng e ras TUHAN empat puluh wari empat puluh berngi dekahna. La ipanna kai pe, la ia minem. Isuratkenna i bas papan batu e kata-kata perpadanen e, e me Sepuluh Pedah Dibata.

Musa nusur i Deleng Sinai nari

29Tupung Musa nusur i das Deleng Sinai nari maba Sepuluh Pedah Dibata e, ayona ersinalsal sabap enggo ia ngerana ras TUHAN; tapi la ietehna e. 30Harun ras kerina kalak si deban ngenehen Musa, janah idahna maka ayona ersinalsal, e maka mbiar ia kerina ndeherisa. 31Tapi idilo Musa ia kerina, jenari Harun ras kerina peminpin-peminpin perpulungen bangsa Israel reh ndahi ia, e maka ngerana Musa man bana. 32Kenca bage kerina bangsa Israel pulung engkeleweti ia, jenari iendesken Musa undang-undang si ibereken TUHAN man bana i das Deleng Sinai. 33Kenca Musa enggo dung ngerana, itamburina ayona alu uis. 34Adi lawes kenca Musa ku bas Kemah Perjumpan guna ngerana ras TUHAN, itangtangina tutup ayona e. Ndarat kenca ia i jenari, iturikenna man bangsa Israel asa kai si enggo isuruh ia ngatakenca, 35janah idah bangsa ndai ayona ersinalsal. Kenca bage itutupina ka ayona, seh ngerana ka ia ras TUHAN mulihken.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index