Search form

KELUAREN 35

Peraturen kerna wari Sabat

1Ipepulung Musa kerina bangsa Israel jenari ikatakenna man bana nina, “Enda me si enggo ipedahken TUHAN gelah idalinkenndu.” Nina TUHAN, 2‘Enem wari banci kam ndahiken dahinndu, tapi wari si pepituken arus ipebadiaken. Wari e, wari Sabat si ipersembahken bangKu, TUHANndu. Ise si erdahin i bas wari e, aminna kai gia idahna, la banci la ibunuh. 3Api la banci ipegarandu i bas rumahndu i bas wari Sabat e.’

Persembahen guna Kemah si Badia

(Kel. 25:1-9)

4Ikataken Musa man kerina bangsa Israel nina, “Enda me si enggo ipedahken TUHAN: 5Bahan lah sada persembahen man TUHAN. Tep-tep kalak si atena nehken persembahen, ibabana lah persembahenna emas, pirak ntah pe tembaga; 6lenen halus, wool biru, ungu, ras megara; uis si ibahan i bas mbulu kambing nari; 7kulit bajar biri-biri si icelup megara; kulit halus, kayu jati; 8minak guna lampu; rempah-rempah guna erbahan minak penangkuhen ras man barang tutungen si merim; 9batu permata delima ras batu permata si debanna si man tamanken i bas baju epod man paken Imam si Mbelin ras i bas tutup tentenna.”

Barang-barang guna Kemah si Badia

(Kel. 39:32-43)

10“Kerina tukang si beluh i bas kam arus reh erbahan asa kai si iperentahken TUHAN: 11Kemah e, tarumna ras tutup tarumna si arah darat, kancingna ras papanna, belotina si berteng, tiang-tiangna, ras palasna; 12Peti Perpadanen, lanja-lanjana, tutupna, ras kire-kirena si jadi ampang-ampangna, 13meja, lanja-lanjana, ras kerina alat-alatna; roti si man persembahenken man Dibata, 14nahe lampu gelah terang, ras kerina alat-alatna; lampu-lampu ras minakna; 15batar-batar ingan nutungi barang si merim-merim ras lanja-lanjana; minak penangkuhen; barang tutungen si merim; kire-kire guna dalan bengket ku bas Kemah e; 16batar-batar ingan nutung persembahen, ras jarikjak tembaga si ileketken ku je, lanja-lanjana, ras kerina alat-alatna; baskom, ingan lau pemurihi tan ras nahe bage pe ras tapakna; 17kire-kire kesain, tiang-tiangna ras alasna; kire-kire dalan bengket ku bas kesain e, 18pantuk-pantukna ras tinali guna Kemah e ras kesainna; 19ras paken-paken si lanai lang-lang jilena guna ipake imam-imam sanga ia ndahiken dahin imam i bas ingan si badia e me kap paken si badia man Imam Harun ras anak-anakna.”

Bangsa Israel maba persembahenna

20Kerina bangsa Israel lawes. 21Ise saja si ersuruh ukurna, ibabana sada persembahen man TUHAN guna erbahan Kemah Perjumpan. Ibabana pe asa kai si iperluken guna ersembah ras si iperluken guna erbahan paken imam. 22Ise si nggit, subuk dilaki ntah diberu, ibabana kancing perhiasen, anting-anting, cincin, bura ras erbage perhiasen emas, janah kerina si e iendeskenna man TUHAN. 23Kalak si lit lenen halusna, wool biru, ungu, megara; uis si ibahan i bas mbulu kambing nari; kulit bajar biri-biri si icelup megara; ntah kulit halus, ibabana si e. 24Kerina si ngasup mereken sumbangen pirak ntah pe tembaga, ibabana jadi persembahenna man TUHAN, janah asa kai lit kayu jatina si banci ipake i bas bagin si apai gia i bas dahin e, ibabana e. 25Kerina diberu si beluh ertenun maba benang lenen halus, benang ras benang wool biru, ungu, ras megara, si enggo ibahanna. 26Ibahanna ka pe benang i bas mbulu kambing nari. 27Peminpin-peminpin bangsa e maba batu permata delima ras batu-batu permata si deban si itamaken i bas baju epod, paken imam ras tutup tentenna, 28bage pe rempah-rempah ras minak guna lampu-lampu, guna minak penangkuhen, ras man barang tutungen si merim. 29Kerina bangsa Israel si nggit maba persembahenna man TUHAN alu ukur meriah guna dahin si enggo iperentahkenNa man Musa.

Tukang-tukang si beluh erbahan Kemah si Badia

(Kel. 31:1-11)

30Nina Musa man bangsa Israel, “TUHAN enggo milih Besalel, anak Uri, kempu Hur i bas suku Juda nari. 31Ia enggo idemi Dibata alu kesahNa, janah enggo iberekenNa man bana kepentaren, kengasupen, ras pengertin erbahan kerina barang-barang si mejilena, 32guna ngerencanaken potongen barang si mejile, jenari erbahanca i bas emas, pirak ras tembaga nari; 33erbahan permata-permata ras namakenca i bas bingkena; erbahan ukir-ukiren kayu, ras erbage-bage dahin si deban, erbahan barang-barang si mejilena. 34Man Besalel ras man Oholiap anak Ahisamah, i bas merga Dan nari, enggo ibereken TUHAN kengasupen ngajarken kebeluhenna ertukang man kalak si deban. 35Man bana duana enggo ibereken TUHAN pemeteh i bas erbage-bage dahin jadi tukang ukir, ras tukang tenun si ngasup erbahan lenen halus; wool biru, ungu, ras megara; ras uis si deban. Ia ngasup erbahan kai-kai pe janah pentar ka pe ngerencanaken potongen barang si mejile.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index