Search form

KELUAREN 40

Kemah si Badia ipasang jenari iendesken man TUHAN

1Ikataken TUHAN man Musa nina, 2“I bas wari si pemena bulan si pemena, pasanglah Kemah Perjumpan e. 3Tamaken ku bas Kemah e Peti Perpadanen si isin Sepuluh Pedah Dibata, jenari tamaken kire-kire i lebe-lebe Peti e. 4Baba meja e ku bas, jenari tamaken alat-alatna i babona. Bage pe baba nahe lampu e ku bas, jenari tamaken lampuna pe. 5Tamaken batar-batar emas ingan nutungi barang si merim e i lebe-lebe Peti Perpadanen e, jenari gantungken kire-kire e i bas dalan bengket ku bas Kemah e. 6Tamaken i lebe-lebe Kemah e batar-batar ingan nutung persembahen. 7Tamaken baskom ingan lau pemurihi i kelang-kelang Kemah e ras batar-batar ndai, jenari isi alu lau. 8Tamaken bidena ndai kelewet, janah gantungken kire-kire e i bas dalan bengket.

9Kenca bage endeskenlah Kemah e ras kerina alat-alatna man bangKu alu ncurcurken minak penangkuhen si badia e ku je, e maka enggo jadi badia Kemah e. 10Seterusna, endesken ka batar-batar e ras kerina alat-alatna alu ncurcurken minak ku je, e maka batar-batar e enggo jadi badia tuhu-tuhu. 11Bage ka pe endesken lah baskom ingan lau pemurihi e ras tapakna alu cara si seri.

12Baba lah Harun ras anak-anakna ku dalan bengket ku bas Kemah e, kenca bage suruh gelah i basuhna bana rikutken aturen agama. 13Pakeken man Harun paken imam e, minaki ia, janah alu cara si enda ia itangkuhken, gelah banci erdahin jadi imam ndahiken dahin-dahinKu. 14Babalah anak-anakna jenari pakeken man bana baju e. 15Kenca bage minaki lah ia kerina, bali ras iminakindu bapana, gelah banci ia erdahin jadi imam ndahiken dahinKu. Alu bagenda ia enggo esah jadi imam terus ku bas wari-wari si reh.”

16Ibahan Musa me kerina bagi si enggo ipedahken TUHAN. 17E maka i bas wari si pemena bulan si pemena, i bas tahun si peduaken kenca itadingkenna Mesir, ipasang me Kemah Perjumpan e. 18Icibalken Musa alasna, ipasangna dingdingna, isangketkenna beloti-belotina si berteng, janah ipajekkenna tiang-tiangna. 19Ikimbangkenna tarum Kemah e jenari itamakenna lapisen tarum si arah darat, bagi si enggo ipedahken TUHAN. 20Kenca bage ibuatna papan batu si dua ndai, jenari itamakenna ku bas Peti Perpadanen e. Itamakenna lanja-lanjana arah lubang gelang peti e, jenari itamakenna tutup peti e arah datas. 21Kenca bage itamakenna Peti e ku bas Kemah janah isangketkenna kire-kirena man dingdingna. Alu bage ikawalina Peti Perpadanen e, sue ras si enggo ipedahken TUHAN.

22Itamakenna meja ndai ku bas Kemah e, i darat kire-kire e arah Utara, 23jenari itamakenna roti i babona, si ipersembahken man TUHAN, sue ras si ipedahken TUHAN. 24Itamakenna nahe lampu e ku bas Kemah e, arah Selatan, petingtang ras meja ndai. 25I lebe-lebe TUHAN, ipegarana lampu e i je, sue ras si enggo ipedahken TUHAN. 26Itamakenna batar-batar emas e ku bas Kemah, i lebe-lebe kire-kire e, 27jenari itutungna si merim-merim, sue ras si ipedahken TUHAN. 28Isangketkenna kire-kire e i bas dalan bengket ku bas Kemah e, 29janah i lebe-lebe kire-kire e itamakenna batar-batar man ingan nutung persembahen tutungen. I babo batar-batar e ipersembahkenna persembahen tutungen ras persembahen pangan, sue ras si enggo ipedahken TUHAN. 30Itamakenna baskom ingan lau pemurihi i kelang-kelang Kemah ras batar-batar e, jenari iisina alu lau. 31Musa, Harun ras anak-anakna si dilaki murihi tan ras nahena i je 32tep-tep kali ia lawes ku bas Kemah ntah ku batar-batar e, sue ras si enggo ipedahken TUHAN. 33Ipasang Musa bide i sekelewet Kemah ras batar-batar e, jenari isangketkenna kire-kire i bas dalan bengket ku bas kesain Kemah e. Alu bage enggo dung idahikenna kerina dahin e.

Reh embun ku babo Kemah si Badia

(Bil. 9:15-23)

34Kenca bage lit embun nutupi Kemah e janah sinalsal kemulian TUHAN ndemi Kemah e. 35Erkiteken si e Musa la banci bengket ku bas Kemah e. 36Adi embun e terangkat i bas Kemah e nari, ipindahken bangsa Israel inganna erkemah ku ingan si deban. 37Kidekah embun e ringan denga i babo Kemah e, la ipindahken kalak e inganna erkemah. 38Kidekah perdalanen bangsa e, adi suari banci iidahna embun kemulian TUHAN i babo Kemah e, janah adi berngi idahna api si gurlah.

Pustaka Si Badia

Pustaka Si Badia, Today's Batak Karo Version © 2003, Indonesian Bible Society – Lembaga Alkitab Indonesia More Info | Version Index