Search form

KELUAREN 39

Erbahan paken imam

(Kel. 28:1-14)

1Alu wool biru, ungu, ras megara ibahanna paken si lanai kal lang-lang jilena guna ipake imam tupung ia ndahiken dahinna i bas Ingan si Badia. Ibanna paken imam man Harun, bagi si enggo ipedahken TUHAN man Musa.

2Ibahanna epod i bas lenen halus; i bas wool biru, ungu, ras megara, bage pe benang emas nari. 3Itepana emas jadi lambar-lambar si menipes, jenari ipotong-potongna jadi benang, gelah itenun ras lenen halus e, bage pe ras wool biru, ungu, ras megara. 4Ibahanna dua tinali bas bara guna baju epod e, jenari ileketkenna arah sampingna, gelah banci iiket alu e. 5Gendit si itenun halus, bahan-bahanna seri, ijaitkenna ersada ras baju epod e, bagi si enggo ipedahken TUHAN man Musa. 6Isikapkenna batu permata delima, jenari iiketna alu bingke emas; i bas batu permata e iukirna alu mejile gelar-gelar anak Jakup si sepuluh dua. 7Itamakenna batu permata si enggo iukir e i bas tinali bas bara baju epod ndai jadi sada tanda bangsa Israel si sepuluh dua, payo kal bagi si enggo ipedahken TUHAN man Musa.

Erbahan tutup tenten

(Kel. 28:15-30)

8Ibahanna sada tutup tenten, bahanna seri ras baju epod ndai, sulamenna pe seri. 9Bentukna segi empat janah erlipat dua, gedangna 22 sentimeter, belangna pe 22 sentimeter. 10Itamakenna i je empat baris batu permata si meherga. I bas baris si pemena: batu delima, topas ras baiduri sepah; 11i bas baris si peduaken: sada batu samrud, sada batu nilam, ras sada berlian; 12i bas baris si peteluken: sada lasuardi, sada akik, ras sada amatis; 13janah i bas baris si peempatken: sada mutiara biru, sada delima, ras sada yasper. Kerina batu permata enda itamaken i bas bingke si ibahan i bas emas nari. 14I bas tep-tep batu permata enda lit i je iukir gelar sekalak i bas anak-anak Jakup, gelah jadi tanda suku Israel si sepuluh dua. 15Guna tutup tenten e, ibahanna rante i bas emas murni nari, ipiuh bagi tinali. 16Ibahanna dua pengiket i bas emas nari ras dua gelang emas, jenari gelang emas e ileketkenna ku tutup tenten e i bas sukina si arah datas. 17Rante emas si dua ndai ileketkenna ku gelang si dua ndai, 18jenari ujungna si dua nari ileketkenna ku pengiket si dua ndai janah alu cara si bagenda ileketkenna ka pe e arah lebe ku tinali baju epod ndai. 19Ibahanna dua gelang emas, jenari isangketkenna ku tutup tenten e, i bas sukina si arah teruh, i bas tepi si arah bas rembak ras baju epod e. 20Ibahanna dua nari gelang emas, jenari isangketkenna ku ujung si arah teruh tinali bas bara baju epod e arah lebe, deherken kelimna datasen gendit si halus tenunenna e. 21Bagi si enggo ipedahken TUHAN man Musa, iiketna gelang tutup tenten e ras gelang epod ndai alu tinali biru, seh maka tutup tenten tetap arah datas tinali e janah la mosar.

Erbahan paken-paken si deban man imam

(Kel. 28:31-43)

22Baju jubah si nutupi epod e ibahan i bas wool biru nari. 23Lubang ingan nucukken takal ilapisi alu uis si itenun rapat gelah ola merigat. 24-26I bas tepi jubah e arah teruh itamakenna buah galiman si ibahan i bas lenen halus ras wool biru, ungu ras megara, iselang-selingi alu giring-giring emas, pas kal bagi si enggo iperentahken TUHAN man Musa.

27Ibahanna baju Harun ras anak-anakna, 28bage pe bulangna, tengkulukna, dingen seluar gendek i bas lenen nari, 29janah selempang i bas lenen halus nari ras i bas wool biru, ungu ras megara, si ihiasi alu sulamen, bagi si enggo ipedahken TUHAN man Musa. 30Ibahanna pe perhiasen i bas emas murni nari, jadi tanda jabaten khusus, janah iukirna i je kata-kata enda: “Iendesken man TUHAN saja”. 31Iiketkenna perhiasen e ku bulang e arah lebe alu tinali biru, sue ras si enggo ipedahken TUHAN man Musa.

Dahin enda idungi

(Kel. 35:10-19)

32Kerina dahin kerna Kemah Perjumpan e enggo dung. Kerinana ibahan bangsa Israel sue ras si enggo ipedahken TUHAN man Musa. 33Iendeskenna man Musa Kemah e ras kerina alat-alatna, sangketenna, papanna, beloti-beloti si bertengna, ras alasna; 34tarumna si ibahan i bas kulit bajar biri-biri icelup megara; tarumna si ibahan i bas kulit halus nari; kire-kirena si jadi ampang-ampang; 35Peti Perpadanen si isin papan batu e, lanja-lanjana, ras tutupna; 36meja ras kerina alat-alatna, ras roti si man persembahenken man Dibata; 37nahe lampu si ibahan i bas emas murni nari, lampuna, kerina alat-alatna, ras minak guna lampu-lampu e; 38batar-batar emas, minak penangkuhen; barang tutungen si merim, kire-kire guna dalan bengket ku bas Kemah e; 39batar-batar tembaga ras jarikjak tembagana, lanja-lanjana, ras kerina alat-alatna; baskom ingan lau pemurihi ras tapakna, 40kire-kire guna bidena ras tiang-tiangna bage pe alas tiang e; kire-kire guna dalan bengket ku bas bide e ras tinalina, pantuk-pantuk guna Kemah e; kerina alat-alat si man paken i bas Kemah e, 41ras paken si lanai kal lang-lang jilena si man paken imam i bas ingan si badia e, paken si badia man Imam Harun ras anak-anakna. 42Kalak Israel enggo ndahiken kerina dahin e sue ras si enggo ipedahken TUHAN man Musa. 43Ipepayo Musa kerinana janah idahna maka enggo ibahan kalak ndai kerinana sue ras si enggo ipedahken TUHAN. E maka ipasu-pasu Musa ia kerina.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index